Elmdə iz qoyan alim 

Bu günlərdə Abdulla Şaiqin mənzil-muzeyində görkəmli ədib Abdulla Şaiqin oğlu, ədəbiyyatşünaslıq elminin tanınmış nümayəndəsi, Azərbaycanda ədəbi tənqid məktəbinin banilərindən biri, akademik Kamal Talıbzadənin vəfatının 20-ci ildönümünə həsr olunmuş "Elmdə iz qoyan ömür - Kamal Talıbzadə" adlı anım tədbiri keçirilib.

Xalq artisti Mübariz Tağıyevin ifasında Zeynəb İsmayılzadənin Abdulla Şaiqin məşhur şeirinə yazdığı "Şaiqanə yad et!" mahnısı səsləndirilib.

Akademik Kamal Talıbzadənin qızı, Abdulla Şaiqin mənzil-muzeyinin direktoru Ülkər Talıbzadə qonaqları Azərbaycanın görkəmli ədibi Abdulla Şaiqin ocağında salamladı. Sonra sözünə davam edərək dedi ki, Kamal Talıbzadənin vəfatından 20 il keçməsinə baxmayaraq, xatirəsi bu gün də onu tanıyan və sevən insanların qəlbində yaşayır. Kamal Talıbzadə təkcə böyük ədəbiyyatşünas alim deyildi, həm də əsl mədəniyyət xadimi idi. O, atası Abdulla Şaiqin zəngin irsini yaşatmaq üçün böyük zəhmət bahasına bu muzeyi yaratmış, ömrünün sonunadək ədəbiyyatşünaslıq elminə və milli mədəniyyətimizin inkişafına misilsiz xidmətlər göstərmişdir.

Tədbirdə Nizami Gəncəvi adına Ədəbiyyat İnstitutunun elmi katibi, Kamal Talıbzadənin aspirantı, filologiya üzrə fəlsəfə doktoru Aygün Bağırlının çıxışı maraqla qarşılandı. O dedi ki, ədəbiyyatşünaslar Abdulla Şaiq irsinə və bu irsin ən böyük davamçılarından biri olan Kamal Talıbzadə şəxsiyyətinə daim minnətdardırlar.  Kamal müəllimin ədəbiyyat tarixində apardığı tədqiqatlar bu gün də öz elmi əhəmiyyətini qoruyub saxlayır.

Filologiya elmləri doktoru, professor Bədirxan Əhmədov çıxışında Kamal Talıbzadənin Azərbaycan ədəbiyyatşünaslığına verdiyi mühüm töhfələrdən ətraflı bəhs etdi. Dedi ki, Kamal Talıbzadənin əsərləri bu gün də dərslik səviyyəsindədir. Xüsusilə Abbas Səhhətin yaradıcılığı ilə bağlı apardığı mühüm araşdırmalar elmi dövriyyəyə yeni faktlar gətirmiş və bu gün də geniş şəkildə istifadə olunur. 

Çıxışını bitirdikdən sonra professor Bədirxan Əhmədov "XX əsr Azərbaycan ədəbiyyatı tarixi" kitabını muzeyə hədiyyə etdi.

Nizami Gəncəvi adına Ədəbiyyat İnstitutunun elmi işçisi, filologiya elmləri doktoru Şahbaz Musayev Kamal Talıbzadəni həm mükəmməl alim, həm də yüksək mənəvi keyfiyyətlərə malik insan kimi xarakterizə etdi. Vurğuladı ki, Azərbaycan ədəbi tənqidinin tarixi Kamal Talıbzadə şəxsiyyəti olmadan təsəvvür edilə bilməz. Alim hələ sovet dövründə Əhməd Ağaoğlunun əsərlərini çapa hazırlamış, Firudin bəy Köçərli, Abdulla Sur və Atababa Musaxanlı haqqında dəyərli və sanballı elmi araşdırmalar ortaya qoymuşdur. Bununla da Azərbaycan ədəbiyyatına böyük xidmətlər göstərmişdir. 

Filologiya üzrə fəlsəfə doktoru, Azərbaycan Dövlət Pedaqoji Universitetinin dosenti Razim Məmmədov çıxışında Abdulla Şaiqin mənzil-muzeyinin bünövrəsinin qoyulmasında Kamal Talıbzadənin misilsiz əməyi olduğundan söz açdı. Bildirdi ki, bu muzeyin yaradılması Bakı şəhərində digər ev-muzeylərinin fəaliyyətə başlamasına da mühüm töhfə vermişdir.

"Borçalı Cəmiyyəti" İctimai Birliyinin sədri Ramiz Həsənov çıxışında Kamal Talıbzadənin Borçalı gənclərinə göstərdiyi mənəvi dəstəyi tədbir iştirakçılarına xatırlatdı. Dedi ki, vaxtilə Borçalıdan təhsil almaq üçün gələn gənclərə Kamal müəllimin tövsiyələri və qayğıkeş münasibəti böyük dayaq olub. Kamal Talıbzadənin vəfatı xalqımız və ədəbiyyatımız üçün böyük itki oldu. 

Sözünü bitirdikdən sonra Ramiz Həsənov "Borçalı Cəmiyyəti" adından üzərində Kamal Talıbzadənin portreti həkk olunmuş xalçanı muzeyə hədiyyə etdi. Cəmiyyətin üzvü şair Səadət Novruz qızı Borçalıya həsr etdiyi şeirini söylədi.

Tədbirin bədii hissəsində qonaqlar muzeyin əməkdaşı Fəridə Məmmədovanın təqdimatında Abdulla Şaiqin oğlu Kamal Talıbzadəyə həsr etdiyi "Ata öyüdü" şeirini dinlədilər. 

Sonra "Muğam" Televiziya Müsabiqəsinin laureatı, istedadlı xanəndə Yusif Cəfərbəylinin, tar ifaçısı Səxavət Məmmədovun və kamança ifaçısı Mahir Quliyevin ifasında xalq mahnıları səsləndirildi.

Akademik Kamal Talıbzadənin həyat və yaradıcılığına həsr olunmuş videoçarx nümayiş etdirildi.

Yüksək ehtiram və hörmətlə keçirilən anım tədbiri bir daha göstərdi ki,  akademik Kamal Talıbzadənin elmi və mədəni irsi Azərbaycan xalqının yaddaşında daim yaşayacaq.

Vahid MƏHƏRRƏMOV,

"Azərbaycan"