Yanvarın 24-də Daxili İşlər Nazirliyinin (DİN) Arif Heydərov adına Respublika Hospitalında Tibb İdarəsinin əməkdaşlarının iştirakı ilə müşavirə keçirilmişdir.
DİN-in mətbuat xidmətindən bildirmişlər ki, müşavirəni açan daxili işlər naziri general-polkovnik Ramil Usubov Azərbaycan Prezidenti İlham Əliyevin apardığı siyasətin nəticəsi olaraq respublikamızın 2013-cü ili uğurla başa vurduğunu, bütün sahələrdə mühüm irəliləyişlər baş verdiyini və bunun daxili işlər orqanlarından da yan keçmədiyini bildirmişdir.
Ramil Usubov demişdir ki, son on ildə dövlət başçısının xüsusi diqqət və qayğısı sayəsində daxili işlər orqanlarının maddi-texniki bazasının möhkəmləndirilməsi, şəxsi heyətin xidməti şəraitinin daha da yaxşılaşdırılması istiqamətində mühüm addımlar atılmış, ən müxtəlif təyinatlı onlarla obyekt, o cümlədən DİN-in Arif Heydərov adına Respublika Hospitalının beynəlxalq standartlara cavab verən, çoxprofilli yeni inzibati binası tikilərək istifadəyə verilmişdir. Tibbi xidmətin müasir səviyyədə təşkil olunması üçün mövcud imkanlardan geniş istifadə olunduğu, ilk növbədə xəstəliyin daha əvvəl aşkarlanması və qarşısının alınmasında səyyar tibbi baxışların keçirilməsinin mühüm əhəmiyyət kəsb etdiyi diqqətə çatdırılmışdır. Qeyd olunmuşdur ki, həyata keçirilən tədbirlər bütövlükdə iş keyfiyyətinin və bu sahədəki müvafiq göstəricilərin yüksəlməsinə imkan vermişdir.
Daha sonra nazir Tibb İdarəsinin və A.Heydərov adına Respublika Hospitalının yeni rəislərini kollektivə təqdim etmiş və əmin olduğunu bildirmişdir ki, sürətlə dəyişən və inkişaf edən səhiyyə sistemləri ilə ayaqlaşa bilmək üçün müvafiq təkliflər hazırlanacaq, tibb işçilərimiz bütün bilik və bacarıqlarını sərf edərək əməkdaşlarımızın, onların ailə üzvlərinin, daxili işlər orqanları təqaüdçülərinin və ümumən, vətəndaşlarımızın sağlamlığı keşiyində ayıq-sayıq dayanacaqlar.
Tibb İdarəsinin rəisi Mahmud Yusifov və Hospitalın rəisi Ramiz Əkbərov onlara göstərilən yüksək etimadı doğruldacaqlarına, tibbi xidmətin daha da yaxşılaşdırılması, işdə olan nöqsan və çatışmazlıqların aradan qaldırılması üçün var qüvvələrini əsirgəməyəcəklərinə söz vermişlər.
AzərTAc
jpg_1779805202.jpg)
