Prezident İlham Əliyev Ermənistanı silahlandıranlara bir daha xəbərdarlıq etdi

Prezident İlham Əliyev ADA Universitetində "COP29 və Azərbaycan üçün Yaşıl Baxış" mövzusunda beynəlxalq forumda həm iştirak edib, həm hamının marağına səbəb olan çıxış edib, həm də sualları cavablandırıb. Dövlət başçısının bir neçə saat ərzində sualları cavablandırması forumda iştirak edənlərin dili ilə desək, hər kəsi təəccübləndirib.
Mövzu ilə bağlı "Azərbaycan" qəzetinə açıqlamasında Milli Məclisin deputatı Anar İsgəndərov bildirib ki, tutarlı cavablar, dəlillər, faktlar və Azərbaycanın bu məsələlərə münasibəti dövlət başçısının Ermənistana və havadarlarına, bu gün də ona silah göndərən ölkələrə həm də mesajı oldu. "Bu, ondan ibarətdir ki, Cənubi Qafqaza əmin-amanlıq, sülh lazımdır. Bəzi dövlətlər Ermənistana bu qədər silah verirlərsə, bunun məqsədi, səbəbi nədir və nəticəsi necə ola bilər? Bunu fikirləşən varmı? Əgər belə müasir silahlar Ermənistana verilirsə, məqsəd nədir? Bir zamanlar Ermənistana havadarlıq edənlər ona kifayət qədər silah bağışladılar və Ermənistan dünyanın ən ağrılı hadisələrdən birini törətdi, qonşusu olan Azərbaycan torpaqlarını işğal etdi. Yüz minlərlə insan qaçqın və köçkün həyatı yaşamağa məcbur edildi", - deyə o əlavə edib.
A.İsgəndərov qeyd edib ki, Ermənistan və havadarları anlamalıdırlar ki, güclü  Azərbaycan dövləti, onun on milyonluq "dəmir yumruq" kimi birləşmiş xalqı var. Eyni zamanda ən güclü orduya və müasir silahlara malikdir.  Əgər Ermənistan bir daha təcavüzkar siyasətinə əl atacaqsa, bu, onlar üçün çox ağrılı nəticələrə gətirib çıxaracaq. Bu mənada Prezident İlham Əliyev bu məsələyə xüsusi münasibətini bildirdi və dönə-dönə qeyd etdi ki, bu, Azərbaycanın dövlət başçısının tövsiyəsidir.
Deputatın fikrincə, Ermənistan da, havadarları da iki ölkənin öz arasında məsələləri həll edə bildiyini dərk etməlidirlər: "Buna əyani misal Qazaxın dörd kəndinin dinc yolla qaytarılmasıdır. Yəni iki dövlət bu məsələləri həll edə bilir. Dövlətimizin başçısının dili ilə desək, təbii ki, Cənubi Qafqazda sülh, əmin-amanlıq, bu xalqların qonşu kimi yaşaması üçün hər kəs öz iddialarından əl çəkməlidir. Ölkəmizin rəhbəri qeyd etdi ki, Azərbaycanın Ermənistan ərazisinə heç bir iddiası yoxdur və heç vaxt da belə bir iddia olmayıb. Vaxtilə Ermənistan "Qarabağ Ermənistandır" deməklə müharibənin başlanmasına səbəb oldu. Sonra ermənilər özləri də etiraf etdilər ki, "Qarabağ Azərbaycandır". Amma yenidən bu fikir, yəni "Qarabağ Ermənistandır" deyilərsə, Ermənistan bunun acı nəticələr verə biləcəyini fikirləşməlidir".
Müsahibimiz sonda bildirib ki, Prezident İlham Əliyev beynəlxalq forumda bütün suallara ətraflı, hamını maraqlandıran, düşündürən və qane edən şəkildə cavab verib.

Əsmər QARDAŞXANOVA
"Azərbaycan"