Azərbaycan Qiymətləndiricilər Cəmiyyətinin (AQC) İdarə Heyətinin üzvləri, ictimaiyyət nümayəndələri və media mənsublarının iştirakı ilə qurumun yenilənmiş “aqc.az” internet saytının rəsmi təqdimat mərasimi keçirilib.
AZƏRTAC xəbər verir ki, tədbiri giriş sözü ilə açan AQC sədri Vüqar Oruc rəqəmsallaşma dövründə qiymətləndirmə sektorunda şəffaflığın təmin edilməsində texnoloji yeniliklərin rolunu vurğulayıb. O bildirib ki, yeni platforma cəmiyyətin fəaliyyətinin beynəlxalq standartlara inteqrasiyası və ictimaiyyət üçün daha əlçatan olması baxımından mühüm əhəmiyyət daşıyır.
“Əsas məqsədimiz peşəkar qiymətləndiricilər, eləcə də dövlət və özəl sektor nümayəndələri üçün vahid, etibarlı və operativ məlumat mənbəyi formalaşdırmaqdır. Yeni sayt bu sahədə mövcud dağınıqlığın aradan qaldırılmasına və peşəkar fəaliyyətin monitorinqinə töhfə verəcək”, – deyə V.Oruc qeyd edib.
Sonra AQC-nin İctimaiyyətlə əlaqələr departamentinin rəhbəri Orxan Əli yenilənmiş platformanın funksional imkanları barədə ətraflı təqdimatla çıxış edib. O bildirib ki, sayt həm peşəkar qiymətləndiricilər, həm də vətəndaşlar üçün nəzərdə tutulub və istifadəçilərə daha rahat interfeys, sadələşdirilmiş keçidlər və geniş məlumat bazası təqdim edir. Yeni platformada tətbiq olunan yeniliklər sahə üzrə fəaliyyət göstərən şəxslər üçün məlumatlara çıxışı asanlaşdırmaqla yanaşı, xidmətlərin daha operativ şəkildə əldə olunmasına şərait yaradır.
Tədbirin sonunda media nümayəndələrinin sualları cavablandırılıb, saytın gələcək inkişaf mərhələləri, o cümlədən beynəlxalq platformalarla inteqrasiya imkanları ətrafında fikir mübadiləsi aparılıb.
