Parlamentin İqtisadi siyasət, sənaye və sahibkarlıq komitəsi üç məsələni plenar iclasa tövsiyə edib  

İyunun 13-də Milli Məclisin İqtisadi siyasət, sənaye və sahibkarlıq komitəsinin növbəti iclası keçirilib.

AZƏRTAC xəbər verir ki, komitə sədri Azər Əmiraslanov iclasın gündəliyinə 3 məsələnin daxil edildiyini diqqətə çatdırıb. O, əvvəlcə, gündəliyin birinci məsələsi - Gömrük Məcəlləsində dəyişiklik edilməsi haqqında qanun layihəsi (birinci oxunuş) barədə məlumat verib. Bildirib ki, sənəd Gömrük Məcəlləsinin təkmilləşdirilməsi ilə yanaşı, gömrük borcunun ödənilməsi sahəsində məsul subyektlərin dəqiq müəyyənləşdirilməsini və bu sahədə daha çevik və effektiv fəaliyyətin təmin olunmasını nəzərdə tutur.

İclasda iştirak edən Dövlət Gömrük Komitəsinin Hüquqi Təminat İdarəsinin rəisi Tural Həsənli Məcəllənin müvafiq maddəsinə — gömrük borcunun ödənilməsi qaydalarına təklif olunan dəyişikliklərin mahiyyəti barədə məlumat verərək, onların tətbiq mexanizmi və gözlənilən təsirləri haqqında ətraflı danışıb, dəyişikliklərin beynəlxalq təcrübə nəzərə alınmaqla hazırlandığını bildirib. Qeyd olunub ki, layihəyə əsasən, gömrük borcu hesablanmış gömrük ödənişləri üzrə borclu olan və ya bu Məcəllənin 258.1-ci maddəsində nəzərdə tutulmuş üsullardan istifadə etməklə təminat verildikdə, həmin təminat üzrə öhdəlik daşıyan şəxslər tərəfindən ödənilə bilər.

Komitənin sədr müavini Azər Badamov gündəliyin ikinci məsələsi olan “Daşınmaz əmlakın dövlət reyestri haqqında” Qanunda dəyişiklik edilməsi barədə qanun layihəsi (birinci oxunuş) haqqında məlumat verib. Bildirib ki, dəyişikliklərə əsasən, əmlak üzərində hüquqların dövlət qeydiyyatına alınması qaydalarında dəqiqliyin təmin olunması, həmçinin mümkün hüquqi kolliziyaların həlli məqsədilə qüvvədə olan qanunun 9-cu və 15-ci maddələrinə yeni bəndlərin əlavə olunması təklif olunur. Diqqətə çatdırılıb ki, dəyişikliklər hüquqların dövlət qeydiyyatının aparılması və dövlət qeydiyyatından imtina hallarında hüquqi əsasların daha dəqiq müəyyənləşdirilməsini hədəfləyir.

Gündəliyin sonuncu məsələsi - Torpaq Məcəlləsində, Mülki Məcəllədə, Mənzil Məcəllədə, Şəhərsalma və Tikinti Məcəlləsində, “Bələdiyyə torpaqlarının idarə edilməsi haqqında”, “Bələdiyyə torpaqlarının ayrılmasına dair sənədlərin hazırlanması və razılaşdırılması qaydaları haqqında Əsasnamənin təsdiq edilməsi barədə” və “Daşınmaz əmlakın dövlət reyestri haqqında” qanunlarda dəyişiklik edilməsi barədə qanun layihəsi (birinci oxunuş) haqqında danışan komitə sədri Azər Əmiraslanov deyib ki, sənəd bir sıra qanunlara mühüm düzəlişləri ehtiva edir.

Qanun layihəsi barədə məlumat verən Milli Məclis Aparatının İqtisadi qanunvericilik şöbəsinin müdiri Məhəmməd Bazıqov qeyd edib ki, layihə təbii fəlakət, texnogen qəza və ya hərbi əməliyyat nəticəsində məhv olmuş və yaxud yararsız vəziyyətə düşmüş yaşayış sahələrinin əvəzinə dövlət vəsaiti hesabına yeni yaşayış evlərinin tikintisini, bu məqsədlə torpaq sahələrinin ayrılmasını, daşınmaz əmlak üzərində hüquqların qeydiyyatını, şəhərsalma və tikinti prosedurlarının təkmilləşdirilməsini, eləcə də bir sıra digər hüquqi tənzimləmələri nəzərdə tutur.

Sonra qanun layihələrinin müzakirəsi aparılıb. Müzakirələrdə İqtisadi siyasət, sənaye və sahibkarlıq komitəsinin sədri Azər Əmiraslanov, sədr müavini Azər Badamov, komitənin üzvləri Vüqar Bayramov, Əli Məsimli, Milli Məclis Aparatının İqtisadi qanunvericilik şöbəsinin müdiri Məhəmməd Bazıqov çıxış edərək, layihələrlə bağlı fikirlərini açıqlayıblar, bəzi qeydlərini və rəylərini səsləndiriblər.

Müzakirələrin sonunda qanun layihələri birinci oxunuşda Milli Məclisin plenar iclasına tövsiyə olunub.