"Ermənistan regionda sülhün tərəfdarıdırsa, Azərbaycanın haqlı şərtlərini yerinə yetirməlidir. Rəsmi İrəvan sözdə sülh tərəfdarı olduğunu bəyan etsə də, əməldə bunun əksini görürük, çünki bu istiqamətdə praktiki addımlar atmır".
Bu fikirləri "Azərbaycan" qəzetinə Milli Məclisin deputatı Sevinc Fətəliyeva deyib. Deputat bildirib ki, Prezident İlham Əliyev yerli televiziya kanallarına müsahibəsində sülh prosesi ilə bağlı mövcud mənzərəni şərh edib, dövlətimizin mövqeyini bir daha diqqətə çatdırıb. Bundan sonra Ermənistanın baş naziri sülh üçün hansısa "təklif"lərlə çıxış edib. Əslində, bütün bunlar erməni tərəfinin bu mövzuda spekulyasiyanı davam etdirməsidir. "İlk növbədə, Ermənistan ölkəmizə qarşı ərazi iddialarına son qoymalıdır, çünki bu ölkənin konstitusiyasında və digər hüquqi sənədlərdə ölkəmizə qarşı ərazi iddiaları hələ də qüvvədə qalır. Azərbaycan rəsmi səviyyədə bununla bağlı dəfələrlə xəbərdarlıq edib. Doğrudur, Ermənistanın hakimiyyət orqanları bu faktın guya Azərbaycana qarşı ərazi iddiası anlamına gəlmədiyini deyir. Lakin təkcə bir fakt - 1998-ci ildə Robert Köçəryanın Ermənistanın prezidenti seçilməsi üçün bu ölkənin parlamentinin "Dağlıq Qarabağın Ermənistana birləşdirilməsi" haqqında qəbul etdiyi sənədə istinad edilməsi rəsmi İrəvanın "əsaslandırmalarını" ifşa edir. Yəni belə sənədlərin qüvvədə qalması gələcəkdə Azərbaycana qarşı ərazi iddiası üçün istifadə oluna bilər. Ona görə də, Azərbaycanın bu şərti mütləq yerinə yetirilməlidir", - deyə o əlavə edib.
Deputatın sözlərinə görə, Ermənistan tərəfinin ATƏT-in Minsk qrupunun ləğvi ilə bağlı ortaya qoyduğu son yanaşma da suallar doğurur. Minsk qrupunun ləğvi üçün heç bir şərt ola bilməz, çünki faktiki olaraq 44 günlük Vətən müharibəsindən sonra belə bir təsisat fəaliyyət göstərmir. ATƏT-in Minsk qrupu üzərinə düşən vəzifəni yerinə yetirə bilmədi, ona verilmiş mandat əsasında münaqişənin həllinə nail olmadı. Minsk qrupuna həmsədr ölkələrin liderləri münaqişənin hərbi həllinin olmadığını iddia etsələr də, Azərbaycan bunu hərbi-siyasi vasitələrlə etdi. Prezident İlham Əliyevin qeyd etdiyi kimi, "Hərbi variant yoxdur" deyənlər sadəcə mövcud vəziyyəti olduğu kimi saxlamaq istəyirdilər. Ancaq status-kvo güc yolu ilə, Azərbaycan dövlətinin iradəsi, yürüdülən müdrik siyasət, xalqın əzmi, həmrəyliyi, bütün qüvvələrin səfərbər olunması, Azərbaycan əsgərinin şücaəti sayəsində dəyişdirildi.
S.Fətəliyeva qeyd edib ki, Minsk qrupunun həmsədrləri BMT Təhlükəsizlik Şurasının daimi üzvü olsalar da, Ermənistan qoşunlarının ölkəmizdən çıxarılmasını tələb edən 4 qətnamənin icrası üçün heç nə etməyiblər: "Beynəlxalq vasitəçi olan ölkələrin hər biri öz imkanlarından, potensialından istifadə edərək Ermənistana işğalda saxladığı əraziləri tərk etməsi üçün mesaj verə bilərdi, lakin bu addımı da atmadılar. Həmsədr dövlətlərin işğalçı Ermənistana ciddi təsir etmək imkanları var idi. Müəyyən sanksiyalar tətbiq olunsaydı, işğalçı qüvvələr geri çəkilməyə məcbur olardı, amma bunu etmədilər. Həmsədrlər vaxtaşırı bölgəyə səfər etməkdən, bir-birinin təkrarı olan bəyanatlar səsləndirməkdən başqa heç bir iş görmədilər. Ona görə də Azərbaycan xalqı haqlı olaraq Minsk qrupunun fəaliyyətindən daim narazı olub. Artıq bu məsələlər geridə qalıb, çünki Azərbaycan dövləti ərazi bütövlüyünü və suverenliyini bərpa edib. Belə olan halda Ermənistanın Minsk qrupu ilə bağlı hansısa spekulyasiyası qəbulolunmazdır".
Siyasətçi vurğulayıb ki, digər narahatedici məqam isə rəsmi İrəvanın hərbiləşmə siyasətini davam etdirməsidir. Məlumdur ki, Fransa Ermənistana silah tədarük edir. Eyni zamanda Hindistan da İrəvana müxtəlif növ silahlar satır. Təbii ki, Ermənistanın silahlandırılması regionda hərbi gərginliyin yaradılmasına xidmət edir. Hərbiləşmə siyasətini davam etdirməsi Ermənistanın Azərbaycana qarşı gizli gündəminin mövcud olduğunu nümayiş etdirir. Bütün bunların fonunda rəsmi İrəvanın həqiqətən sülh istəməsi inandırıcı görünmür. Amma Ermənistan anlamalıdır ki, regionda sabitliyi və sülhü təmin etməyin yeganə yolu qonşu ölkələrin suverenliyinin və ərazi bütövlüyünün tanınmasıdır. Eyni zamanda həmin şərtlərə əməl etməklə münasibətlər qurulmalı, bu istiqamətdə təhlükə yaradan çağırışlar aradan qaldırılmalıdır. Yəni Azərbaycanın bütün şərtləri yerinə yetirilməlidir. Rəsmi İrəvan həqiqətən sülhün tərəfdarıdırsa, əməli fəaliyyəti ilə bunu nümayiş etdirməlidir.
Əsmər QARDAŞXANOVA,
"Azərbaycan"
