Çin Xalq Respublikasının Sədri Si Cinpin bildirib ki, ABŞ və İsrailin hücumları və İranın cavab zərbələri nəticəsində Yaxın Şərqdə artan münaqişə səbəbindən bağlanmış Hörmüz boğazı normal gəmiçilik üçün açıq qalmalıdır.
Çin Xarici İşlər Nazirliyinin açıqlamasına görə, dövlət başçısı Səudiyyə Ərəbistanının vəliəhd şahzadəsi Məhəmməd bin Salmanla telefon danışığı aparıb.
Hörmüz boğazının açıq qalmasının region ölkələrinin və beynəlxalq ictimaiyyətin ortaq maraqlarına xidmət etdiyini qeyd edən Si Cinpin beynəlxalq gəmiçilik yolunun normal gəmiçilik üçün açıq qalmalı olduğunu qeyd edib.
Orta Şərq və Fars körfəzi bölgəsindəki vəziyyətdən danışan Si, Çinin dərhal və hərtərəfli atəşkəsin tərəfdarı olduğunu və mübahisələrin siyasi və diplomatik yollarla həllinə sadiq qalaraq bütün sülh səylərini dəstəklədiyini bir daha vurğulayıb.
Çin lideri ölkəsinin region ölkələrinin mehriban qonşuluq, inkişaf, təhlükəsizlik və əməkdaşlığa əsaslanan ortaq bir ev qurmaq və regionda davamlı sülh və sabitlik yaratmaq üçün taleyini və gələcəyini öz əllərinə almaq istəklərini dəstəklədiyini bildirib.
Vəliəhd bin Salman həmçinin Yaxın Şərqdəki müharibənin Körfəz ölkələrinin təhlükəsizliyinə zərər verdiyini və qlobal enerji təchizatına və iqtisadi fəaliyyətə mənfi təsir göstərdiyini qeyd edərək, Səudiyyə Ərəbistanının münaqişələrin və fikir ayrılıqlarının dialoq yolu ilə həll edilməsini dəstəklədiyini və gərginliyin artmasının qarşısının alınacağına ümid etdiyini bildirib.
Məlum olduğu kimi, Hörmüz boğazında gəmilərin hərəkəti hərbi əməliyyatlara görə faktiki olaraq dayandırılıb.
ABŞ və İsrailin İrana hücumları və İranın cavab zərbələri nəticəsində Fars körfəzində münaqişənin artması səbəbindən qlobal mal və enerji ticarəti üçün vacib dəhliz olan Hörmüz boğazında gəmiçilik bağlanıb.
Səudiyyə Ərəbistanı, Birləşmiş Ərəb Əmirlikləri (BƏƏ), Küveyt, Qətər, İraq və İrandan karbohidrogen ehtiyatlarının qlobal bazarlara daxil olduğu Hörmüz boğazı dünya neft ticarətinin təxminən 25 faizi, mayeləşdirilmiş təbii qaz ticarətinin təxminən 20 faizi və gübrə ticarətinin təxminən 30 faizi üçün əsas marşrutdur.
Çinin neft idxalının təxminən 45 faizi və mayeləşdirilmiş təbii qazın 30 faizi ölkəyə Fars körfəzi və Hörmüz boğazı vasitəsilə daxil olur.
Boğazda tankerlərin hərəkətində yaranan fasilələr artıq qlobal neft tədarükündə fasilələrə və neft qiymətlərinin artmasına səbəb olub.
Rizvan CƏFƏROV,
“Azərbaycan”
jpg_1776775969.jpg)
