"Hər bir şəhidin həyatı təkrarolunmazdır, hər bir şəhidin həlak olması onun yaxınları, qohumları üçün faciədir, böyük bir dərddir. Müharibə dövründə Azərbaycan hərbçiləri həm peşəkarlıq, həm rəşadət, cəsarət, qəhrəmanlıq, eyni zamanda fədakarlıq göstərmişlər. Şəhidlərimizin əziz xatirəsi hər birimiz üçün müqəddəsdir".
İlham Əliyev,
Azərbaycan Respublikasının Prezidenti
Dövlət başçısı İlham Əliyev 20 illik prezidentlik dövründə daim şəhid ailələrinin, müharibə əlillərinin yanında olub. Ümumxalq məhəbbəti qazanan İlham Əliyev hamı tərəfindən sevilir. Prezident İlham Əliyevin şəhid ailələrinə olan diqqət və qayğısı vətənin müdafiəçilərinə necə böyük önəm verdiyini bir daha göstərir.
Tez-tez şəhid ailələri ilə görüşən Prezident İlham Əliyev çıxışlarında Vətənin azadlığı uğrunda canından keçən oğulların döyüşlər zamanı göstərdiyi qəhrəmanlığı yüksək dəyərləndirir. Şəhidlərdən, onların nakam həyatlarından danışarkən Prezident kövrəlir, şəhid ailələrinin ağrı-acılarını bölüşür. Onların kədərlərini yüngülləşdirməyə, dərdlərinə şərik olmağa çalışır.
Müzəffər Ali Baş Komandan İlham Əliyevin tapşırığına əsasən, Vətən müharibəsində şəhidlik zirvəsinə ucalanların ailə üzvlərinin sosial müdafiəsinin möhkəmləndirilməsi, o cümlədən mənzil, fərdi ev və avtomobillərlə təmin edilməsi istiqamətində kompleks tədbirlər görülür. Şəhid ailələrinə sosial qayğı təkcə mənzil və avtomobil təminatı ilə bitmir. Bu kateqoriyadan olan insanların sağlamlıqlarının bərpası, daimi iş yerləri ilə təminatı məsələsi də dövlətimiz üçün mühüm əhəmiyyət kəsb edir.
Dövlət başçısı İlham Əliyev Vətən müharibəsinin davam etdiyi günlərdə də şəhid ailələrini, qaziləri tək qoymadı. Hospitallara, xəstəxanalara gedib yaralılarla görüşdü, onların qayğılarına qalmaq üçün müvafiq tapşırıqlar verdi. Prezidentin şəhid ailələri ilə görüşləri, çıxışları cəmiyyət tərəfindən də böyük sevgi və rəğbətlə qarşılanır. Prezident İlham Əliyev şəhid ailələri ilə görüşərkən yurdumuzun azadlığı uğrunda gedən döyüşlərdə böyük qəhrəmanlıqlar göstərərək canlarından keçmiş oğulların fədakarlığını yüksək dəyərləndirərək demişdir: "Mən yenə də deyirəm, ömrün əvvəli də, sonu da var, heç kim həyatda əbədi qalmır. Amma şəhid olmaq, bu, doğrudan da xalq qarşısında, tarix və gələcək nəsillər qarşısında böyük xidmətdir. Şəhid əbədi qalır, əməyi və qəhrəmanlığı əvəzolunmazdır. Çünki canını fəda edir ki, torpaqlar azad olunsun və ədalət bərpa olunsun, xalqımızın ləyaqəti bərpa olunsun. Çünki otuz il torpaqlarımız işğal altında qalıb və xalqımız mənəvi əzablar çəkib".
Prezident İlham Əliyev Vətən üçün cəsur övladlar böyütmüş valideynlərə minnətdarlıq edir, onlara dərin hörmətini bildirir.
Azərbaycan Prezidenti İlham Əliyev bundan sonra da şəhid ailələrinin yanında olacaq, onlara daim diqqət və qayğı göstərəcək. Tam inamla deyə bilərik ki, bu gün cəmiyyətdə böyük nüfuz sahibi olan, xalqın böyük sevgisini qazanmış dövlət başçısı fevral ayının 7-də keçiriləcək prezident seçkilərində rəqiblərini arxada qoyaraq qalib gələcək.
Vahid MƏHƏRRƏMOV,
"Azərbaycan"
