Azərbaycan neftçisinin fədakar əməyi həmişə,
necə deyərlər, dillərdə dastan olub. Dənizin qoynunda da, qurudakı yataqlarda da
çalışsa, çətin, bənzərsiz peşəsi ondan böyük zəhmət, hünər, məsuliyyət tələb edir.
Odur ki, gərəkli əməyi xalq tərəfindən daim dəstəklənir, dövlət tərəfindən həmişə
yüksək qiymətləndirilir. Ulu Öndər Heydər Əliyev neftçi əməyinə böyük dəyər verirdi.
Prezident İlham Əliyev bu ənənəni uğurla davam etdirir, neftçilər daim dövlət başçısının
diqqət mərkəzindədir.
Ölkəmizin öz tərəfdaşları ilə birlikdə həyata
keçirdiyi neft, qaz və ixrac layihələri dünyaya səs salıb. Bu layihələr Azərbaycanın
iqtisadi qüdrətini artırmaqla, insanların güzəranını yaxşılaşdırmaqla yanaşı, bir
sıra digər ölkələrin enerji təhlükəsizliyinin təminatına da mühüm töhfə verib. Biz
həmin layihələrlə Avropanın enerji xəritəsini dəyişdirmişik. Və bu məsələlərə həsr
olunan elə bir mötəbər tədbir yoxdur ki, orada Prezident İlham Əliyev "qara qızıl”ı
və mavi yanacağı yerin təkindən və dənizin dibindən çıxaran, hünər yiyəsi, şan-şöhrət
sahibi olan fədakar Azərbaycan neftçisinin əməyini, rəşadətini qeyd etməsin.
"Neftçi peşəsi Azərbaycanda həmişə çox hörmətli
peşə olub. Bu gün də
belədir, sabah da belə olacaq. Azərbaycan neftçiləri ölkəmizin iqtisadi qüdrətinin
artırılması istiqamətində çox böyük işlər görüblər, böyük töhfələr veriblər. Bu
gün Azərbaycanın neft-qaz sektoru öz yeni inkişaf dövrünü yaşayır” - çıxışlarının
birində Prezident belə deyib.
Digər bir
tədbirdə dövlət başçısı yenə də vurğulayıb: "Azərbaycanın uğurları haqqında danışanda,
əlbəttə ki, neft-qaz sənayesində əldə olunmuş nailyyətləri, neftçilərimizin əməyini
xüsusi qeyd etməliyik. Neftçilərimizin qəhrəmanlığı, fədakarlığı sayəsində bu gün
müstəqil Azərbaycan uğurla inkişaf edir... Azərbaycan o ölkələrdəndir ki, neft-qaz
yataqları ölkəmizə tərəqqi, xoşbəxtlik, inkişaf gətirdi”.
Bu cür sitatlar
onlarladır. Həm də Azərbaycan Prezidentinin dediyi söz heç zaman söz olaraq qalmır,
öz real nəticəsini həyatda, işdə, əməldə tapır.
Neft, qaz
böyük sərvətdir. İlham Əliyev onları hasil edən insanların daha böyük sərvət olduğunu
deyir:” 1994-cü ildə kontraktın üzərində iş aparılarkən xüsusi qeyd edirdik ki,
biz istəyirik kontraktda Azərbaycan vətəndaşlarının işə cəlb olunması məsələsi göstərilsin.
Biz istəyirdik ki, bu, bir öhdəlik kimi konsorsiumun şirkətləri üzərinə qoyulsun
ki, Azərbaycan mütəxəssisləri tədricən bütün əsas vəzifələrdə işləsinlər və belə
də oldu... Bu gün "Azəri-Çıraq-Günəşli” neft yatağının işlənilməsində çalışanların
90 faizdən çoxu Azərbaycan vətəndaşlarıdır, yəni bunu biz təmin etdik. Bu, çox böyük
sərvətdir. Neft, qaz tükənən sərvətlərdir. İntellektual potensial, bilik, savad,
səriştə, təcrübə isə dəyişməz sərvətdir”.
Prezident
İlham Əliyev neftçilərə böyük qayğı və dəstək göstərir, mübaliğəsiz desək, onların
əsl dostudur. Bu dostluğun nəticələri Azərbaycan neftçisinin iş və məişət şəraitindən
dolanışığınadək hər tərəfdə görünür. Hətta onun nə vaxtsa iş zamanı əyninə geyindiyi
mazutlu pencəyi əvəz edən müasir kombinezonunda da...
Bunları əyani
görmək üçün bircə dəfə neftçilərin çalışdığı hansısa məkana, məsələn, Neft Daşlarına
səfər etmək kifayətdir. Bu gün Neft Daşlarının başqa bir cəlalı var. Dəniz-şəhərin
özü də büsbütün dəyişib, neftçilərin işlədiyi və yaşadığı şərait də. Yaxın keçmişdə
isə heç də belə deyildi. Prezident bu il sentyabrın 19-da Heydər Əliyev adına Bakı
Dərin Özüllər Zavodunda (BDÖZ) "Abşeron” yatağının dəniz əməliyyatlarının təməlqoyma
mərasimində iştirak edərkən həmin vaxtı belə xatırladı: "Sovet İttifaqı dağılanda
biz hansı vəziyyətlə üzləşmişdik: dağılmış neft infrastrukturu... "Neft Daşları”
hansı vəziyyətdə idi o vaxt. Mən xatırlayıram, "Neft Daşları”na Prezident kimi ilk
dəfə 2004-cü ildə gedəndə ağır vəziyyət idi. Bütün platformalar çürümüşdü, dağılmışdı.
Burada işləmək böyük çətinlik, böyük təhlükə yaradırdı”.
İndi isə
71 yaşlı Neft Daşları ildən-ilə cavanlaşır, müasirləşir.
2020-ci il
xalqımızı və dövlətimizi çox sınağa çəkdi. Pandemiya, müharibə... İşinin, qayğılarının
aşıb-daşdığı bu mürəkkəb dövrdə də neftçilərin böyük dostu onları unutmadı. Belə
ki, avqustun 10-da Prezident İlham Əliyev BDÖZ-də "Qarabağ” yatağının dayaq blokunun
dənizə yola salınması mərasimində iştirak etdi. Bu nəhəng və mürəkkəb konstruksiyanın
Azərbaycan mütəxəssisləri və fəhlələri tərəfindən inşa edildiyi üçün şad olduğunu
bildirdi. Həmçinin neft-qaz layihələri üçün qurğuların tikilməsi sayəsində hazırda
zavodda 5 minə yaxın insanın çalışdığını və yüksək əməkhaqqı aldığını məmnunluqla
qeyd etdi.
BDÖZ-də "Abşeron”
yatağının dəniz əməliyyatlarının təməlqoyma mərasimində iştirak edərkən də dövlət
başçısı həmişə olduğu kimi, yenə də vurğuladı: "Neftçilər hər zaman Azərbaycanda
böyük hörmətə layiq insanlar olub. Bu gün də belədir və neftçilərin əməyi əsl qəhrəmanlıqdır.
Neftçi peşəsi həm hörmətli peşədir, eyni zamanda riskli, təhlükəli peşədir və bir
daha demək istəyirəm ki, onların əməyi əsl qəhrəmanlıqdır”.
Prezident
ölkəmizin inkişafında neftçilərin əhəmiyyətli rolunu qeyd etməklə yanaşı, Azərbaycanın
uğurlu gələcəyinin də onların peşəsindən, nailiyyətlərindən böyük dərəcədə asılı
olacağını dedi.
Əlavə edək
ki, dövlət başçısı qocaman, dünyasını dəyişmiş neftçilərin xidmətlərini də unutmur,
həmçinin vaxtilə Azərbaycanın neft maqnatlarının xalq üçün gördüyü xeyirxah işlərə
yüksək dəyər verir. Çox uzağa getməyək, elə bu il paytaxtın Əmircan qəsəbəsində
Murtuza Muxtarovun adına parkın istifadəyə verilməsində iştirak etməsi və onun büstü
qarşısına gül dəstəsi qoyması deyilənlərə əyani misaldır. Prezident BDÖZ-də də Hacı
Zeynalabdin Tağıyevin, Şəmsi Əsədullayevin, Murtuza Muxtarovun xeyirxah əməllərini
bir daha yada saldı. Vaxtilə SOCAR-da əfsanəvi Neftçi Qurban - Qurban Abbasovla,
görkəmli neftçi-geoloq, akademik Xoşbəxt Yusifzadə ilə birlikdə işlədiyindən qürur
duyduğunu bildirdi.
Azərbaycan
neftçilərinin böyük dostu Prezident İlham Əliyev həm də fəxrlə onların həmkarı olduğunu
deyir. Sentyabr ayında, neftçilərin peşə bayramı ərəfəsində BDÖZ-də olarkən bunu
bir daha bəyan etdi: "Şadam ki, mənim də həyatımın 9 ili Azərbaycan Dövlət Neft
Şirkətində keçibdir. O illərdə əldə etdiyim təcrübə mənim üçün çox qiymətlidir və
çox gözəl xatirələrim var. Əldə etdiyim təcrübə, biliklər bu gün mənə kömək göstərir...
Bu gün neftçilər də görürlər ki, onların əməyi Azərbaycan xalqının maraqlarına xidmət
edir və bu, onlar üçün də çox önəmlidir. Çünki onlar bilirlər ki, bu gün və bundan
sonra ölkəmizin həm siyasi, həm iqtisadi nailiyyətləri böyük dərəcədə neft-qaz amilinə
söykənir. Belə olan halda, bu, onları daha da ruhlandırır. Bir daha demək istəyirəm,
mən hər zaman fəxr etmişəm ki, həyatımın 9 ili Dövlət Neft Şirkətində keçib və neftçilərin
həmkarı kimi onları ürəkdən təbrik edirəm, yeni uğurlar arzulayıram”.
Flora SADIQLI,
"Azərbaycan”
