Norveçdə illik maksimum qar örtüyünün sürətlə azalması Avropanın enerji bazarında ciddi narahatlıq yaradıb. Alimlər xəbərdarlıq edirlər ki, bu tendensiya hidroelektrik istehsalında 20 teravat-saatlıq kəsirə və nəticədə elektrik enerjisinin qiymətinin artmasına səbəb ola bilər.
Anadolu Agentliyi xəbər verir ki, Norveç İqlim Xidmətləri Mərkəzinin hesabatına görə, ölkədə xizəkçilik dövrü artıq 4-7 həftə qısalıb. Norveç Avropanın hidroelektrik anbar tutumunun yarısına sahibdir. Yazda əriyən qar suları ilboyu və qış aylarında elektrik istehsalı üçün əsas mənbə rolunu oynayır. Qar az olduqda, su anbarları kifayət qədər dolmur, bu da istehsalçıları su ehtiyatına qənaət etməyə və istehsalı azaltmağa məcbur edir.
Norveç Su Resursları və Enerji Mərkəzinin tədqiqatçısı Tuomo Saloranta bildirib ki, hazırda qar ehtiyatındakı çatışmazlıq son 20 ilin ən aşağı səviyyələrindən birindədir. Bu kəsir normal vəziyyətlə müqayisədə 20 teravat-saatlıq enerji itkisi deməkdir. Dağlıq ərazilərdə hələ qar yağsa da, dəniz səviyyəsindən 1000 metr aşağı olan bölgələrdə kəskin azalma müşahidə olunur.
Norveç Avropanın ən böyük enerji ixracatçılarından biridir. Mütəxəssis Lars Eirik Eilifsenin fikrincə, digər faktorlar sabit qalsa, Norveçdən enerji ixracının azalması birbaşa Avropada qiymətlərin yüksəlməsinə təkan verəcək. Norveç sistemi bu cür dalğalanmaları idarə etmək üçün minlərlə su anbarına sahib olsa da, qlobal istiləşmənin təsirləri qonşu ölkələrdən enerji idxalını zəruri edə bilər.
Enerji qiymətlərinə, həmçinin təbii qazın qiyməti, bərpa olunan enerjinin payı və siyasi vəziyyət kimi digər amillər təsir göstərsə də, “ağ qızıl” sayılan qarın azalması risk olaraq qalır.
Təhminə VERDİYEVA,
“Azərbaycan”
