BMT-nin Asiya və Sakit Okean üzrə İqtisadi və Sosial Komissiyasının (UNESCAP) təşkilatçılığı ilə Kağızsız Ticarət Şurasının 4-cü sessiyası və Transsərhəd Kağızsız Ticarətin Asanlaşdırılması üzrə Çərçivə Sazişinin Daimi Komitəsinin 4-cü sessiyası keçirilib.
Dövlət Gömrük Komitəsindən (DGK) AZƏRTAC-a bildirilib ki,Tailand Krallığının Banqkok şəhərində keçirilən tədbirdə ölkəmizi komitə sədrinin müavini Natiq Şirinovun rəhbərlik etdiyi nümayəndə heyəti təmsil edib.
Sessiyalar Transsərhəd Kağızsız Ticarətin Asanlaşdırılması üzrə Çərçivə Sazişinin həyata keçirilməsi üçün prioritet məsələlərin və fəaliyyətin müəyyən edilməsi məqsədilə keçirilib. Çərçivə Sazişinin Daimi Komitəsinin 4-cü sessiyasında prioritet vəzifələrin icrası ilə bağlı məsləhətləşmələr, Transsərhəd Kağızsız Ticarətin Asanlaşdırılması üçün Milli Komitələrin təsis edilməsi, sənədlərin elektronlaşdırılması və qarşılıqlı tanınması, fərdi fəaliyyət planları barədə fikir mübadiləsi aparılıb, potensialın gücləndirilməsi strategiyaları və əməkdaşlıq planları müzakirə olunub.
Kağızsız Ticarət Şurasının iki günlük sessiyasında üzv dövlətlərin yekdil səsverməsi ilə Azərbaycan nümayəndə heyətinin rəhbəri Natiq Şirinov Kağızsız Ticarət Şurası iclasının sədr müavini seçilib. Sessiyada Daimi Komitə tərəfindən təqdim olunmuş tövsiyələr müzakirə edilib, üzv dövlətlərin məruzələri dinlənilib.
Dövlət Gömrük Komitəsi sədrinin müavini Natiq Şirinov sessiyada çıxış edərək xarici ticarətdə elektron bir pəncərə sisteminin yaradılması istiqamətində görülən işlər, malların və nəqliyyat vasitələrinin sərhəd qeydiyyatında və gömrük rəsmiləşdirilməsində süni intellekt əsaslı Avtomatlaşdırılmış Risk Analiz Sisteminin (ARAS) tətbiqi, “Rəqəmsal gömrük dəyəri” layihəsi, eləcə də digər ölkələrlə qarşılıqlı məlumat mübadiləsi ilə bağlı fikirlərini bölüşüb.
Sessiyanın sonunda Kağızsız Ticarət Şurası tərəfindən hesabat qəbul edilib. Hesabatda Çərçivə Sazişinin Daimi Komitəsinin 4-cü sessiyasının nəticələrinin məqbul hesab edildiyi vurğulanıb, tövsiyə standartlarının qəbul olunması və təqbiqi, həmçinin Çərçivə Sazişinin reallaşdırılması məqsədilə texniki və maliyyə dəstəyinin göstərilməsi, potensialın gücləndirilməsi ilə bağlı mümkün təlimlərin və təşviqat-təbliğat tədbirlərinin həyata keçirilməsi və digər məsələlər öz əksini tapıb.
