Keçmiş prezident Rumen Radevin rəhbərlik etdiyi “Mütərəqqi Bolqarıstan” koalisiyası ölkədə keçirilmiş növbədənkənar parlament seçkilərində qələbə qazanıb. Lakin sorğulara görə, o, mütləq səs çoxluğu qazana bilməyəcək.
Bülletenlərin 97 faizdən çoxu sayılan ilkin nəticələrə əsasən, “Mütərəqqi Bolqarıstan” səslərin 44,72 faizini toplayıb. Qeyd edək ki, bundan əvvəl exit-pollar Radevin rəhbərlik etdiyi koalisiyanın qələbəsini proqnozlaşdırmışdı.
Rəsmi məlumatlara görə, keçmiş Baş nazir Boyko Borisovun mərkəzçi-populist GERB-SDS koalisiyası 13,39 faiz səslə ikinci yerdədir. Sorğular onu 15-16 faiz səslə ikinci yerdə göstərmişdi.
GERB-nin rəhbərlik etdiyi koalisiya Bolqarıstanın son hökumətini formalaşdırıb və dekabr ayında korrupsiyaya qarşı kütləvi etirazlardan sonra istefa verib.
“Dəyişikliyə davam et” partiyası və “Demokratik Bolqarıstan” koalisiyası bloku 12,8 faiz səslə üçüncü yerdədir.
Bu üç qüvvədən başqa, daha iki siyasi ittifaq 4 faiz həddini keçərək parlamentə daxil olur. Türk azlığının da maraqlarını təmsil edən Hüquqlar və Azadlıqlar Hərəkatı (HAH) hazırda 6,76 faiz, ifrat-millətçi “Dirçəliş” partiyası isə 4,3 faiz səsə malikdir. Qeyd olunur ki, “Dirçəliş”in lideri Kostadin Kostadinov dəfələrlə Rusiya ilə münasibətləri qorumağın vacibliyini bildirib.
Rumen Radev jurnalistlərə demokratik islahatçı “Dəyişikliyə davam et” - “Demokratik Bolqarıstan” bloku ilə hökumət qurmağa hazır olduğunu bildirib. "Bolqarıstanın normal, sabit bir hökumət əldə etməsi üçün müxtəlif variantları nəzərdən keçirməyə hazırıq", - deyə o əlavə edib.
Radevin uzun müddətdir siyasi rəqibi olan GERB lideri Boyko Borisov bazar günü səhər tezdən siyasi qüvvəsinin hökumətə qoşulmayacağını bildirib, lakin sonradan bir az fərqli açıqlama verib. "Seçkilər kimin qalib gələcəyini müəyyən edəcək, amma danışıqlar kimin idarə edəcəyini müəyyənləşdirəcək. GERB hökumətə və ya müxalifətə qoşula bilər. Həyatda olduğu kimi, siyasətdə də səbr lazımdır", - Borisov deyib.
Rəqiblərinin yalnız avroskeptik deyil, həm də Rusiyapərəst siyasətçi adlandırdığı Rumen Radev, səsvermə məntəqələri bağlandıqdan sonra Bolqarıstanın Avropa İttifaqındakı yeri və Avropanın dəyişməsinə ehtiyac olduğunu xüsusi olaraq vurğulayıb: "Sizi əmin etmək istəyirəm ki, Bolqarıstan Avropa yolunda qalmaq üçün hər cür səy göstərəcək, amma inanın mənə, güclü Avropada güclü Bolqarıstan tənqidi düşüncə və praqmatizm tələb edir. Çünki Avropa qaydaları olmayan bir dünyada mənəvi lider olmaq ambisiyalarının qurbanına çevrilib. Beləliklə, Avropanın indi ehtiyac duyduğu şey bir daha tənqidi düşüncə, praqmatik hərəkət və yaxşı nəticələrdir. Xüsusilə yeni təhlükəsizlik arxitekturası qurmaqda və sənaye gücünün və rəqabət qabiliyyətinin bərpasına böyük sərmayə qoymaqda. Bu, Bolqarıstanın Avropa missiyasına əsas töhfəsi olacaq".
Bolqarıstan Mərkəzi Seçki Komissiyasının məlumatına görə, seçkilərdə iştirak edənlərin sayı olduqca aşağı olub: təxminən 47 faiz və ya 3,1 milyon nəfər.
Hazırkı seçkilər, ölkədə son 10 ildə ən böyük etirazların yaşandığı 2025-ci ilin sonlarında baş verən siyasi böhranın birbaşa nəticəsidir. Onlar 2026-cı il büdcəsinə qarşı etirazlar kimi başladılar, lakin tezliklə bütün siyasi sistemə və korrupsiyaya qarşı etirazlara çevrildilər. Dekabr ayında hökumət istefa verdi və prezident müvəqqəti kabinet təyin etmək məcburiyyətində qaldı.
2009-cu ildən 2021-ci ilə qədər fasilələrlə baş nazir vəzifəsini icra edən Boyko Borisovun 2021-ci ildə istefasından bəri Bolqarıstanda ardıcıl on hökumət dəyişib.
Son məlumata görə, Avropa Komissiyasının sədri Ursula fon der Lyayen Rumen Radevi Bolqarıstan parlament seçkilərində qələbəsi münasibətilə təbrik edib və onunla "təhlükəsizlik və rifah" naminə işləməyə hazır olduğunu bildirib. O, bununla bağlı X sosial səhifəsində yazıb: "Rumen Radevi parlament seçkilərində qələbəsi münasibətilə təbrik edirəm. Bolqarıstan Avropa ailəsinin qürurlu üzvüdür və ümumi problemlərin həllində mühüm rol oynayır. Bolqarıstanın və Avropanın rifahı və təhlükəsizliyi naminə birlikdə işləməyi səbirsizliklə gözləyirəm".
Rizvan HİLALOĞLU,
“Azərbaycan”
jpg_1779036242.jpg)
