Azərbaycanın son illərdə yürütdüyü xarici siyasət kursu onu təkcə regionda deyil, daha geniş coğrafiyada sabitlik yaradan əsas aktorlardan birinə çevirib. Prezident İlham Əliyevin Ermənistanın Baş naziri Nikol Paşinyanla Əbu-Dabidə baş tutan görüşü bu strategiyanın ardıcıl və məqsədyönlü şəkildə davam etdirildiyini bir daha nümayiş etdirdi.
Bu fikirləri mətbuata açıqlamasında Milli Məclisin deputatı Müşfiq Məmmədli deyib. Deputatın sözlərinə görə, birbaşa dialoq tərəflərə sülh prosesini dinamik şəkildə irəli aparmaq üçün imkanlar yaradır. “Əbu-Dabi görüşündə tərəflərin ABŞ Prezidenti Donald Trampın ev sahibliyi və şahidliyi ilə baş tutan Vaşinqton Sülh Sammitinin nəticələrinin icrasındakı irəliləyişi alqışlaması isə əldə olunmuş razılaşmaların real icra mərhələsinə keçdiyini təsdiqləyir. Bu yanaşma regional proseslərdə vasitəçilərin rolunu azaltmaqla, sahiblik prinsipini ön plana çıxarır və sülhün dayanıqlığını artırır”, - o vurğulayıb.
Deputat əlavə edib ki, danışıqlarda xüsusi vurğulanan məqamlardan biri sülhün artıq real iqtisadi faydalara çevrilməsidir: “İkitərəfli ticarətin başlanması, Azərbaycandan Ermənistana neft məhsullarının ixracı, eləcə də üçüncü ölkələrdən Ermənistana taxıl və digər yüklərin Azərbaycan ərazisi vasitəsilə tranziti sülhə xidmət edən faktorlardır. Bu, klassik təhlükəsizlik modellərindən fərqli olaraq, iqtisadi inteqrasiya üzərindən sülhün möhkəmləndirilməsi strategiyasının tətbiq olunduğunu sübut edir. Tərəflər sülhün faydalarını cəmiyyət səviyyəsində hiss etdikcə, münaqişəyə qayıdış ehtimalı da azalır”.
Müşfiq Məmmədlinin sözlərinə görə, ikitərəfli əlaqələrin yaranması tərəflər arasında etimad mühitinin formalaşmasında müstəsa rol malikdir: “Əbu-Dabi görüşündə vətəndaş cəmiyyəti nümayəndələrinin qarşılıqlı səfərlərinin alqışlanması və etimad quruculuğu tədbirlərinin genişləndirilməsi məsələsi xüsusi yer tutub. Bu, sülhün təkcə siyasi elitalar arasında deyil, cəmiyyətlər arasında da legitimləşdirilməsi məqsədi daşıyır. Uzunmüddətli sülh yalnız sənədlərlə deyil, insanların gündəlik həyatında yaranan yeni münasibətlər üzərindən dayanıqlı ola bilər. Prezident İlham Əliyev və Baş nazir Nikol Paşinyan arasında TRIPP və digər bağlantı layihələrinin müzakirəsi sülh prosesinin geoiqtisadi ölçüsünü ön plana çıxarır. Bu layihələr Cənubi Qafqazı regional nəqliyyat-logistika qovşağına, Avropa–Asiya xəttində strateji körpüyə, enerji və ticarət marşrutlarının təhlükəsiz tranzit zonasına çevirmə potensialına malikdir. Bu kontekstdə Azərbaycan təşəbbüskar və aparıcı rol oynayaraq, regiondakı lider statusunu daha da möhkəmləndirir. Əbu-Dabi görüşü göstərir ki, Azərbaycan artıq yalnız münaqişədən çıxmış ölkə deyil, münaqişə sonrası nizamı formalaşdıran aktordur. Bakı həm siyasi dialoqu təşviq edir, həm iqtisadi mexanizmlər yaradır, həm də etimad quruculuğu proseslərinə liderlik edir”.
Deputat əlavə edib ki, bu yanaşma Azərbaycanın etibarlı tərəfdaş, əməkdaşlığa töhfə verən ölkə kimi imicini möhkəmləndirir. “Əbu-Dabi görüşünün nəticələri onu deməyə əsas verir ki, Azərbaycan–Ermənistan normallaşma prosesi artıq geri dönməz mərhələyə qədəm qoyub. Tərəflərin dialoqu davam etdirmək əzmi yekun sülh sazişinin uzaq olmayan perspektiv olduğunu göstərir. Bu proses bir daha sübut edir ki, Bakı Cənubi Qafqazda sülhün, sabitliyin və əməkdaşlığın əsas memarlarından biri kimi çıxış edir və regionun gələcək siyasi arxitekturasını formalaşdırmaqda davam edir” -deyə Müşfiq Məmmədli bildirib.
“Azərbaycan”
jpg_1770213306.jpg)
