Rumıniyanın “HotNews” nəşrində dərc olunan geniş təhlildə Balkan regionunda enerji təhlükəsizliyi, gələcəyin qaz kəmərləri və Avropa İttifaqı ilə enerji inteqrasiyası məsələləri müzakirə olunur. Məqalədə qeyd edilir ki, Balkan ölkələri enerji bazarlarının birləşdirilməsi və yeni qaz marşrutlarının inkişafı istiqamətində daha sürətli qərarlar gözləyirlər.
AZƏRTAC xəbər verir ki, məlumatda Yunanıstanın enerji naziri Stavros Papastavrounun Avropanın enerji təhlükəsizliyində təmiz enerji ilə yanaşı sabit baza enerjisinin də vacib olduğunu qeyd etdiyi bildirilib.
Onun sözlərinə görə, bərpaolunan enerji mənbələrinin artmasına baxmayaraq, region üçün təbii qaz hələ də strateji əhəmiyyət daşıyır.
Təhlildə Azərbaycanın Avropanın enerji təhlükəsizliyində rolu xüsusi vurğulanır. Məqalədə qeyd edilir ki, Cənub Qaz Dəhlizi artıq Balkanlar və Mərkəzi Avropa üçün əsas alternativ enerji marşrutlarından birinə çevrilib. Azərbaycan qazının Trans-Anadolu və Trans-Adriatik boru kəmərləri vasitəsilə Avropaya nəqli region ölkələrinin enerji diversifikasiyası baxımından strateji əhəmiyyət daşıyır.
Məqalədə Şimali Makedoniyanın energetika naziri Sanja Bozinovskanın açıqlamalarına da yer verilir. O bildirib ki, Yunanıstan–Şimali Makedoniya qaz interkonnektorunun 2027-ci ilin yayında istifadəyə verilməsi planlaşdırılır. Layihənin ilkin ötürmə gücünün 1,2 milyard kubmetr olacağı, sonradan isə 2,8 milyard kubmetrə qədər artırılacağı qeyd olunur. Nazir, həmçinin yeni kəmərlərin gələcəkdə hidrogen nəqlinə uyğun şəkildə inşa edildiyini vurğulayıb.
Serbiyanın energetika naziri Dubravka Đedović Handanović isə Balkan ölkələrinin Avropa enerji bazarına inteqrasiyasının ləng getməsini tənqid edib. Onun sözlərinə görə, enerji bazarlarının parçalanmış vəziyyətdə qalması həm Balkan ölkələrinə, həm də Avropa İttifaqına zərər verir. Nazir bildirib ki, Serbiya 2035-ci ilə qədər enerji infrastrukturuna 14,4 milyard avro sərmayə yatırmağı planlaşdırır.
Məqalədə Albaniyanın infrastruktur və energetika naziri Enea Karakaçinin də açıqlamaları yer alır. O qeyd edib ki, Albaniya Avropa İttifaqının enerji və dekarbonizasiya siyasətinə uyğun addımlar atsa da, bunun real iqtisadi faydalarını hələ tam görmür. Nazir ABŞ mayeləşdirilmiş təbii qazının Albaniyaya tədarükü ilə bağlı imzalanmış uzunmüddətli müqavilənin ölkəsinin enerji təhlükəsizliyini gücləndirəcəyini bildirib.
Məqalədə vurğulanır ki, Balkan regionu Avropa enerji xəritəsində getdikcə daha mühüm tranzit və bağlantı mərkəzinə çevrilir. Xüsusilə Azərbaycan qazı, Şərqi Aralıq dənizi resursları və ABŞ LNG-si regionun enerji balansında əsas amillərdən biri kimi qiymətləndirilir. Balkan ölkələri hesab edir ki, enerji inteqrasiyası və yeni qaz kəmərləri Avropanın enerji təhlükəsizliyi üçün strateji əhəmiyyət daşıyır.
png_1778856264.png)
