Hazırda Kubada qorxu və ümidsizlik əsas emosional vəziyyətə çevrilib. ABŞ Prezidenti Donald Tramp tərəfindən neftin tədarükünə qoyulan qadağa ölkəni dərin böhrana sürükləyib.
AZƏRTAC xəbər verir ki, neft Kuba iqtisadiyyatının fəaliyyəti üçün həlledici rol oynayır, lakin ölkənin öz neft ehtiyatlarının tükəndiyi bir vaxtda həyati vacib yanacaq tədarükünü təmin etməyə hazır olan müttəfiqlər də qalmayıb. Danimarkanın “Ekstra Bladet” qəzetinin yazdığına görə, bir çox məktəblərdə dərslər dayandırılıb, müəllimlər və şəxsi heyət məzuniyyətə göndərilib, turistlərin olmaması səbəbindən boş qalan hotellər bağlanmağa məcbur olub, adada beynəlxalq uzun uçuşlar üçün kifayət qədər yanacaq olmadığından Rusiya və Kanadadan reyslər ləğv edilib.
Bir sıra ölkələr ciddi böhranla üzləşən və iqtisadiyyatı əsasən turizmdən asılı olan Kubaya səfərlərin arzuolunmaz olduğu barədə vətəndaşlarına xəbərdarlıq edib.
Paytaxt Havana sakinləri elektrik enerjisinin növbəti dəfə kəsiləcəyi qorxusu ilə yaşayır və gündəlik həyatın çətinlikləri ilə üzləşirlər.
Uzun illərdir kommunist hakimiyyətinin ölkəni iqtisadi kollaps vəziyyətinə saldığı Kubaya qarşı ABŞ hökuməti xüsusi sərt mövqe tutub.
Bazar ertəsi Donald Tramp bildirib ki, ABŞ Dövlət katibi Marko Rubio Kuba iqtisadiyyatının yenidən dirçəlməsi istiqamətində səylər çərçivəsində bu ölkənin əsas vəzifəli şəxsləri ilə danışıqlar aparacaq.
“Nə neft var, nə pul – heç nə!”, – deyə Prezident Tramp bildirib.
Kuba əsilli amerikalı və ölkədəki kommunist rejimin qatı tənqidçisi olan Rubio bildirib ki, o, yalnız kommunist rejimin hakimiyyətdən nə vaxt gedəcəyi məsələsi müzakirə olunacağı halda, Kuba tərəfi ilə danışıqlar aparmaq niyyətindədir.
Bununla belə, “Ekstra Bladet” qəzeti qeyd edir ki, bunun baş verib-verməyəcəyi ilə bağlı böyük qeyri-müəyyənlik var.
