Sabitlik hər bir dövlət üçün ən böyük nailiyyətlərdən biri hesab olunur. Çünki sabitlik olan yerdə inkişaf da var, rifah da. Sabitlik olmadan heç bir dövlət öz məqsədlərinə doğru addımlaya bilməz. Sabitliyə nail olmadan milli və siyasi həmrəylik də mümkün deyil. Ölkəyə qlobal miqyasda nüfuz gətirən meyarlardan biri də məhz sabitlikdir.
Çağdaş dünya təbəddülatlarla doludur
Təəssüflə qeyd edilməlidir ki, planetimizin reallıqları mürəkkəb olaraq qalmaqdadır. Dünyanın hər yerində hərbi və siyasi böhranlar, münaqişələr, gərginliklər, kataklizmlər davam edir. Görünən həm də odur ki, çağdaş dövrdə sabitliyə nail olmaq hər dövlətə və xalqa nəsib olan məsələ deyil.
Ən ağrılısı da odur ki, xüsusən müharibələr, daxili münaqişələr dövlətlərin və insanların faciələri ilə müşahidə olunur. Bunun nəticəsində bütöv xalqların, günahsız insanların ağır məhrumiyyətlərlə üz-üzə qalaraq, humanitar fəlakətlərə düçar olmaları acı reallıqlardır. Hər bir müharibə, münaqişə həm də iqtisadi, milli və mənəvi tənəzzül deməkdir. Məhv olunan iqtisadiyyatların bərpası üçün onilliklər belə kifayət eləmir.
Azərbaycana yaxın coğrafiyalarda da mürəkkəb və təzadlı siyasi-hərbi hadisələr baş verməkdədir. Terrorçuluğun baş alıb getməsi, bitməyən siyasi çəkişmələr, dini məzhəb arasındakı dözümsüzlüyün yaratdığı münaqişələr bir sıra ölkələrin illərdir ki, davam edən mənzərəsidir. Onların siyasi və dini qarşıdurmaları dərin təbəddülatlara gətirib çıxarıb. Bütün bu deyilənlər bir daha təsdiq edir ki, sabitlik hər bir dövlət və xalq üçün vacib nemətdir.
Dünyada davam edən hərbi-siyasi təbəddülatlar şəraitində Azərbaycanda möhkəm sabitliyin hökm sürməsi dövlətimizin böyük neməti, xalqımızın mühüm uğurudur. Respublikamızın inkişafının, qazandığı bütün nailiyyətlərin təməlində duran əsas səbəblərdən biri məhz siyasi-ictimai sabitlikdir. Prezident İlham Əliyevin qeyd etdiyi kimi, Azərbaycan dünyada sabitlik məkanı, sabitlik adası kimi tanınır.
Azərbaycan da bir vaxtlar qeyri-sabitliyin, hərbi-siyasi böhranların doğurduğu çətinliklərdən, dolanbaclardan keçib. Ötən əsrin 90-cı illərinin əvvəllərində respublikamızda cərəyan edən xaotik proseslər orta və yaşlı nəslin xatirindədir. Müstəqilliyimizin ilk illərində hakimiyyətdə olan qüvvələrin yarıtmaz fəaliyyətləri nəticəsində dövlət idarəçiliyi tamamilə iflic vəziyyətinə düşmüş, ölkədə separatizm meyilləri baş qaldırmış, vətəndaş qarşıdurması təhlükəsi yaranmışdı. Bütün bunlar isə öz növbəsində yenicə qazandığımız dövlət müstəqilliyimiz və bütövlükdə dövlətçiliyimiz üçün böyük təhdidlər yaradırdı. Anarxiyanın, xaosun, siyasi çəkişmələrin güclənməsi, Gəncədə hərbi qarşıdurmanın baş verməsi, qeyri-sabitliyin yaranması dövlət və xalq üçün nə qədər təhlükəli olduğunu göstərirdi.
Yalnız xalqımızın Ulu Öndəri Heydər Əliyevin 1993-cü ilin iyun ayında siyasi hakimiyyətə gəlişi və ölkə Prezidenti seçilməsindən sonra Azərbaycan bütün problemlərdən xilas oldu. Ulu Öndərin o zaman böyük uzaqgörənliklə həyata keçirdiyi əsas tədbirlərdən biri ölkədə siyasi-ictimai sabitliyin təmin edilməsi oldu. Sabitlik üçün təhlükə doğuran zərərli meyillərə, qanunsuz silahlı birləşmələrə qarşı uğurlu və təxirəsalınmaz tədbirlər həyata keçirildi. Məhz bundan sonra qarşıya qoyulan bütün milli vəzifələrin reallaşdırılması üçün münbit tarixi şərait formalaşdı.
İlham ƏLİYEV: "Sabitlik və əmin-amanlıq əbədi olacaqdır".
Prezident İlham Əliyevin fəaliyyətində diqqətçəkən məsələlərdən biri respublikamızda bərqərar olmuş sabitliyin qorunması və daha da möhkəmləndirilməsidir. Məhz bu sabitliyin nəticəsidir ki, respublikamız sürətli inkişafa nail olub, qarşısına qoyduğu bütün məqsədlərə uğurla çatıb. Təsadüfi deyil ki, Azərbaycan bütün dünyada güclü sabitliyin olduğu ölkə kimi tanınır. Azərbaycan nəinki MDB məkanında, hətta Avropanın inkişaf etmiş ölkələri ilə müqayisədə təhlükəsiz dövlətlərdən biri sayılır. Bakının beynəlxalq tədbirlərin mərkəzinə çevrilməsinin, ölkəmizin xarici turistlər üçün cəlbedici olmasının da səbəbi məhz sabitlikdir. Sabitlik həm də xarici iş adamlarının Azərbaycana investisiya yatırmalarında da əsas amil kimi özünü göstərir.
Xüsusilə qeyd edilməlidir ki, Vətən müharibəsində torpaqlarımızın işğaldan azad olunması, o cümlədən Qarabağda erməni separatçılığının darmadağın edilməsi nəticəsində Ermənistanın yalnız Azərbaycana deyil, bütün regiona yaratdığı təhdidlərə birdəfəlik son qoyulub.
Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqımıza müraciətində respublikamızda hökm sürən sabitliklə bağlı deyib: "Ölkəmizdə sabitlik hökm sürür. Azərbaycan xalqı təhlükəsizlik şəraitində yaşamışdır. Bu gün dünyada baş verən hadisələr hamımızın gözünün qarşısındadır. Yeni müharibələr, qarşıdurmalar, münaqişələr alovlanır. Dünyanın müxtəlif bölgələrində qanlı toqquşmalar davam edir. Azərbaycan isə sülh, əmin-amanlıq, təhlükəsizlik və sabitlik şəraitində yaşayır. Əminəm ki, bundan sonra sabitlik və əmin-amanlıq əbədi olacaqdır".
Azərbaycan hazırda öz tarixinin ən qüdrətli dövrünü yaşayır. Respublikamızda möhkəm milli və siyasi həmrəylik, o cümlədən sarsılmaz xalq-iqtidar birliyi mövcuddur. Ölkəmizdəki bütün xalqların və dinlərin nümayəndələri dostluq və qardaşlıq şəraitində yaşayırlar. Həm də xalqımız yüksək milli və mədəni təfəkkürə malikdir. Bu baxımdan heç bir riyakar məqsəd Azərbaycandakı daxili sabitliyə təhdid yarada bilməz. Bütün bunların fonunda Azərbaycan dünyaya sabitliyin ən mükəmməl nümunəsini təqdim edir.
Rəşad CƏFƏRLİ,
"Azərbaycan"
jpg_1775472819.jpg)
