Britaniya Tibbi Jurnalının (British Medical Journal) araşdırmasının nəticələri ortaya qoyub ki, insanlar ürək xəstəliyi və ya insult riskini əhəmiyyətli dərəcədə azaltmaq üçün çəkdikləri siqaretlərin miqdarını azaltmaq əvəzinə siqaretdən tamamilə imtina etməlidirlər. 141 ayrı elmi araşdırmanı nəzərdən keçirən alimlər bildiriblər ki, gündə bir dənə siqaret çəkənlərdə ürək xəstəliyi riski siqaret çəkməyənlərlə müqayisədə 50 faiz, insult riski isə 30 faiz daha yüksəkdir.
Siqaret çəkməyin ən riskli ölümcül nəticəsi xərcəng yox, ürək-damar xəstəlikləridir. Bu, siqaret çəkməkdən nəticələnən erkən ölümlərin 48 faizini təşkil edir.
Alimlər deyirlər ki, gündə bir ədəd siqaret çəkən kişilərdə ürək-damar xəstəliklərinin yaranması riski siqaret çəkməyən kişilərlə müqayisədə 48, insult keçirməyin riski isə 25 faiz daha yüksəkdir.
Qadınlar üçün isə eyni halda ürək-damar xəstəliklərinin yaranma riski 57, insult riskinin isə 31 faiz daha yüksək olduğu qeyd edilir.
Tədqiqatçılar bildirirlər ki, ağciyər xərçəngində olduğu kimi, digər xəstəliklərin riskinin də çəkilən siqaretlərin miqdarına uyğun olaraq proporsional şəkildə azalması gözlənilsə də, nəticələr bunun doğru olmadığını göstərir.
Bir neçə il siqaret çəkmək ömür boyu ürək-damar xəstəliklərinin yaranması riskini kəskin şəkildə artıra bilər. Məlum olub ki, nikotinə asılılıq insanları siqaret çəkməyə davam etdirir, lakin əsas ziyanı vuran siqaret tüstüsündəki qətrandır.
Mütəxəssislər onu da vurğulayırlar ki, siqareti tamamilə buraxanlar tezliklə sağlamlıqlarını bərpa edib ürək xəstəlikləri riskini azalda bilərlər.
Yasəmən MUSAYEVA,
“Azərbaycan”
