Türk Dövlətləri Parlament Assambleyasının (TÜRKPA) Xarici Əlaqələr komissiyalarının İstanbulda keçirilən ikinci toplantısı başa çatıb. Toplantının yekununda tərəflər gələcək fəaliyyətlərə dair ortaq bəyanat imzalayıblar.
AZƏRTAC xəbər verir ki, bəyanatda görüşlərin TÜRKPA-nın dəstəyi ilə mütəmadi olaraq, ən az ildə bir dəfə “Türk Dövlətləri Parlamentlərinin Xarici İşlər Komissiyaları Toplantısı” adı altında keçirilməsi, növbəti toplantının keçiriləcəyi məkan və zamanın hər görüşdə müəyyən edilməsi, toplantılarda TÜRKPA-ya üzv, müşahidəçi və qonaq ölkə parlamentlərinin Xarici İşlər Komissiyalarının iştirakı, eləcə də Türk Dövlətləri Təşkilatı (TDT) və TÜRKPA Baş katiblərinin dəvət edilməsi, hər görüşdən sonra ortaq bəyanatın yayılması nəzərdə tutulur.
Sənədə əsasən, bu toplantıların keçirilməsində məqsəd TDT Zirvə bəyanatları və TÜRKPA-nın əsas məqsədlərinin həyata keçirilməsində Xarici İşlər Komissiyaları arasında əməkdaşlığı artırmaqdır. Bu çərçivədə mühüm beynəlxalq proseslərdə Türk dünyasını maraqlandıran spesifik mövzuları müzakirə edərək ortaq mövqe imkanlarının araşdırılması, iştirakçı ölkələr aranında konkret əməkdaşlıq imkanlarının dəyərləndirilməsi və başda parlament təşkilatları olmaqla beynəlxalq qurumlarla əməkdaşlığın artırılması hədəflər arasında yer alır.
Toplantıda həmçinin, başda süni intellekt olmaqla, ən yeni texnologiyaların təkmilləşdirilməsi və tətbiqinin idarəolunmasına dair beynəlxalq platformalarda dövlətlərimizin Türk dünyasının mədəni dəyərlərini qoruyacaq şəkildə fəal rol oynamasının təşviq edilməsi barədə razılıq əldə olunub.
Qeyd edək ki, toplantı çərçivəsində “Qlobal və regional proseslər: Rusiya-Ukrayna və İsrail-Fələstin qarşıdurmaları, Qafqazda, Suriyada son vəziyyət, başda süni intellekt olmaqla texnologiya sahəsində son proseslərin geosiyasi baxımdan dəyərləndirilməsi” və “Türk dünyasını maraqlandıran mövzular və parlament diplomatiyası” mövzularında panel iclaslar keçirilib.
Panellərdə TÜRKPA Baş katibi Mehmet Süreyya Er tərəfindən “Türk Dövlətləri Parlament Assambleyası: Həmrəylik, Güc birliyi və ortaq hədəflər” mövzusunun təqdimatı olub.
Digər təqdimatlarda “Parlament diplomatiyasının daha effektiv istifadə oluna biləcəyi sahələr”, “Xarici işlər komissiyaları Türk dünyası ilə bağlı işlərdə hansı spesifik sahələrdə töhfə verə bilər?”, “Parlamentlərdə Türk dünyası ilə bağlı beynəlxalq sənədlərin prioritetli və sürətli şəkildə qəbul edilməsi” kimi məsələlər ətrafında fikir mübadilələri aparılıb.
Xatırladaq ki, Azərbaycan tədbirdə Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidovun rəhbərlik etdiyi nümayəndə heyəti tərəfindən təmsil olunub.
