Venesuelada minlərlə insanın həyatını itirdiyi şiddətli zəlzələlər ölkənin müvəqqəti lideri Delsi Rodriqesin siyasi mövqeyini sarsıda bilər. Dağıntılar altındakı insanların xilas edilməsi, yaralıların müalicəsi və dağılmış infrastrukturun bərpası D.Rodriqes üçün öz liderliyini sübut etmək sınağıdır.
“The İndependent” nəşrinin yaydığı məlumata görə, hakimiyyətə gələn D.Rodriqes üçün böhranın idarə olunmasında yaranacaq hər hansı bir uğursuzluq ciddi siyasi nəticələrə yol aça bilər.
Uzun illərdir davam edən iqtisadi böhran və zəifləyən dövlət xidmətləri səbəbindən ölkənin bərpa prosesi olduqca çətin keçəcək. Siyasi təhlilçilərin fikrincə, hökumət beynəlxalq yardımları səmərəli idarə edə bilsə, fəlakət ətrafında milli birlik duyğusu yarada bilər. D.Rodriqes zəlzələdən sonra etdiyi müraciətdə xalqı həmrəyliyə çağırıb.
Bu prosesdə ABŞ-nin humanitar yardımları da həlledici rol oynayacaq. ABŞ Dövlət Katibi Marko Rubio Karakas administrasiyasına 150 milyon dollarlıq yardım vəd edib.
Xatırladaq ki, Latın Amerikası tarixində böyük zəlzələlər əvvəllər də siyasi xəritəni dəyişib. 1972-ci ildə Nikaraquada baş verən zəlzələdən sonrakı korrupsiya hadisələri Somoza rejiminin çöküşünü sürətləndirmiş, 1985-ci il Meksika zəlzələsindəki uğursuz böhran idarəçiliyi isə mövcud hakimiyyətin sonunu hazırlamışdı.
ABŞ Geoloji Araşdırmalar Mərkəzinin məlumatına görə, iyunun 25-də Venesuelada 39 saniyə fərqlə 7,2 və 7,5 ballıq iki dağıdıcı zəlzələ baş verib. Rəsmi rəqəmlərə görə, təbii fəlakət nəticəsində ölənlərin sayı 1430-a, yaralıların sayı isə 3238-ə yüksəlib.
Təhminə VERDİYEVA,
“Azərbaycan”
