Delimitasiya və demarkasiya sülhə gedən yolda bir  prosesdir

"Azərbaycan və Ermənistan arasında sərhədin delimitasiyasına başlanılması müsbət bir hadisədir. Tərəflərin vasitəçisiz bu işi həyata keçirmələri bir daha göstərir ki, xoş niyyət olacağı təqdirdə prosesi uğurla yekunlaşdırmaq mümkündür".
Milli Məclisin Elm və təhsil komitəsinin sədr müavini Musa Qasımlı "Azərbaycan" qəzetinə açıqlamasında bildirib ki, Azərbaycan Ermənistanla qətiyyən müharibə aparmaq istəmir, dövlətin və millətin əsas diqqəti işğaldan azad edilmiş ərazilərin dirçəldilməsinə, infrastrukturun yaradılmasına və sakinlərin dədə-baba torpaqlarına qaytarılmasına yönəlib. Eyni zamanda Azərbaycan dövləti bütün qonşuları ilə normal münasibətlər saxlayır və Ermənistanla da belə əlaqələrin olmasında maraqlıdır. Xalqımıza ermənilərlə düşmənçilik etmək lazım deyil. 
Komitə sədrinin müavini qeyd edib ki, sərhədlərin delimitasiya və demarkasiyası sülhə gedən yolda bir  prosesdir. Ola bilər ki, tərəflər bir konfransa toplaşarlar və orada sülh sazişi imzalayarlar. "Beləliklə, həmin konfransın gedişində yaradılmış bir neçə komissiya sərhədlərin delimitasiyasını həyata keçirər, bu məsələləri yerində icra edər. Digər bir yol ondan ibarətdir ki, tərəflər sülh və ya çərçivə sülh sazişi imzalaya bilərlər. Delimitasiya və demarkasiya prosesi uzun zaman apara bilər. Buna dair çoxlu təcrübələr var. Amma ən yaxşı yol odur ki, tərəflər konfransda qarşılıqlı məsələləri müzakirə etsinlər. Konfrans davam edərkən yaradılmış bir neçə komissiya sərhədləri müəyyənləşdirir və gəlib məruzə edirlər. Həm komissiya üzvləri, həm də yekunda bütövlükdə tərəflər sərhədlərin delimitasiyasına dair razılığı imzalayırlar. Məsələ bununla da bitər. Hər şey Ermənistan tərəfindən asılıdır", - deyə o əlavə edib.
Müsahibim bildirib ki, etnoqrafik sərhədləri müəyyənləşdirmək həmişə çətin olub. Təsadüfi amillərlə sərhədləri müəyyənləşdirmək olmaz. Azərbaycanın Ermənistana heç bir ərazi iddiası olmadığını deyən Musa Qasımlı xatırladıb ki, bunu Prezident İlham Əliyev dəfələrlə bildirib: "Ən yaxşı yol sürətli şəkildə sülh sazişinin imzalanması, eyni zamanda delimitasiya və demarkasiyanın həyata keçirilməsidir. Ermənistanın reallığı qəbul etməsi gərəkdir. Yolların bağlı qalması Ermənistana nə fayda verir? Onlar düşünməlidirlər ki, 1988-ci ildən bəri Azərbaycana qarşı düşmənçilik edərək nə əldə ediblər? Mehriban qonşuluq ən yaxşı yoldur. Ermənistan nəhayət Azərbaycanla mehriban qonşu olmalıdır".
Musa Qasımlı hesab edir ki, proses belə davam edərsə, çərçivə sülh sazişinin imzalanması imkanları çoxdur.

Əsmər QARDAŞXANOVA,
"Azərbaycan"