“Şəhərsalma və Memarlıq İli” çərçivəsində Yeni Azərbaycan Partiyasının (YAP) və “Bakı Metropoliteni” Qapalı Səhmdar Cəmiyyətinin (QSC) birgə təşkilatçılığı ilə “Şəhərsalma və memarlıqda dövlətçilik prinsipləri” mövzusunda tədbir keçirilib.
Partiyadan AZƏRTAC-a bildirilib ki, əvvəlcə Ümummilli Lider Heydər Əliyevin büstü ziyarət olunaraq önünə gül dəstələri düzülüb. Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
QSC-nin İdarə Heyətinin sədri Vüsal Aslanov çıxış edərək bildirib ki, müasir şəhərin inkişafı yalnız yeni binalarla ölçülmür. Şəhərin planlaşdırılması, nəqliyyat sistemi və insanların gündəlik həyatının təşkili də əsas göstəricilərdir. Bu baxımdan metropoliten sistemi və Bakı metrosu şəhərsalmanın vacib hissəsidir.
Bakı metrosunun inkişafında Ümummilli Lider Heydər Əliyevin müstəsna rolunun olduğunu vurğulayan V.Aslanov əlavə edib ki, Ulu Öndər paytaxtın inkişafını nəzərə alaraq metropolitenin genişləndirilməsini strateji məsələ kimi qiymətləndirirdi, Bakı Metropolitenini Azərbaycan xalqının milli sərvəti adlandırırdı. Bu strateji xətt hazırda Prezident İlham Əliyev tərəfindən uğurla davam etdirilir, Bakı Metropolitenində geniş modernləşmə işləri həyata keçirilir.
YAP Sədrinin müavini – Mərkəzi Aparatın rəhbəri Tahir Budaqov bildirib ki, müasir dünyada şəhərsalma siyasəti ölkələrin inkişaf strategiyasının önəmli komponentlərindən birini təşkil edir. Qlobal urbanizasiya, texnoloji tərəqqi və ekoloji çağırışlar bu sahədə yeni yanaşmaların formalaşmasını şərtləndirir. Azərbaycanda ənənə və müasirliyin vəhdətinə əsaslanan şəhərsalma siyasəti davamlı sosial-iqtisadi inkişafa xidmət edir.
O qeyd edib ki, Ümummilli Lider Heydər Əliyev dövründə şəhərsalma siyasəti strateji prioritet kimi müəyyənləşdirilib, o cümlədən Bakı Metropoliteni şəbəkəsinin genişləndirilməsi istiqamətində mühüm addımlar atılıb. Bu siyasət hazırda Yeni Azərbaycan Partiyasının Sədri, Prezident İlham Əliyev tərəfindən uğurla davam etdirilir və paytaxtın modernləşməsinə töhfə verir.
Sonra “Bakı Metropoliteni” QSC-nin mütəxəssisi, Vətən müharibəsi qəhrəmanı şəhid polkovnik-leytenant Əfqan Abdurahmanovun qızı Hilalə Əfqan və “Bakı Metropoliteni” QSC-nin qatar maşinisti, Vətən müharibəsi iştirakçısı Səlim Rüstəmov çıxış ediblər. YAP-ın üzvü olduqları üçün qürur duyduqlarını bildirən çıxışçılar Partiyanın fəaliyyətinin ölkənin inkişafına və dövlətçiliyin möhkəmlənməsinə xidmət etdiyini vurğulayıblar. Çıxışlarda, həmçinin Vətən müharibəsində qazanılan Qələbənin xalqımız üçün böyük qürur mənbəyi olduğu qeyd olunub, gənclərin bundan sonra da müxtəlif sahələrdə ölkənin inkişafına töhfə verməsinin vacibliyi bildirilib.
Sonra YAP sıralarına yeni qəbul olunan bir qrup şəxsə üzvlük vəsiqələri təqdim olunub.
Tədbir Yeni Azərbaycan Partiyasının Himninin səsləndirilməsi ilə başa çatıb.
Sonda xatirə şəkli çəkdirilib.
jpg_1773406632.jpg)
jpg_1773404787.jpg)
