Ermənistan rəsmilərinin ölkəni Avrasiyanın böyük tranzit-ticarət mərkəzinə çevirmək istəkləri ilə bağlı bəyanatları İrəvanın destruktiv və əməkdaşlıqdan uzaq siyasi kursuna ziddir. Ölkəni demək olar ki, yeni özünütəcrid mərhələsinə sürükləyiblər.
AZƏRTAC xəbər verir ki, bu fikirləri türkiyəli analitik Bekir Caner Şafak söyləyib. Ekspert erməni mediasının davamlı olaraq reallıqları, aşkar faktları təhrif etməsinə və Orta Dəhlizin yalnız Ankara və Bakının maraqlarına cavab verən layihə kimi təqdim etməyinə diqqət çəkib. Bununla yanaşı, İrəvanda bütün diqqətləri yalnız Şimal – Cənub layihəsinə yönəltməyə və “Dünya kəsişməsi” də daxil olmaqla, digər marşrutlardan imtina etməyə çağırışlar edilir.
“Ermənistanda Baş nazir Nikol Paşinyanın tənqidçiləri bildirirlər ki, Rusiya və İran kimi “ənənəvi müttəfiqlərdən” uzaqlaşmağa və Qərblə yaxınlaşmağa görə İrəvan heç bir ciddi dividend almır”, - deyə Bekir Caner Şafak qeyd edib. O, həmçinin Azərbaycan Prezidenti İlham Əliyevin bu sözlərini də xatırladıb və bildirib ki, Ermənistan tərəfindən təklif olunan regional nəqliyyat kommunikasiyalarının açılması variantı olan “Dünya kəsişməsi” layihəsi rəsmi Bakı ilə razılaşdırılmasa, “sadəcə kağız parçası”dır və həyata keçirilməyəcək.
Ekspert qeyd edib ki, Zəngəzur dəhlizinin Orta Dəhlizə inteqrasiya edilməsi, şübhəsiz regional inkişafa töhfə verəcək. Onun sözlərinə görə, Azərbaycan ilə Türkiyə Avropa və Asiya arasında qlobal tədarük zəncirində baş verən dəyişikliklər fonunda Orta Dəhlizin artan strateji əhəmiyyətini dərk edir.
“Əgər 2022-ci ilin əvvəlinə kimi Çindən Avropaya yük daşınmalarının böyük hissəsi Rusiya vasitəsilə həyata keçirilirdisə, son bir neçə ildə tədarükçülər alternativ yollardan, xüsusilə heç bir sanksiyaya məruz qalmayan Orta Dəhlizdən istifadə edirlər”, - deyə ekspert vurğulayıb.
Bekir Caner Şafak Dünya Bankının statistikasına istinad edərək, qlobal ticarətin 2030-cu ilə kimi modelləşdirilməsinə dair məlumatları da bölüşüb: “Bu proqnozlara əsasən, Türkiyə və Azərbaycandan da keçməklə, Orta Dəhliz marşrutu ilə Çindən Avropaya yük daşınmalarının həcmi yaxın illərdə üç dəfə artacaq. Bu marşrut Mərkəzi Asiya və Cənubi Qafqazda qarşılıqlı faydalı tərəfdaşlıq üçün gözəl imkandır”.
O qeyd edib ki, Orta Dəhliz Çin və Avropa İttifaqı da daxil olmaqla, bütün tərəflərin maraqlarına cavab verir.
jpg_1777642897.jpg)
