Azərbaycan su ehtiyatlarının idarə olunması sistemində köklü islahatlar apararaq vahid institusional yanaşmaya və infrastrukturun genişmiqyaslı yenilənməsinə keçib.
AZƏRTAC xəbər verir ki, bu barədə Azərbaycan Dövlət Su Ehtiyatları Agentliyinin Strategiya, beynəlxalq əməkdaşlıq və elm şöbəsinin müdiri Riad Axundzadə Düşənbədə keçiriləcək “Davamlı inkişaf üçün su” Yüksək Səviyyəli Beynəlxalq Konfransına həsr olunmuş brifinqdə bildirib.
R. Axundzadə qeyd edib ki, 2020-ci ildə Azərbaycan su risklərinə ən çox həssas olan iyirmi ölkə arasında olub. Lakin son illərdə vəziyyət xeyli dəyişib. Ölkənin ərazi bütövlüyünün bərpası bu sahədə əsas amilə çevrilib.
O əlavə edib: “2020-ci ilin sonunda Azərbaycan daxili su ehtiyatlarının təxminən 25 faizinin yaradıldığı Qarabağ və Şərqi Zəngəzurun su yollarına çıxışı bərpa edib. Bu müddət ərzində Zabuxçay, Köndələnçay, Suqovuşan (hamısı su anbarlarıdır – red.) və Tərtərçay kanalı kimi layihələr uğurla başa çatdırılıb. Hazırda Yengicə və Əlicançay su anbarlarının tikintisi, eləcə də əsas kanalların yenidən qurulması işləri davam etdirilir”.
Su problemlərinin həllində institusional islahatlar mühüm addım olub. Əvvəllər idarəetmə üç qurum – “Azərsu”, “Meliorasiya və Su Təsərrüfatı” ASC və Fövqəladə Hallar Nazirliyinin müvafiq bölməsi arasında bölünmüşdüsə, 2023-cü ildə Dövlət Su Ehtiyatları Agentliyinin yaradılması bütün təşkilatların vahid bir strukturda birləşdirilməsinə imkan verib.
Şöbə müdirinin sözlərinə görə, Su Ehtiyatları üzrə Dövlət Komissiyasının və vahid agentliyin yaradılması artıq öz nəticəsini verib: Azərbaycan quraqlıq riski olduqca yüksək olan ölkələr siyahısından çıxarılıb.
Qlobal iqlim dəyişikliyinə və artan su tələbatına cavab olaraq, ölkə dövlət başçısı tərəfindən təsdiq edilmiş uzunmüddətli proqramlar - “2040-cı ilə qədər Su Strategiyası” və 2026-2035-ci illər üçün Bakı və Abşeron yarımadasında su təchizatının, yağış sularının və tullantı sularının təmizlənməsi sistemlərinin təkmilləşdirilməsi üzrə Dövlət Proqramı həyata keçirilir.
Bu sənədlər müasir texnologiyaların tətbiqini, şəbəkə itkilərinin azaldılmasını və su ekosistemlərinin qorunmasını hədəfləyir.
Tacikistan paytaxtında keçiriləcək konfransda iştirakla bağlı Riad Axundzadə vurğulayıb ki, Azərbaycan agentliyin rəhbərliyi tərəfindən yüksək səviyyədə təmsil olunacaq.
“Su sərhəd tanımır və onun effektiv idarə olunması beynəlxalq əməkdaşlıq olmadan mümkün deyil. Biz Düşənbəyə təkcə azad edilmiş torpaqlarda islahatlar və resursların bərpası təcrübəmizi bölüşmək üçün deyil, həm də ən yaxşı beynəlxalq təcrübələri öyrənmək üçün gedirik”, - deyə o sözlərini yekunlaşdırıb.
jpg_1778065470.jpg)
