ABŞ Konqresinin Tədqiqat Xidmətinin (CRS) yeni hesabatına əsasən, fevralın sonundan bəri İrana qarşı əməliyyatlar zamanı Amerikanın 81 hərbi hava nəqliyyat vasitəsi itirilib və ya zədələnib.
AZƏRTAC Amerika mediasına istinadla xəbər verir ki, yenilənmiş hesabata görə, bu rəqəmə sabit qanadlı təyyarələr, helikopterlər və dronlar daxildir. Sənəddə xəbərdarlıq edilir ki, məlumatların məxfiliyi, davam edən döyüş əməliyyatları və texnikanın sıradan çıxması səbəbindən bu rəqəm dəyişə bilər. Eyni zamanda, zədələnmiş bəzi hava vasitələri artıq yenidən istismara qaytarılmış ola bilər.
Ən böyük itkilər “MQ-9 Reaper” dronları ilə bağlıdır; İrana qarşı əməliyyatlar zamanı 45 belə dronun itirildiyi bildirilir. Hesabatda, həmçinin 12 ədəd “F-15E Strike Eagle” təyyarəsinin adı çəkilir; bunlardan üçü mart ayında Küveyt üzərində, biri isə aprel ayında İran səmasında məhv edilib.
CRS-in istinad etdiyi məlumatlara görə, daha sonra – sentyabr ayında İordaniyadakı “Muvaffaq Salti” aviabazasına İranın endirdiyi zərbə zamanı səkkiz ədəd “F-15” təyyarəsi yüngül zədələr alsa da, sonradan yenidən istismara qaytarılıb.
Digər itkilər və ya zədələnmələr siyahısına bir “F-35A Lightning II”, iki “A-10 Thunderbolt II”, yeddi “KC-135” havada yanacaqdoldurma təyyarəsi və bir “E-3 Sentry” hava xəbərdarlıq və idarəetmə təyyarəsi daxildir.
Hesabatda, həmçinin iki “MC-130J” xüsusi əməliyyat təyyarəsi, bir “HH-60W” döyüş-axtarış və xilasetmə helikopteri, bir “MQ-4C Triton” dronu və üç “MQ-1” pilotsuz uçuş aparatı qeyd olunub.
Helikopter itkilərinə Hörmüz boğazı üzərində vurulduğu bildirilən bir “AH-64 Apache”, xilasetmə əməliyyatları zamanı məhv edilən dörd “AH-6 Little Bird” və Ərəbistan dənizi üzərində qəzaya uğrayan bir “MH-60 Sea Hawk” daxildir.
CRS bildirib ki, bu itkilər Konqresin nəzarət funksiyası ilə bağlı bir sıra məsələləri gündəmə gətirə bilər. Bunlara Pentaqonun zədələnmiş hava vasitələrini əvəz etmək üçün kifayət qədər məlumat və maliyyəyə malik olub-olmaması, həmçinin “E-3” kimi azsaylı və köhnəlmiş platformaların itirilməsinin digər sahələrdə imkan boşluqları yaratması məsələləri aiddir.
Hesabatda, həmçinin ABŞ-nin müdafiə sənayesi bazasına düşə biləcək potensial yüklənmə vurğulanır və xəbərdarlıq edilir ki, istehsal gücü, təchizat zəncirləri, rəqabət aparan tələblər (o cümlədən xarici hərbi satışlar) Pentaqonun itirilmiş hava vasitələrini nə qədər tez bərpa edəcəyinə təsir göstərə bilər.
jpg_1790976482.jpg)
jpg_1791359951.jpg)
jpg_1791361313.jpg)
jpg_1791358305.jpg)
jpg_1791352786.jpg)
