Bölgə dövlətləri Qərbin davamlı təxribatlarına qarşı mübarizədə Azərbaycan modelinə istinad edirlər
Azərbaycanın yüksəlişinin və nailiyyətlərinin təməlində dayanan həqiqətlərdən biri Prezident İlham Əliyevin həyata keçirdiyi müstəqil və qətiyyətli siyasətdir. Məhz bu cür siyasi kursun yürüdülməsi Azərbaycana qarşı çıxan Qərbin davamlı şəkildə həyata keçirdiyi qarayaxma kampaniyasının fonunda respublikamızın yüksəlişini və ərazilərimizin işğaldan azad olunmasını təmin edib.
Qərbin avantürası Gürcüstanda iflasa uğrayır
Reallıq göstərir ki, bu cür siyasi kursun həyata keçirilməsi xoş mərama xidmət etməyən, cəmiyyətdə neqativ dəyərlərin kök salması məqsədlərini güdən xarici təsirlərin qarşısının alınması, dövlətin sağlam təməllər üzərində bərqərar tutmasının əsas siyasi prinsiplərindən biridir. Vaxtında bunları düzgün dəyərləndirən Azərbaycan dövlətinin siyasi iradəsinin nəticəsi kimi Qərbin ölkəmizlə bağlı bütün məkrli planları iflasa uğrayıb.
Onu da qeyd etməliyik ki, Azərbaycanın yürütdüyü bu siyasət nümunəyə çevrilərək, Qərbin digər ölkələrlə də bağlı riyakar ssenarilərinə zərbə vurur. Gürcüstanda Qərbin neqativ niyyətlərinin və arzuolunmaz təsirlərinin qarşısının alınması istiqamətində ortaya qoyulan qətiyyətli siyasi iradə buna misaldır.
Gürcüstanda oktyabrın 26-da keçirilən parlament seçkiləri Qərbin bu ölkə, nəticə etibarilə isə Cənubi Qafqaz regionu ilə bağlı avantürasını iflasa uğratdı. "Gürcü Arzusu - Demokratik Gürcüstan" partiyasının seçicilərin etimadını qazanması həm də Gürcüstan əhalisinin ölkədə söz sahibi olmaq, onu öz müstəqil yolundan döndərmək istəyən Qərb siyasi dairələrinin və onların maliyyələşdirdiyi qeyri-hökumət təşkilatları üzərində qələbəsi oldu.
Azərbaycanın regiondakı yaxın tərəfdaşı olan Gürcüstanda keçirilən son parlament seçkilərində Cənubi Qafqazı qarşıdurma meydanına çevirmək, buradan Rusiyaya qarşı ikinci cəbhə açmaq istəyən xarici siyasi dairələr darmadağın edildilər. Gürcüstan vətəndaşları əmin-amanlığa və sabitliyə səs verdilər, hakim partiyanı dəstəkləyərək, sülhlə müharibə, ənənəvi və amoral dəyərlər arasında prinsipial seçimlərini etdilər.
Bu seçkidə ciddi qanun pozuntusu qeydə alınmamışdı. Beynəlxalq təşkilatlar da parlament seçkilərinin demokratik şəraitdə baş tutduğunu açıqlamışdılar. Lakin seçkilərin başa çatmasından sonra Qərbdən gələn açıqlamalar bir daha göstərdi ki, onları maraqlandıran seçkilərin demokratik keçirilməsi yox, öz planları, yəni hakimiyyətə onların diktələrini yerinə yetirəcək qüvvələrin gətirilməsidir. Son olaraq Avropa Parlamentinin seçkilərin nəticələrini tanımaması Qərbin əsl niyyətini açıb göstərdi.
Seçki avantürası baş tutmayan Qərb indi təlimatlandırdığı partiyalar və QHT-lər vasitəsilə Gürcüstanla bağlı yeni planlarını işə salıb. Ölkədə siyasi proseslərin gedişi, xüsusilə Qərbdən idarə olunan müxalifətin əsassız şəkildə seçkilərin nəticələrinin ləğv olunması və yeni seçkilərin keçirilməsinə yönəlmiş fəaliyyəti aydın göstərir ki, Qərb Gürcüstanda rəngli inqilab ssenarisi planlaşdırıb və bunu həyata keçirməyə çalışır. Bunda məqsəd mövcud hakimiyyəti devirmək və Gürcüstanda qərbmeyilli, Qərbdən idarə olunan iqtidar komandası formalaşdırmaqdır.
Rəngli inqilablar xalqlara milli maraqların itirilməsindən və faciədən başqa heç nə gətirməyib
Gürcüstanın müxalifət partiyaları seçkilərdən dərhal sonra etiraz aksiyalarına başlasalar da, xalqdan geniş dəstək almadılar. Qərb də bunun fərqindədir. Ona görə son günlərdə vəzifəsində sayılı günləri qalan Gürcüstanın prezidenti Salome Zurabişvilini də aksiyalara cəlb etməklə nəticə əldə edəcəklərinə ümid edirlər. Lakin görünən odur ki, S.Zurabişvilinin də aksiyalarda iştirakı Qərbin məkrli planlarının reallaşmasını təmin etmir.
Ümumiyyətlə, Gürcüstandakı hadisələr göstərir ki, Qərbin indi burada həyata keçirmək istədiyi məkrli ssenari vaxtilə Ukrayna və Gürcüstanda reallaşdırılmış rəngli inqilab avantüralarının özünəməxsus formada təkrarını ehtiva edir. İllər öncə olduğu kimi, indi də Qərbin nəzarətində olan siyasi partiyaların, KİV-in, QHT-lərin, o cümlədən diplomatların Gürcüstanda sabitliyi pozmaq üçün xüsusi təlimatlandırıldıqları aydın görünür. Bu kimi planların reallaşdırılmasında USAID kimi təşkilatlar fəal iştirak edirlər. Eyni ssenarinin qarşıdan gələn dövrdə parlament seçkiləri keçiriləcək Serbiyada da təkrarlanması gözlənilir.
Qərbin bu ölkələrdə həyata keçirdiyi rəngli inqilablar isə onlara milli maraqlarının itirilməsindən və faciədən başqa heç nə gətirməyib. Məsələn, artıq yayılmış məlumatlar da təsdiq edir ki, Qərb Ukraynanın parçalanması ssenarisini gerçəkləşdirir. Neçə illərdir Ukrayna xalqına Qərb mərkəzlərinin verdiyi vədlər yerinə yetirilmir və bu ölkə sözün əsl mənasında həm iqtisadi, həm də insan resursları baxımından fəlakətli vəziyyətlə üzləşib.
Bütün bunların fonunda ortaya çıxan həqiqət odur ki, Qərb bu cür yollarla, milyonlarla insanın canı və qanı bahasına, habelə hibrid müharibələr vasitəsilə postsovet məkanında qaynar nöqtələr yaratmaq kimi iyrənc planını gerçəkləşdirməyə çalışır. Lakin indi 2000-ci illərin əvvəlləri deyil. Gürcüstan əhalisi də Qərbin və onun təəssübkeşlərinin əsl niyyətinin nədən ibarət olduğunu anlayır və buna ciddi müqavimət göstərir. Bu ölkənin vətəndaşları yaxşı anlayırlar ki, xarici təsirlərin sarsıdıcı nəticələrindən sığortalanmağın yeganə yolu regional birlikdən, xüsusilə Azərbaycanla əlaqələri daha da gücləndriməkdən keçir. Azərbaycan və gürcü xalqı bir yerdə olduqca və eyni hədəfə doğru irəlilədikcə regionu qeyri-sabitlik məkanına çevirmək cəhdləri heç bir nəticə verməyəcək.
Ermənistanda isə bu reallığı hələ də anlamırlar və ya anlamaq istəmirlər. Qeyd edək ki, Ermənistan hakimiyyəti Gürcüstanda keçirilən parlament seçkilərində müxalifətin qalib gələcəyinə, Qərbin planlarının reallaşacağına, ölkədə idarə olunan hakimiyyətin formalaşacağına ümid edirdi. Amma Qərbin Gürcüstanla bağlı ssenarilərinin pozulması Ermənistan hakimiyyətinin də arzularının üstündən xətt çəkdi. N.Paşinyan İrakli Kobaxidzeyə ünvanladığı lakonik təbrikdə də Ermənistan hakimiyyətinin ümidlərinin sarsıldığı aydın sezilirdi.
Ermənilər Qərbin Ukrayna ilə bağlı planının baş tutacağını düşünür, Ermənistan hakimiyyəti planlarını bu reallıqdan çıxış edərək qururdu. Ancaq son dövrlər Rusiya-Ukrayna cəbhəsində müşahidə olunan proseslər ermənilərin bu arzusunun da puça çıxdığını göstərir.
Bütövlükdə, Gürcüstanda baş verənlər artıq Qərbin son barıtından istifadə etməsinin ifadəsidir. Aksiyaların məzmunu, ölkə vətəndaşlarının reaksiyası göstərir ki, xalq bu siyasi avantüraya dəstək vermir. Çünki Gürcüstan xalqı bilir ki, Qərb siyasi dairələri prosesləri bu məcraya yönəltməklə ölkələrini uçuruma aparmaq istəyirlər.
Azərbaycan Respublikası Qərbin siyasi təhdid və təzyiqlərinin, qarayaxma kampaniyalarının qarşısından geri çəkilmədi. Avropa Parlamenti illər boyu ölkəmizə qarşı saysız-hesabsız qətnamələr qəbul etsə də, Azərbaycan öz müstəqil yolu ilə inamla addımladı. Enerji siyasətimizin təntənəsi, torpaqlarımızın işğaldan azad edilməsi və digər nailiyyətlərimiz bu siyasətin nəticələridir. Son olaraq COP29-un uğurla keçirilməsi Azərbaycanın müstəqil və qətiyyətli siyasətinin təntənəsinə çevrildi. Bölgə dövlətləri də Qərbin davamlı təxribatlarına qarşı mübarizədə Azərbaycan modelinə istinad edirlər.
Rəşad CƏFƏRLİ,
"Azərbaycan"
