Rusiya-Ukrayna münaqişəsinin tənzimlənməsinə dair indiki sülh planının əsas komponentlərindən biri Ukraynaya etibarlı təhlükəsizlik təminatının verilməsidir. Prezident Volodimir Zelenski bəyan edir ki, Ukraynanın Budapeşt Memorandumundan neqativ təcrübəsi var. Ona görə də təhlükəsizlik təminatı verən ölkələrin parlamentlərində bu sənəd ratifikasiya olunmalıdır. İlk növbədə, ABŞ Konqresi bu təhlükəsizlik təminatını verməlidir.
Bu fikri AZƏRTAC-a açıqlamasında Berlində Ukrayna və ABŞ nümayəndə heyətlərinin sülh planına dair keçirdikləri ikigünlük müzakirələrin nəticələrini şərh edərkən ukraynalı siyasi ekspert İvan Us söyləyib.
“Berlin danışıqlarından sonra tərəflərin sülh planına dair uğurların əldə edildiyinə dair bəyanatlarına baxmayaraq, mən ciddi nəticənin əldə olunduğunu söyləyə bilmərəm. Bəli, danışıqlar davam etdirilir, Ukrayna Trampa birbaşa yox deməyə hazır deyil. Çünki xüsusilə silahların satışı, kəşfiyyat məlumatlarının ötürülməsi və iqtisadi məsələlərdə Amerikadan asılılıq qalır. Rəsmi Kiyev Amerikanın təzyiqi altında qalmaq istəmir. Ona görə də hər danışıqda Ukrayna rəsmi Vaşinqtonun təzyiqi ilə üzləşəndə, ortalığa tərəfdaş Avropa ölkələri çıxır və bəyan edirlər ki, Ukrayna meydanda tək deyil. Avropa Birliyi də var. İndi əsas rolu Almaniya oynayır. Əvvəllər daha çox Böyük Britaniya bu rolu üzərinə götürmüşdü. İndi baxaq görək, Avropa Birliyi ölkələri də nə dərəcədə sözdə yox, əməldə Ukraynanı dəstəkləyəcəklər”, - deyə İvan Us əlavə edib.
Ukraynalı ekspert hesab edir ki, Amerika münaqişə tərəflərinə təzyiqlərini davam etdirə bilər, ancaq fakt odur ki, hələ nəticə yoxdur. “Baxaq görək, proseslərin davamı necə olacaq. Ukrayna sülh planının beynəlxalq hüquq prinsipləri, həmçinin Amerikanın qanunvericiliyinin prinsipləri çərçivəsində müzakirələrinə hazırdır. ABŞ-ın Dövlət Departamenti və Konqresinin ekspert rəyi olmadan digər ölkələr üçün hər hansı məsələnin müzakirəsini aparmaq düzgün deyil. Bundan əlavə, Trampın özü 2017-ci ilə qanun imzalayıb. Həmin qanuna görə, Rusiyanın işğal etdiyi ərazilər Rusiyanın ərazisi kimi tanınmayacaq. Lakin biz rəsmi Vaşinqtonun sülh planında təqdim etdiyi müddəalarda Amerika qanunvericiliyinin prinsiplərinin pozulmasını görürük. Sözsüz ki, qanunvericiliyi dəyişmək olar, ancaq bunun üçün səsvermə olmalıdır. Tramp buna gedəcəkmi, bu sual açıq olaraq qalır”, - deyə ukraynalı ekspert vurğulayıb.
png_1765896393.png)
