Donald Tramp: “Mənə ABŞ Prezidentini tənqid edən bir Papa lazım deyil..."
Afrika turnesi zamanı Kameruna səfər edən Roma Papası XIV Leo “istismar və müharibə yolu ilə dünyanı viran etmək üçün milyardlarla pul xərcləyən bir ovuc tiranı" sərt şəkildə qınayıb. O, Bamendadakı Müqəddəs Yusif Katedralında çıxış edərkən bildirib: "Sülhməramlılar mübarəkdir, amma dini və Tanrının adını öz hərbi, iqtisadi və siyasi mənfəətləri üçün manipulyasiya edənlərin, müqəddəsliyi qaranlığa və iyrəncliyə qərq edənlərin vay halına. Bu, alt-üst olmuş bir dünyadır, Tanrının yaratdıqlarının istismarıdır və hər bir dürüst və vicdanlı insan bunu qınamalı və rədd etməlidir."
Bu günlərdə dünya sülhü üçün dua ayini zamanı Müqəddəs Taxt-taca sahib olan ilk amerikalı XIV Leo müharibə edən ölkələrin liderlərini "yenidən silahlanmanın planlaşdırıldığı və ölümcül hərəkətlərin qərarlaşdırıldığı bir masa arxasında deyil", dayanıb danışıqlar masasına oturmağa çağırıb. “Kilsə həmişə sülhə çağıracaq, hətta müharibə məntiqindən imtina etmək anlaşılmazlığa və hörmətsizliyə səbəb ola bilsə belə və həmişə hər hansı bir insan hakimiyyətinə deyil, Allaha itaət etməyi aşılayacaq”, deyə Papa vurğulayıb.
Bu çağırışa cavab olaraq ABŞ Prezidenti Donald Tramp pontifiki xarici siyasətdə "dəhşətli" adlandırıb və Truth Social platformasında bəyan edib: " İranın nüvə silahına sahib olmasının normal olduğunu düşünən bir Papaya ehtiyacım yoxdur. Amerikanın ABŞ-yə külli miqdarda narkotik göndərən və daha da pisi, həbsxanalarından məhbusları, o cümlədən qatilləri, narkotik satıcılarını və cinayətkarları ölkəmizə göndərən bir ölkə olan Venesuelaya hücum etməsinin dəhşətli olduğunu düşünən bir Papaya ehtiyacım yoxdur. Mənə ABŞ Prezidentini tənqid edən bir Papa lazım deyil, çünki mən məhz seçildiyim işi görürəm".
Tramp hesab edir ki, Papa XIV Leo ona "minnətdar" olmalıdır, çünki yalnız amerikalı olduğuna görə o, pontifik seçilib...
Roma Katolik Kilsəsinin rəhbəri öz növbəsində Vatikanın sülh və barışıq çağırışlarının İncilə əsaslandığını və hazırkı ABŞ administrasiyasından qorxmadığını izah edib. Papa vurğulayıb ki, onun sülhə ümumi çağırışı və "hər şeyə qadirlik illüziyası"nı tənqid etməsi Trampa və ya başqasına birbaşa hücum deyil.
Bu arada ABŞ-nin vitse-prezidenti Cey Di Vens Fox News-a verdiyi müsahibədə Prezident Donald Tramp və Papa XIV Leo arasında virtual debat barədə şərh verib: "Əlbəttə, düşünürəm ki, bəzi hallarda Vatikanın mənəvi məsələlərə toxunması daha yaxşıdır. Katolik kilsəsində baş verənləri müzakirə etsələr daha yaxşı olar. Həm də Amerika Birləşmiş Ştatları Prezidentinin Amerika siyasətini müəyyən etməsinə imkan versinlər."
ABŞ vitse-prezidenti əlavə edib ki, Vaşinqton və Müqəddəs Taxt-tac arasındakı münaqişədən "çox da narahat deyil".
Xatırladaq ki, Vens 2019-cu ildə katolikliyi qəbul edərək, katolik inancının həqiqətinə əmin olduğunu bildirib. Papa XIV Leo (əsl adı Robert Frensis Prevost) 2025-ci ilin may ayında vəzifəyə başlayaraq Vatikanda Müqəddəs Taxt-tacı tutan ilk amerikalıdır.
Bu arada İtaliyanın Baş naziri Corca Meloni XIV Leonu dəstəkləyərək deyib: "Düzünü desəm, dini liderlərin siyasi liderlərin dediklərini etdiyi bir cəmiyyətdə özümü çox rahat hiss etməzdim." Daha sonra Tramp Melonini sərt şəkildə tənqid edib, halbuki əvvəllər dəfələrlə İtaliya baş naziri haqqında tərifli danışmışdı.
İran parlamentinin sədri Məhəmməd Bağır Qalibaf papanın "qorxmaz mövqeyini" tərifləyib və XIV Leonun liderliyinin "milyonlarla insana ilham verdiyini" bildirib. "Bu işıq üçün təşəkkür edirəm!" - Qalibaf sosial mediada X yazıb.
Papa Leo XIV Afrikaya 11 günlük turneyə çıxıb. Onun ilk dayanacağı 48 milyon əhalisi və cəmi 9 min katolikin qeydə alındığı Əlcəzair olub. Orada Papa Katolik kilsəsinin qurucularından biri olan Müqəddəs Avqustinin təbliğ etdiyi qədim Hippo şəhərinin xarabalıqlarını ziyarət edib.
Əlcəzair və Kamerundan sonra Papa XIV Leo Anqola və Ekvatorial Qvineyaya səfər etməyi planlaşdırır.
Rizvan CƏFƏROV,
“Azərbaycan”
jpg_1775472819.jpg)
