3 oktyabr
2020-ci il Azərbaycanın ulu tarixinə, zəfər salnaməsinə qələbə sevinci ilə yazıldı.
26 ildir düşmən tapdağında olan Suqovuşan kəndi Azərbaycan Silahlı Qüvvələri tərəfindən
işğaldan azad olundu. Kənddə şanlı Azərbaycan bayrağı ucaldıldı...
Bu şad xəbəri
xalqa Prezident, Ali Baş Komandan İlham Əliyev şəxsi "Twitter” səhifəsindən çatdırdı.
Daha sonra Ali Baş Komandan Madagiz kəndi
və yüksəkliyinin işğaldan azad olunması münasibətilə 1-ci Ordu Korpusunun komandiri
general-mayor Hikmət Həsənovu təbrik etdi. Bütün Azərbaycan xalqı bu qələbə xəbərinə
sevindi, bayram etdi. Qələbə müjdəsinə təşnə olan xalqımız sevinc, fərəh hissini
bölüşmək üçün küçələrə axışdı, binalardan, evlərdən alqış səsləri, zəfər nəğmələri
ucaldı. Çox keçmədi ki, dövlət başçısının növbəti paylaşımı ilə sevincimiz ikiqat
oldu. Prezident Madagizin tarixi adını bərpa etdiyini, kəndin əvvəlki kimi Suqovuşan
adlandırıldığını elan etdi. Beləliklə, 26 ildən sonra tarixi həqiqət öz təcəssümünü
tapdı...
Suqovuşan
kəndi əvvəllər Ağdərə rayonunun inzibati ərazisinə aid olub. 1992-ci ildə Ağdərə
ləğv edilərək ərazisi qonşu Ağdam, Tərtər və Kəlbəcər rayonları arasında bölüşdürülüb.
Suqovuşan kəndi isə Tərtər rayonuna birləşdirilən kəndlərdən biridir.
Suqovuşan
ilk dəfə 1991-1992-ci illərdə Azərbaycan Ordusu tərəfindən işğaldan azad olunub.
Lakin 1994-cü ilin aprel ayında mənfur ermənilər yenidən Suqovuşanı işğal edib.
Ermənilər kəndi işğal etdikdən sonra burada
hərbi hissələr yaradıb. Buradakı 49971 nömrəli hərbi hissə Ermənistan ordusunun
Qarabağdakı ən yaxşı hərbi hissələrindən biri hesab olunurdu. Bundan başqa, erməni
ordusunun "6-cı müdafiə rayonu” kimi qeyd etdiyi 33651 nömrəli hərbi hissə də Madagizdə
yerləşirdi.
Hərbi ekspertlər
bildirirlər ki, Suqovuşan irəliləmə və əraziyə nəzarət baxımından olduqca önəmli
rola malikdir.
Gözəl, səfalı
təbiəti olan bu kəndin ərazisində üç tarix-memarlıq abidəsi də qeydiyyata alınıb:
Müqəddəs Yelisey monastrı, körpü və kilsə.
Kəndin yaxınlığında
Suqovuşan su anbarı və su elektrik stansiyası da yerləşir. Eyni zamanda kənd həm
Ağdərə, həm də Sərsəng su anbarına yaxındır. Ona görə bu ərazi yerli iqtisadi infrastrukturun
mərkəzlərindən hesab olunur. Sərsəng Su Elektrik Stansiyasında istehsal olunan elektrik
enerjisi Qarabağın elektrik enerjisinin 60-70 faizini təşkil edirdi. Burada istehsal
olunun elektrik enerjisindən Ermənistana da verilirdi.
Suqovuşanda
balıq zavodu da vardı, orada kürü istehsal olunurdu.
Bütün bunlar
artıq həqiqi sahibinə - Azərbaycana aiddir!
Suqovuşanın
düşmən tapdağından qurtulduğunu sevinc göz yaşları ilə qarşılayan kənd sakinləri
doğma yurdlarına qayıdacaqları, ata-baba torpaqlarına ayaq basacaqları günü səbirsizliklə
gözləyirlər...
Xəyalə MURADLI,
"Azərbaycan”
