Donald Trampın Amerika Prezidenti seçiləndən dərhal sonra aydın idi ki, Bayden administrasiyası dövründə Ukrayna ilə bağlı yürüdülən dəstək siyasəti dəyişəcək. Aydındır ki, Baydendən fərli olaraq, Tramp Rusiya Prezidenti Putinlə danışıqlara hazırdır. Artıq məlumdur ki, bu danışıqlar baş tutub. Tramp Putinlə danışandan dərhal sonra Ukrayna Prezidenti Volodimir Zelenski ilə də telefonla danışıb. Bu telefon zəngi bir saata yaxın davam edib. Bu, münaqişənin həlli istiqamətində danışıqların başlanması üçün müsbət mesajdır.
Bu sözləri AZƏRTAC-a açıqlamasında ukraynalı politoloq İvan Us söyləyib.
İvan Us hesab edir ki, Donald Trampın səylərinə baxmayaraq, münaqişənin tezliklə həlli çətin görünür.
“Tramp münaqişənin həlli üçün problemi tez həll etmək istəsə də, ABŞ Müharibənin Araşdırılması İnstitutunun açıqlamasında görə, Rusiya hər hansı güzəştə hazır deyil. Rəsmi Moskva müharibənin əvvəlində elan etdiyi məqsədə çatmaq istəyində olduğunu bildirir. Ukrayna isə bu planda danışıqlara, görüşlərə hazır deyil. Ukrayna sülh danışıqları istəsə də, danışıqlar xatirinə müharibə vaxtı törədilən cinayətləri, vəhşilikləri, maddi ziyanları unutmayacaq. Hələ 2024-cü ilin sentyabrında müharibə nəticəsində Ukraynaya dəyən maddi ziyan 1 trilyon 164 milyard dollar qiymətləndirilib. Ona görə düşünmürəm ki, Ukrayna Rusiyanın istəyini qəbul etsin”, - deyə ukraynalı ekspert əlavə edib.
Politoloqun fikrincə, sözsüz ki, danışıqlarda ABŞ-la yanaşı, Avropa ölkələri də iştirak etməlidir və edəcək.
“Amerika rəsmiləri özləri də deyirlər ki, ABŞ münaqişənin həllində birbaşa fəal rol oynamayacaq, Avropa ölkələri vasitəsilə münaqişənin həllinə çalışacaq. Sözsüz ki, Amerikadan yenə də silah, maliyyə yardımı istəniləcək, ancaq çox güman ki, bu yardımlar olmayacaq. Ukrayna üçün sərfəli sülhün olması və ya münaqişənin həlli ilə bağlı Rusiyadan kompensasiyanın istənilməsi danışıqların ikinci mərhələsi ola bilər. Ancaq Ukrayna başa düşür ki, Rusiyanın məqsədi bu ölkəni tamamilə məhv etməkdir. Uzunmüddətli, etibarlı sülhün əldə olunması üçün Rusiya dövlətinin fəlsəfəsi və indiki hakimiyyət dəyişməlidir. Ona görə də Ukrayna tərəfdaş ölkələrlə işləməkdə davam edəcək. Bildirəcək ki, ya etibarlı sülhə nail olunmalıdır, ya da sülh xatirinə sülhün bağlanması mümkünsüz olacaq”, - deyə İvan Us vurğulayıb.
png_1765896393.png)
