Xəzər dənizinin Azərbaycan sektorunda yerləşən “Azəri-Çıraq-Günəşli” (AÇG) yataqlar blokunun “Dərinsulu Günəşli” platformasından indiyədək təqribən 638 milyon barel neft, 18,2 milyard kubmetr qaz hasil edilib.

SOCAR-dan AZƏRTAC-a bildirilib ki, ötən ilin sonunadək gündəlik hasilat orta hesabla 67 min 300 barel təşkil edib.

Qeyd edək ki, “Əsrin müqaviləsi” çərçivəsində AÇG yatağının işlənməsinin 3-cü fazası olan “Dərinsulu Günəşli” platforması 2008-ci il aprelin 22-də istismara verilib. “Dərinsulu Günəşli” kompleksi “Günəşli” yatağının şərqində, suyun dərinliyinin 175 metr olduğu ərazidə yerləşir. Hasil edilən məhsul bu kompleksi “Azəri” yatağında yerləşən əvvəlcədən quraşdırılmış sualtı boru kəmərləri şəbəkəsinə birləşdirən 30 düymlük iki neft kəməri və 28 düymlük tək qaz kəməri ilə qurudakı Səngəçal terminalına nəql edilir.

Bundan əlavə, AÇG layihəsinin qalan hissəsindən fərqli olaraq “Dərinsulu Günəşli” işlənməsində üç sualtı suvurma quyusu quraşdırılıb. “Bakı-Tbilisi-Ceyhan” əsas ixrac boru kəmərinə vurulan AÇG neftində “Dərinsulu Günəşli”nin böyük rolu var.

“Azəri-Çıraq-Günəşli” Xəzərin Azərbaycan sektorundakı ən iri neft yatağıdır. Ötən il AÇG yataqlar blokundan hasilat 133 milyon barel, yəni 18 milyon ton təşkil edib. AÇG-dən ümumi hasilat gündəlik orta hesabla 363 min barel olub. İl sonunda AÇG-də ümumilikdə 137 neft hasilat quyusu, 45 su injektor quyusu və 8 qaz injektor quyusu istismarda olub. Keçən il AÇG-də 8 neft hasilatı, 6 su injektoru və 1 qaz injektoru quyusu tamamlanıb.

Azərbaycan Respublikası Dövlət Neft Fondu (ARDNF) AÇG yatağından cari ilin əvvəlindən aprelin 1-i tarixinə 1 milyard 447,8 milyon dollar gəlir əldə edib.

AÇG-də tərəfdaşların yeni iştirak payları bu nisbətdədir: BP - 30,37 faiz, “AzAÇG” (SOCAR) - 25 faiz, “MOL Group”- 9,57 faiz, “Inpex” - 9,31 faiz, “Equinor” - 7,27 faiz, “ExxonMobil” - 6,79 faiz, “TPAO” - 5,73 faiz, “Itochu” - 3,65 faiz və “ONGC Videsh Limited” (OVL) - 2,31 faiz.