Vyanada fəaliyyət göstərən Azərbaycan Mədəniyyət Mərkəzində Novruz bayramına həsr olunmuş tədbir keçirilib.
AZƏRTAC xəbər verir ki, tədbirdə Vyanada akkreditə olunmuş diplomatik korpusun və beynəlxalq təşkilatların təmsilçiləri, bu ölkədə yaşayan həmvətənlərimiz və avstriyalı qonaqlar iştirak ediblər.
Azərbaycan Mədəniyyət Mərkəzinin rəhbəri Leyla Qasımova tədbirdə çıxış edərək baharın müjdəçisi olan Novruz bayramı haqqında qonaqlara məlumat verib. O, Novruz bayramının adət-ənənələrinin dünya mədəni irsinin mühüm tərkib hissəsi olduğunu, dünya mədəniyyəti və incəsənətinə xüsusi töhfə verdiyini vurğulayıb və bu tədbiri mədəniyyətlər və dinlər arasında sərhədlər tanımayan dostluq rəmzi kimi qiymətləndirib. Diqqətə çatdırılıb ki, yeni başlanğıcın, sülh və əmin-amanlığın simvolu olan Novruz xalqımızın ən sevilən bayramları sırasında öndə gəlir və xalqımız qədim tarixə malik bu bayramı həmişə böyük sevgi ilə qeyd edir.
Qeyd edilib ki, Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın sayəsində xalqımızın bu əziz bayramı 2009-cu ildə UNESCO-nun Qeyri-maddi mədəni irs siyahısına daxil edilib. 2010-cu ildə isə BMT Baş Məclisi 21 mart tarixini Beynəlxalq Novruz Günü elan edib. 2011-ci ildə isə ATƏT-in Vyanada yerləşən Baş Katibliyi Novruzu rəsmi bayramlar təqviminə daxil edib.
Tədbirin bədii proqramında dahi Azərbaycan bəstəkarı Üzeyir Hacıbəylinin “Arşın mal alan” operettasından parçalar təqdim olunub. Bir neçə ay öncə Vyanada yeni tərtibatda almanca səhnələşdirilmiş əsərin solistləri ariya və duetlərlə çıxış ediblər. Ceyms Park (Əsgər), Günel Şirinova (Gülçöhrə), Lukas Kartsel (Süleyman və Vəli), Karoline Hat (Asya), Ramin Dustdar (Soltan bəy) “Arşın mal alan” operettasından müxtəlif ariya və duetləri məharətlə səsləndiriblər. Onları fortepianoda tamaşanın bədii rəhbəri və dirijoru Maykl Şnak müşayiət edib.
Konsertdən sonra qonaqlara Azərbaycan şirniyyatlarından ibarət bayram hədiyyələri paylanıb.
jpg_1777583345.jpg)
