Bir çox ekspert və siyasətçi çoxtərəfliliyin böhranından bəhs etsə də, müharibələr və qarşıdurmalar diplomatiya və çoxtərəfli əməkdaşlığın zəruriliyini daha da aktuallaşdırıb.
AZƏRTAC xəbər verir ki, bu fikirləri Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev Şanxay Əməkdaşlıq Təşkilatına (ŞƏT) üzv ölkələrin Beyin Mərkəzlərinin Forumunun birinci günündə (2026 SCO Think Tank Forum) plenar sessiyada çıxışı zamanı səsləndirib.
ŞƏT-in regional və qlobal məsələlərin həllinə yönəlik koordinasiyalı platforma olmasına diqqət çəkən F. Şəfiyevin sözlərinə görə, qurum çərçivəsində çoxtərəfli əməkdaşlığın gücləndirilməsi və çevik qərarqəbuletmə mexanizmlərinin təkmilləşdiriməsinə ehtiyac var: “Təşkilatın genişlənməsi müəyyən çətinliklərlə müşayiət olunur, çünki konsensus əldə etmək getdikcə çətinləşir. Məsələn, Azərbaycanın tərəfdaş statusunu yüksəltmək istəyi bir üzv dövlət tərəfindən bloklanır.
Konsensus prinsipi üzv dövlətlərin bərabərliyini əks etdirdiyi üçün öz əhəmiyyətini qoruyur. Bununla yanaşı, təşkilat elə mexanizmlər formalaşdırmalıdır ki, hər hansı bir üzv dövlət çoxluğun dəstəklədiyi təşəbbüslərin həyata keçirilməsinə uzun müddət mane ola bilməsin. Təşkilat üzvlərinin sayı artdıqca milli maraqlardakı fərqlər səbəbindən qərarların qəbulunda çətinliklər və ləngimələr yarana bilər. Buna görə də, kompromisi təşviq edən, məsləhətləşmələri gücləndirən və dövlətlər arasında alternativ əməkdaşlıq imkanları yaradan prosedurların tətbiqi təşkilatın həm səmərəli fəaliyyət göstərməsinə, həm də inklüziv xarakterini qorumasına kömək edə bilər”.
BMTM sədri, həmçinin ŞƏT-in Qlobal Cənub ölkələrinə yönəlik yanaşmasının təşkilatın çoxtərəfli mexanizmlərinin daha səmərəli işləməsinə, Qlobal Cənub ölkələri üçün bərabər imkanların təmin olunmasına və region dövlətlərinin prioritetlərinin qorunmasına xidmət etməsinə də diqqət çəkib: “Qeyd etmək istərdim ki, ŞƏT-ə üzvlük Azərbaycanın balanslaşdırılmış və çoxvektorlu xarici siyasət prioritetlərinə uyğun gələn iqtisadi, siyasi, strateji imkanlar və üstünlüklər vəd edir,”- deyə Fərid Şəfiyev nitqini yekunlaşdırıb.
