Türkiyə hakimiyyəti ötən həftə ölkə məktəblərində baş vermiş iki atışma hadisəsindən sonra vətəndaşların silah saxlamasını məhdudlaşdıran əlavə hüquqi tədbirlər görəcək və qaydaları pozan silah sahibləri üçün cəzaları sərtləşdirəcək.
AZƏRTAC xəbər verir ki, bu barədə Türkiyə Prezidenti Rəcəb Tayyib Ərdoğan onun sədrliyi ilə keçirilən Nazirlər Kabinetinin iclasının yekunlarına dair söyləyib.
“Ölkədə məktəblərin təhlükəsizliyinin təmin edilməsi əsas prioritetimizdir. Bu məsələdə nə indi, nə də gələcəkdə heç bir güzəşt olmayacaq”, – deyə Türkiyə Prezidenti Rəcəb Tayyib Ərdoğan bildirib.
“Odlu silahın təhlükəsizliyinin və qorunmasının təmin edilməsi ilə bağlı öhdəliklərini yerinə yetirməyən sahiblər üçün cəzaları sərtləşdirəcəyik. Şəxsi silah almağı məhdudlaşdıran əlavə hüquqi normalar tətbiq edəcəyik”, – deyə dövlət başçısı vurğulayıb.
Prezident qeyd edib ki, aprelin 15-də Türkiyənin cənub-şərqində yerləşən Kahramanmaraş vilayətində məktəbdə baş verən hadisə nəticəsində 9 nəfər həyatını itirib, 21 nəfər yaralanıb. Bir gün əvvəl, yəni aprelin 14-də isə eyni bölgədə yerləşən Şanlıurfa vilayətindəki məktəbdə 19 nəfər xəsarət alıb.
“Biz sosial şəbəkələrdə və rəqəmsal platformalarda yalan və zərərli məlumat yayan hesablarla bağlı lazımi addımlar atmışıq”, – deyə Türkiyə Prezidenti qeyd edib.
Ərdoğan əlavə edib ki, hakimiyyət “virtual patrul” xidmətini gücləndirməyi və kibertəhlükəsizlik sahəsində hüquq-mühafizə orqanlarının imkanlarını artırmağı planlaşdırır. Onun sözlərinə görə, məktəblərlə hüquq-mühafizə orqanları arasında əməkdaşlıq da genişləndiriləcək və bu sahədə yeni iş mexanizmləri hazırlanacaq.
