Bu günlərdə qardaş Türkiyə Respublikasının Qars şəhər bələdiyyəsinin nümayəndə heyəti Mingəçevir şəhərinin qonağı olmuşdur. Səfər zamanı hər iki şəhər bələdiyyəsi arasında dostluğu, əməkdaşlığı daha da möhkəmləndirməyə, qarşılıqlı turist səfərlərini, təcrübə mübadiləsini genişləndirməyə hesablanan niyyət protokolu imzalanmışdır.
Türkiyəli qonaqlar Mingəçevir Şəhər İcra Hakimiyyətində də hərarətlə qarşılanmışdır. Mingəçevir Şəhər İcra Hakimiyyətinin başçısı Niyazi Bayramov qonaqlara respublikada energetiklər şəhəri kimi tanınan Mingəçevirin tarixindən, bu günündən və dövlətin qayğısından güc alıb daha da çiçəklənəcək sabahından danışmışdır. Niyazi Bayramov Qars şəhər bələdiyyəsinin rəhbəri Nevzad Bozkuşa əldə toxunmuş xalça hədiyyə etmişdir.
Türkiyəli qonaqlar nur şəhərinin görkəmli yerlərini gəzmiş, yenidən qurulmuş sahil parkında, Bayraq meydanında, beynəlxalq yarışların keçirildiyi avarçəkmə bazasında olmuşlar.
Qars bələdiyyəsinin başqanı Nevzad Bozkuş səfər təəssüratı ilə bağlı demişdir:
- Əzəli qardaşlarımızı, yeni dostlarımızı ziyarət etdik. Burada bizə hər şey doğma görünür. Yeni qardaşlığın bünövrəsini qoyduq. Bundan sonra tez-tez görüşəcəyik. Artıq biz gəldik, protokol imzaladıq. İndi növbə azərbaycanlı qardaşlarımızındı. Sizləri Qarsda salamlamaqdan qürur duyarıq. Yaxınlaşmaq, doğma qardaşlar kimi qucaqlaşmaq bizdən zamanın tələbidir. Biz birlikdə daha güclüyük.
Mingəçevir şəhər bələdiyyəsinin sədri Cavanşir Yusifov Qars və Mingəçevirin qardaş şəhərlər elan olunmasının böyük perspektivindən söz açdı. Dedi ki, bu addım hər iki şəhərin xeyrinə olacaqdır. Biz bələdiyyə işçilərinin təcrübəsini qarşılıqlı şəkildə mübadilə edəcək, şəhər təsərrüfatının nümunəvi saxlanılmasının mütərəqqi texnologiyasını öyrənəcəyik. Bu ilin yayında Türkiyə Respublikasına ilk səfərə hazırlaşırıq.
Lazım QULİYEV,
"Azərbaycan"
