Dünyada baş verən mürəkkəb proseslər və təhlükəsizlik problemlərinə baxmayaraq, Azərbaycanda sabitliyin və sosial rifahın qorunması mühüm amildir.
AZƏRTAC xəbər verir ki, bu sözləri Ailə, Qadın və Uşaq Problemləri üzrə Dövlət Komitəsinin sədri Bahar Muradova Birləşmiş Millətlər Təşkilatının Azərbaycandakı nümayəndəliyinin rezident-əlaqələndiricisi Vladanka Andreeva ilə görüşdə bildirib.
Müxtəlif formatlarda birgə əməkdaşlıq çərçivəsində həyata keçirilən bir sıra layihə və proqramların uğurlu nəticələrindən məmnunluğunu ifadə edən komitə sədri Azərbaycanda iqlim dəyişiklikləri və iqtisadi inkişaf sahələrində davamlı fəaliyyətə, eləcə də bu proseslərdə qadınların fəal iştirakına xüsusi önəm verildiyini vurğulayıb. Həmçinin işğaldan azad olunan ərazilərdə yaradılan şərait və görülən bərpa işlərinin mühüm əhəmiyyəti qeyd edilib.
Bahar Muradova hazırda qadın sahibkarlar təşkilatları ilə əməkdaşlığın genişləndirildiyini bildirib, bu təşkilatların ölkə daxilində, eləcə də türk və İslam ölkələri çərçivəsində şəbəkələrinin formalaşdırılmasının əhəmiyyətini vurğulayıb.
Söhbət zamanı 25 Noyabr - Qadınlara Qarşı Zorakılıqla Beynəlxalq Mübarizə Günü ilə bağlı “Gender əsaslı zorakılığa qarşı 16 günlük fəallıq” kampaniyası çərçivəsində həyata keçiriləcək tədbirlərdə BMT qurumları ilə birgə fəaliyyətin əhəmiyyətinə də toxunulub.
Azərbaycan Hökuməti ilə BMT arasında imzalanan 2026-2030-cu illər üçün Dayanıqlı İnkişaf üzrə Əməkdaşlığa dair Çərçivə Sənədinə diqqətçəkən Vladanka Andreeva sənədin qarşıdakı beş il üçün tərəfdaşlığın strateji istiqamətlərini müəyyənləşdirdiyini qeyd edib. O, Çərçivə Sənədinin icrası çərçivəsində ailə, qadın və uşaq hüquqları sahəsində Dövlət Komitəsi ilə əməkdaşlığın xüsusi önəm daşıdığını vurğulayıb.
Görüşdə, eyni zamanda, qadınların səlahiyyətləndirilməsi, habelə onların dayanıqlı inkişaf, iqtisadi artım, sülh və təhlükəsizlik məsələləri, digər sahələrdəki önəmli rolu barədə danışılıb.
Həmçinin ikitərəfli əməkdaşlığın perspektivləri, həmçinin qarşıdakı dövr üçün mühüm istiqamətlər haqqında faydalı fikir mübadiləsi ilə davam edib.
jpg_1763047655.jpg)
jpg_1773139677.jpg)
