Bu ayın əvvəlində keçirilən Bakı Enerji Həftəsi çərçivəsində BP və SOCAR (Azərbaycan Respublikası Dövlət Neft Şirkəti) daha iki sövdələşməni rəsmiləşdirən sazişlərə imza atdılar. Bununla da BP-nin Xəzərin Azərbaycan sektorunda yerləşən iki dəniz kəşfiyyat və işlənmə blokunda iştirak payları alması prosesi başa çatdı.
Birinci blok Bakıdan 120 kilometr şərqdə, "Günəşli" yatağından 20-25 kilometrlik məsafədə, suyun 150-200 metr dərinliyində yerləşən "Qarabağ" neft yatağıdır. Yatağın işlənməsi üzrə 2018-ci ildə imzalanmış Risk Xidməti Sazişi (RXS) mövcuddur.
İkinci blok isə paytaxtımızdan 90-110 kilometr şimal-şərqdə, suyun 80-180 metr dərinliklərində yerləşən "Əşrəfi-Dan Ulduzu-Aypara" (ADUA) sahəsidir. Bu sahə bir sıra mövcud kəşf olunmuş və perspektiv strukturları əhatə edir. ADUA sahəsinə aid Hasilatın Pay Bölgüsü Sazişi (HPBS) də 2018-ci ildə imzalanıb.
BP iki sazişin - RXS-nin və HPBS-in hər birində SOCAR-dan 35 faizlik iştirak payı alıb. Hər iki sazişdə qalan 65 faizlik iştirak payını SOCAR özündə saxlayacaq. Hər iki müqavilə üzrə operator BP olacaq.
BP-nin pay əldə etməsini rəsmiləşdirən sazişləri SOCAR-ın prezidenti Rövşən Nəcəf və BP-nin Azərbaycan, Gürcüstan və Türkiyə üzrə regional prezidenti Qəri Counz imzalayıblar.
SOCAR-ın prezidenti Rövşən Nəcəf bununla bağlı deyib: "Bu yeni sazişlər vasitəsilə BP ilə strateji tərəfdaşlığımızı daha da genişləndirməkdən məmnunuq. "Qarabağ" və "Əşrəfi-Dan Ulduzu-Aypara" sahələri əhəmiyyətli potensiala malikdir və BP-nin operatorluq təcrübəsi bu sahələrin tam dəyərinin açılmasında həlledici rol oynayacaq. Bu əməkdaşlıq Ulu Öndər Heydər Əliyev tərəfindən əsası qoyulmuş və Prezident İlham Əliyevin rəhbərliyi ilə davam etdirilən uzaqgörən strategiyaya əsaslanır və etibarlı qlobal enerji tərəfdaşı kimi mövqeyimizi daha da gücləndirir. BP ilə möhkəm əməkdaşlığımızın yeni uğurlar gətirəcəyinə inanırıq".
BP-nin hasilat və əməliyyatlar üzrə icraçı vitse-prezidenti Qordon Birrell yeni sövdələşmə ilə bağlı fikrini belə ifadə edib: "Bu Azərbaycana yeni bir öhdəliyimiz olmaqla həm də əhəmiyyətli bir potensial artım imkanıdır. Mövcud iri fəaliyyət mövqelərimizə və tərəfdaşlıqlarımıza əsaslanaraq apstrim neft-qaz biznesimizi genişləndirmək strategiyamız üçün çox vacibdir".
Q.Birrell həmçinin xatırladıb ki, BP-nin Azərbaycanda dünya səviyyəli hasilat və ixrac infrastrukturunun idarə edilməsində və ona sərmayə qoyulmasında 30 ildən çox uğurlu təcrübəsi var. SOCAR-la imzalanan müqavilələr kimi yeni imkanlar isə qarşıdakı məqsədlərə çatmaqda mühüm rol oynayacaq: "SOCAR-la uzunmüddətli tərəfdaşlığımıza əsaslanaraq buradakı mövcud infrastrukturdan ən səmərəli şəkildə istifadə etməyə imkan yaradacaq yeni işlənmə variantlarını müəyyənləşdirəcəyik. Operator olaraq isə biz bu layihələrin irəliləyişini sürətləndirmək üçün qlobal təcrübəmizi, texniki və kommersiya biliklərimizi, qabaqcıl texnologiyalarımızı və maliyyə resurslarımızı gətirərək onları təhlükəsiz və səmərəli şəkildə icra edəcəyik".
Flora SADIQLI,
"Azərbaycan"
