Avropa ölkələri Azərbaycanla münasibətlərdə strateji tərəfdaşlığı genişləndirmək istiqamətində əməli addımlar atır. Mərkəzi Avropa ölkələrindən biri – Slovakiya da Azərbaycanla əlaqələri inkişaf etdirmək niyyətindədir. Prezident İlham Əliyevin bu ölkəyə ilk rəsmi səfəri zamanı effektiv müzakirələr aparıldı.
Bu barədə qəzetimizə açıqlamasında Milli Məclisin deputatı Nigar Məmmədova bildirib. Onun sözlərinə görə, ölkələrimiz ötən il Strateji Tərəfdaşlığın Qurulması haqqında Birgə Bəyannamə imzalayıb ki, bu da münasibətləri yeni səviyyəyə qaldırıb: “Prezident İlham Əliyevin də söylədiyi kimi: “Strateji Tərəfdaşlıq Bəyannaməsində əks olunan maddələr əməkdaşlığın perspektivlərini də müəyyən edir”. Rəsmi Bakı və Bratislava arasında əməkdaşlıq regionun sabitliyinə, investisiya qoyulmasının inkişafına yönəlib. Ötən il Slovakiya Prezidenti Azərbaycanın evsahibliyi etdiyi COP29-a qatılıb və bu çərçivədə ikitərəfli münasibətlərin müxtəlif istiqamətləri ətrafında müzakirələr aparılıb”.
Nigar Məmmədova qeyd edib ki, Slovakiya dövlət başçısı Peter Pelleqrin də cənab Prezident İlahm Əliyevlə görüşdə ölkəsinin Azərbaycanı yerləşdiyi regionda strateji əhəmiyyətə malik tərəfdaş hesab etdiyini bildirib, Asiya və Avropanın kəsişməsində yerləşən Azərbaycanın zəngin enerji resurslarına malik olduğunu vurğulayıb.
“Azərbaycan–Slovakiya münasibətləri həm də Aİ ilə əməkdaşlıq kontekstində vacibdir. Nəzərə alsaq ki, Azərbaycanın strateji tərəfdaş kimi Aİ üçün əhəmiyyəti ilbəil artır, onda Slovakiya ilə ikitərəfli əməkdaşlıq bu prosesə əlavə töhfə verə bilər. Ötən il ilk dəfə olaraq Azərbaycan qazı Slovakiyaya çatıb. Dövlət başçımız bildirib ki, Slovakiyanın ehtiyacları olan səviyyədə, istənilən həcmdə Azərbaycan onun enerji resurslarını təmin edə bilər. Prezident İlham Əliyev qeyd edib ki, artıq 14 ölkəyə qaz ixrac edən Azərbaycan yeni qaz yataqlarının işlənməsi nəticəsində əlavə resurslar əldə edəcək ki, bununla da Slovakiya və onun qonşularına qaz təchizatı daha böyük həcmdə mümkün olacaq”, - deyə o bildirib.
Deputat vurğulayıb ki, Slovakiya həm də müstəqil xarici siyasət aparan dövlətdir. Bu faktor da Bakı ilə Bratislavanın ortaq cəhətlərindəndir: “Təsadüfi deyil ki, bu ölkənin baş naziri Robert Fitso ötən il Azərbaycana səfəri zamanı cənab Prezidenti “suveren xarici siyasətin tərəfdarı, beynəlxalq hüququ müdafiə edən, praqmatik şəxsiyyət” adlandırmışdı. O, bu kontekstdə Aİ-nin bəzi hallarda digərlərinə təlimat verməsinə eyham vuraraq ölkəsinin heç vaxt heç bir dövlətin daxili işlərinə qarışmadığını bəyan etmişdi. Azərbaycan üçün də dövlətlərin daxili işlərinə qarışmamaq ən əsas prinsiplərdən biridir. Rəsmi Bratislava Azərbaycanla Avropa İttifaqı arasında körpü olmağa hazırdır və Azərbaycandakı obyektiv vəziyyəti Avropa İttifaqında təqdim etmək niyyətindədir”.
N.Məmmədovanın sözlərinə görə, tərəflərin marağında olan əsas əməkdaşlıq sahələrindən biri də müdafiə sənayesi sahəsidir. Özüyeriyən artilleriya qurğuları, sursat və digər məhsullar sahəsində böyük təcrübəyə malik olan Slovakiya ilə Azərbaycan üçün texnologiya ötürülməsi və birgə istehsalın üzərində işləmək, birlikdə istehsal edilən məhsulları üçüncü ölkələrə satmaq əsas prioritetlərdən biridir. İşğaldan azad olunmuş ərazilərin bərpasında iştirak edən şirkətlər arasında Slovakiya da var. Slovakiya şirkəti Qarabağda “ağıllı kənd” inşasında öz təcrübəsini bölüşür.
Deputat hesab edir ki, cənab Prezidentin Slovakiyaya rəsmi səfəri iki ölkə arasında əməkdaşlıqda yeni, mühüm bir mərhələnin başlanğıcı olacaq.
“Azərbaycan”
19 (1)jpg_1771885865.jpg)
