Şəmkir ölkəmizin böyük kənd təsərrüfatı rayonlarındandır. Əsasən əkinçiliyin geniş yayıldığı rayonda regionların sosial-iqtisadi inkişafı dövlət proqramında nəzərdə tutulan tədbirlər planına uyğun olaraq bu sahənin daha sürətli inkişafı üçün məqsədyönlü tədbirlər həyata keçirilir.
Bunun sayəsində keçən il əkinçilikdə məhsul istehsalı əvvəlki illə müqayisədə xeyli artmışdır. Belə ki, ötən il 14303 hektar dənli bitkilər sahəsində 47274,2 ton məhsul istehsal olunmuşdur. Aqrotexniki tədbirlərin yüksək səviyyədə həyata keçirilməsi nəticəsində 27207 ton buğda, 19804,1 ton arpa və 263,1 ton vələmir istehsal edilmişdir. Bundan başqa, 1680 hektar dən üçün qarğıdalı sahəsindən 11373,6 ton məhsul götürən təsərrüfat sahibləri 380 hektar əkin sahələrində təkrar səpin aparmış və 1654 ton əlavə məhsul əldə etmişlər.
Ötən il 1276,8 hektarda texniki bitkilər də əkilmişdir. Onun 935 hektarı dən üçün günəbaxan, 299,8 hektarı şəkər çuğunduru, 40 hektarı yer fıstığı, qalan 2 hektarı isə gül olmuşdur. Əkilmiş 935 hektar dən üçün günəbaxan sahəsindən 1692,1 ton məhsul toplanmışdır. Eyni zamanda 2021-ci təsərrüfat ilində 6562 hektardan 177225,7 ton kartof, 102 hektar bostan sahəsindən 2841,5 ton qarpız, 6442 hektardan 308793 ton tərəvəz yığılmışdır.
Keçən il rayonda meyvəçilikdə də göstəricilər yüksək olmuşdur. Hazırda rayonda 4480,4 hektar meyvə və giləmeyvə bağları mövcuddur ki, onun da 3212,6 hektarı barverəndir. Çəkilən zəhmətin nəticəsində həmin sahələrdən 78154,4 ton məhsul götürülmüşdür.
Son illər rayonda üzümçülüyün inkişaf etdirilməsi də diqqət mərkəzindədir. Hazırda rayonda mövcud olan 560 hektar üzüm bağının 556 hektarı bar verir. Son mövsüm həmin sahələrdən 7700, şəxsi təsərrüfatlardan isə 25586,3 ton məhsul yığılmışdır.
Rayon əkinçiləri cari ilin yüksək məhsuldarlığı üçün də gərgin əmək sərf edirlər. Artıq 24983 hektar sahədə şum aparılmışdır. Qaldırılmış şumun 13500 hektarında dən və yaşıl yem üçün payızlıqlar səpilmişdir. Payızlıq səpinin 8310 hektarı dən üçün buğda, qalan 5190 hektarı isə dən üçün arpadır. Hazırda əkin sahələrində həm suvarma, həm də ziyanvericilərə qarşı mübarizə tədbirləri görülür. Şəmkirlilər 2022-ci ildə də kənd təsərrüfatının bütün sahələri üzrə yüksək göstəricilər qazanmaq üçün indidən möhkəm təməl qoyur, məhsuldarlığın yüksək olması üçün əllərindən gələni əsirgəmirlər.
S.ƏLİYEV,
“Azərbaycan”
jpg_1779802435.jpg)
