Ukraynanın Jitomir şəhərində Azərbaycan xalqının Ümummilli Lideri Heydər Əliyevin anadan olmasının 103-cü ildönümünə həsr olunmuş şəhər işıqları lövhələri və reklam bilbordları quraşdırılıb.
AZƏRTAC xəbər verir ki, təşəbbüs hər il görkəmli dövlət xadiminə həsr olunmuş informasiya kampaniyaları, sərgilər, xatirə tədbirləri və mədəni layihələr təşkil edən Ukrayna Azərbaycanlılarının Həmrəylik Konqresinin (UAK) sədri İlqar Məmmədovun dəstəyi ilə həyata keçirilib.
UAK sədri AZƏRTAC-a bildirib ki, bu cür təşəbbüslər artıq yaxşı ənənəyə çevrilib və tarixi yaddaşın qorunmasına, mədəniyyətlərarası dialoqun inkişafına, Ukrayna ilə Azərbaycan arasında dostluq münasibətlərinin möhkəmləndirilməsinə yönəlib.
O əlavə edib: “Jitomirdə quraşdırılmış reklam bilbordları sakinləri və qonaqları müasir Azərbaycanın inkişafında, ölkənin dövlətçiliyinin və beynəlxalq nüfuzunun möhkəmlənməsində həlledici rol oynamış Ümummilli Lider Heydər Əliyevin misilsiz xidmətləri ilə tanış edir. İlqar Məmmədov vurğulayıb: “Onun siyasi liderliyi sayəsində Azərbaycanın sabit inkişafı, iqtisadi artımı və müstəqil xarici siyasətinin təməli qoyulub”.
Onun sözlərinə görə, təşəbbüs təkcə xatirə deyil, həm də məlumatverici və maarifləndirici xarakterə malikdir. Məqsəd Ukrayna cəmiyyətini Heydər Əliyevin Azərbaycan xalqı qarşısında misilsiz xidmətləri, dövlətçiliyin inkişafına verdiyi töhfələr barədə məlumatlandırmaq, həmçinin iki ölkənin xalqları arasında uzunmüddətli dostluğu vurğulamaqdır.
Reklam qurğuları Jitomirin hər gün minlərlə insanın keçdiyi izdihamlı ərazilərində yerləşir. UAK Azərbaycan tarixində xüsusi yeri olan və xalqımız tərəfindən dərin hörmətlə anılan Ulu Öndər haqqında daha geniş auditoriyaya məlumat verməyi nəzərdə tutur.
Bilbordlar və lövhələr şəhərin mərkəzi hissəsində - Nebesna Sotnı, İvana Koçerqi və Velika Berdiçevska küçələrində, Jitomir Şəhər Şurasının, Jitomir Vilayət Dövlət Administrasiyasının, Ukrayna Mədəniyyət Evinin, Mərkəzi parkın, məktəblərin və yaradıcılıq mərkəzlərinin yaxınlığında quraşdırılıb. Bu yer gənclərdən yaşlılara qədər - daha çox şəhər sakininin Azərbaycanın Ümummilli Lideri Heydər Əliyevin anadan olmasının 103-cü ildönümünə həsr olunmuş bilbord və işıq lövhələrini görməsi üçün seçilib.
