Ümumdünya Şəhərsalma Forumunun 13-cü Sessiyasının (WUF13) Bakıda keçirilməsi Azərbaycan üçün mühüm hadisədir və ölkənin dayanıqlı şəhərsalma sahəsində qazandığı təcrübənin beynəlxalq platformada təqdim olunması baxımından xüsusi əhəmiyyət daşıyır.
Bu sözləri AZƏRTAC-a məxsusi açıqlamasında Azərbaycan Respublikası Prezidentinin Cəbrayıl, Qubadlı və Zəngilan rayonları üzrə xüsusi nümayəndəsi Vahid Hacıyev söyləyib.
O qeyd edib ki, Azərbaycanda şəhərsalma gündəliyi üzrə aparılan müzakirələr ardıcıl xarakter daşıyır: “Milli Şəhərsalma Forumunun əvvəlcə Zəngilanda, daha sonra Ağdamda keçirilməsi, hazırda isə Ümumdünya Şəhərsalma Forumunun 13-cü Sessiyasının (WUF13) Bakıda təşkil olunması ölkəmizin bu sahədə artan rolunu göstərir”, - deyə xüsusi nümayəndə söyləyib.
V.Hacıyev vurğulayıb ki, işğal dövründə tamamilə dağıdılmış ərazilərdə genişmiqyaslı bərpa və yenidənqurma işləri həyata keçirilir: “Şəhər və kəndlər yenidən inşa olunur, bu proses isə müasir və innovativ yanaşmalar əsasında aparılır. Qarşıya qoyulan məqsədə uyğun olaraq yaşayış məntəqələri “ağıllı” konsepsiya əsasında formalaşdırılır”.
Prezidentin xüsusi nümayəndəsinin sözlərinə görə, Zəngilanın Ağalı kəndi artıq “ağıllı kənd” modeli kimi istifadəyə verilib, digər yaşayış məntəqələrində də eyni yanaşma tətbiq edilir.
“Biz bu təcrübəni beynəlxalq tərəfdaşlarla bölüşməkdən məmnunuq. Eyni zamanda, onların təcrübəsindən də faydalanırıq. Sıfırdan quruculuq işləri apardığımız və artıq real nəticələr əldə etdiyimiz üçün formalaşan təcrübə beynəlxalq səviyyədə də maraq doğurur”, – deyə Vahid Hacıyev əlavə edib.
