Azərbaycanın COP29 sədrliyindən əldə etdiyi təcrübə COP30-un səmərəli təşkili üçün də önəmli dəstək olacaq. Bakı ilə Braziliya arasında ikitərəfli münasibətlər getdikcə daha da möhkəmlənir və iqlim gündəliyində qarşılıqlı maraqlar ölkələr arasında tərəfdaşlığı gücləndirir. Azərbaycanın davamlılıq sahəsində təşəbbüsləri Braziliya üçün də ilham mənbəyi kimi dəyərləndirilir. Bu baxımdan COP29 və COP30-un ardıcıl keçirilməsi iki ölkə arasında yeni əməkdaşlıq imkanları açır.
Bu fikirləri AZƏRTAC-a müsahibəsində Braziliya Kiçik və Mikrobiznesə Dəstək Xidmətinin (SEBRAE) Alaqoas ştatındakı regional ofisinin direktoru və ölkədəki bütün analoji regional nümayəndəliklər assosiasiyasının vitse-prezidenti, Braziliyanın sabiq turizm naziri Vinisius Nobre Lajes səsləndirib.
O, Azərbaycanın COP29-a ev sahibliyi və sədrliyi ilə bağlı fəaliyyətini yüksək qiymətləndirib. Bildirib ki, Azərbaycanın qlobal iqlim proseslərində fəal iştirakı xüsusilə də inkişaf etməkdə olan ölkələr və Latın Amerikası dövlətləri ilə əməkdaşlıq baxımından böyük əhəmiyyət daşıyır.
Bakı İqlim Fəaliyyəti Həftəsi çərçivəsində “Dayanıqlı Expo: Planet üçün incəsənət və innovasiya” tədbirinin keçirilməsinin xüsusi önəmini vurğulayan Vinisius Nobre Lajes incəsənət və innovasiyanın vəhdətini əks etdirən sərginin hər kəs tərəfindən maraqla qarşılandığını xüsusi qeyd edib. “Mənim üçün çox xoş oldu ki, bu sərgidə incəsənət, innovasiya, gənclik və qadın sahibkarların bir araya gəldiyini gördüm. Onlarla tələbə ilə söhbət etdim. Onlar iqlim böhranına cavab tapmaq, kənd təsərrüfatında, hidroenerjidə, qida və səhiyyə sahəsində emissiyaları azaltmaq üçün həll yolları təklif edirdilər. Yanaşmaları və təqdim etdikləri innovativ həllər məni, həqiqətən, çox təsirləndirdi. Ən diqqətçəkən məqamlardan biri də bu idi ki, iştirakçıların əksəriyyəti qadınlar idi – kimya mühəndisləri, elektrotexnika, aqrar və mülki mühəndislik sahəsində təhsil alan gənc mütəxəssislər. Bu, gələcəyin böyük potensialını göstərir. Eyni zamanda, sərgidə incəsənəti də görmək çox vacibdir. Çünki incəsənət insan yaradıcılığının güzgüsüdür və ətraf mühit mövzusunda yeni baxış bucağı formalaşdırmağa imkan yaradır”, - deyə o vurğulayıb.
Bakı İqlim Fəaliyyəti Həftəsinin iqlim təşəbbüslərinin genişləndirilməsi, hökumətlər, bizneslər və elmi icma arasında əməkdaşlığı əks etdirdiyini bildirən ekspert deyib: “Burada ölkənin iqlim dəyişikliyi ilə bağlı göstərdiyi liderliyi, atdığı addımları görmək olduqca sevindiricidir. COP29 Sədrliyi – Muxtar Babayev, Nigar Arpadarai, Leyla Həsənova və digər rəsmilərin iştirakı ilə aparılan müzakirələr çox mühüm idi. Azərbaycan bu tədbirlər vasitəsilə həm daxildə, həm də beynəlxalq müstəvidə ciddi öhdəliklər götürdüyünü nümayiş etdirir”.
COP30 barədə məlumat verən Vinisius Nobre Lajes vurğulayıb ki, Braziliya üçün bu, böyük sınaq olacaq. “COP29-da əldə edilən nəticələr, xüsusilə maliyyə məsələləri, tullantıların idarəolunması, karbon emissiyalarının azaldılması və danışıqlarda əldə edilən razılaşmalar bizim üçün çox yüksək plan müəyyən edir. COP30 isə Braziliyanın son illərdə ilk dəfə belə bir ekoloji tədbirə ev sahibliyi etməsi baxımından əlamətdardır. Bu, bizim üçün dünyaya kənd təsərrüfatı, enerji, mədənçilik kimi sahələrdə dayanıqlı inkişaf istiqamətində gördüyümüz işləri göstərmək imkanı olacaq. “SEBRAE” təşkilatı olaraq, biz də Azərbaycan ilə əməkdaşlıqda maraqlıyıq. Dünən “AZPROMO” ilə görüşümüz oldu və iki bazarı inteqrasiya etmək imkanlarını müzakirə etdik. COP30 təkcə razılaşmaların əldə olunacağı tədbir deyil, həm də gələcəyə doğru atılacaq yolun başlanğıcıdır”, - deyə o diqqətə çatdırıb.
jpg_1759517860.jpg)
