Cəbrayıl, Zəngilan, Füzuli şəhərlərində etibarlı su təsərrüfatı sistemi qurulur
İşğaldan azad olunmuş ərazilərin dirçəldilməsi istiqamətində görülən işlər səngimir. Ermənilərin 30 il ərzində xaraba qoyduqları, yağmaladıqları Qarabağ və Şərqi Zəngəzur gözümüzün qarşısında yenidən qurulur, ilbəil, aybaay deyil, günbəgün simasını dəyişir. İndi bu ərazilərdən tankların, PDM-lərin yox, tikinti texnikalarının səsi kəsilmir.
Azərbaycan Dövlət Su Ehtiyatları Agentliyi də bu quruculuq işlərindən kənarda qalmır. Agentlik bu gün Şərqi Zəngəzur və Qarabağda su təsərrüfatı sahəsində irimiqyaslı işlər həyata keçirir, regionun keyfiyyətli, dayanıqlı içməli su ilə təmin olunması üçün təxirəsalınmaz bərpa və tikinti işləri aparır.
Cəbrayıl şəhərinin agentliyin sifarişi ilə icra olunan su təchizatı və kanalizasiya sistemlərinin tikintisi layihəsi 2040-cı ilədək perspektiv inkişaf nəzərə alınmaqla 15 min nəfərin tələbatının ödənilməsinə hesablanıb. Xatırladaq ki, şəhərdə ötən il geoloji kəşfiyyat quyusu qazılıb. Ümidlər doğrulub - seçilmiş mənbənin məhsuldarlığı və suyun keyfiyyət göstəriciləri şəhəri və ətraf kəndləri içməli su ilə təmin etməyə imkan verir.
Cəbrayıl şəhərinin şimalında ümumilikdə 9 subartezian quyusunun qazılması layihələndirilib və artıq bu istiqamətdə işlərə başlanılıb. İlkin mərhələdə 3 quyu qazılacaq. Cəbrayıl şəhər ərazisində isə 3 artezian quyusunun birinci mərhələsində qazıntı işləri nəzərdə tutulub. Məhsuldarlığı saniyədə 12 litr olan quyulardan biri - 6 saylı subartezian quyusunun idarəetmə otağı istifadəyə verilib. Agentlikdən bildirirlər ki, şəhərdə məskunlaşacaq əhalinin sayı artdıqca yeni quyular da qazılacaq.
Qarabağ Regional Sukanal İdarəsinin rəis müavini Oqtay Həziyevin dediyinə görə, ərazidə hər birinin tutumu 1000 kubmetr olan 2 anbar tikilir. İlk anbar test sınağından keçirilərək istismara verilib. Üstəlik, şəhərin çıxışından 600 diametrlik boru ilə 5300 metr məsafədə kanalizasiya xətti çəkilib. İkinci anbarın isə 1000 kubmetr hissəsinin dəmir-beton işləri yekunlaşıb. Hazırda izoliyasiya işləri görülür. Siyirtmə kamerasında və gözətçi otağında da işlər tamamlanıb. 280 diametrlik boru ilə şəhərin giriş nöqtəsinə qədər olan 1177 metr magistral xətt də tam hazırdır.
Bunlardan əlavə, ərazidə müasir standartlara cavab verən modul tipli tullantı sutəmizləyici qurğu quraşdırılıb. Görülən işlər zəmanət verir ki, Cəbrayıla köçürülən sakinlər fasiləsiz, dayanıqlı və keyfiyyətli içməli su ilə təmin olunsunlar.
Zəngilan şəhərində də 2020-ci il oktyabr ayından sakinlərin məskunlaşdığı ərazilər, o cümlədən idarə və təşkilatlar, mənzillər, fərdi yaşayış evləri 24 saat su ilə təmin olunur. Agentliyin Qarabağ Regional Su İdarəsinin Zəngilan Sukanal Sahəsinin sahə rəisi Rəşad Sadıqlının sözlərinə görə, layihəyə əsasən, Azərbaycan Dövlət Su Ehtiyatları Agentliyi tərəfindən Zəngilan şəhərinə fasiləsiz və dayanıqlı suyun verilməsi məqsədilə hər birinin tutumu 4000 kubmetr olmaqla 2 su anbarı inşa olunur. Bundan savayı, hər birinin tutumu 100 kubmetr olmaqla 2 su anbarı da tikiləcək. Layihə çərçivəsində həmçinin yağış sularının idarə olunması üçün bir kilometrlik yağış su xəttinin çəkilməsi nəzərdə tutulur.
Paralel olaraq perspektiv plana uyğun 9 subartezian quyusunun və nasosxananın inşası planlaşdırılır. Layihə çərçivəsində 9 kilometrlik məsafədən çəkilən çirkli su kollektor xəttinin tikintisi isə yekunlaşmaq üzrədir - işlərin artıq 83 faizi tamamlanıb. Tamamlanan 2046 metr magistral su xəttindən 1352, artezianlararası 1837 metr su xəttindən 1143 metr xətlərin çəkilməsidir.
Analoji işlər Füzuli şəhərində də aparılır. Hazırda şəhərdə 648 ailə məskunlaşıb. Əhalinin, eləcə də dövlət və özəl sektora aid binaların və obyektlərin içməli su ilə təmin edilməsi üçün layihələr həyata keçirilir, o cümlədən hər birinin tutumu 8500 və 2500 kubmetr olan 4 su anbarı inşa edilir. Anbarların idarəetmə və gözətçi otaqlarının tikinti-quraşdırma işləri artıq yekunlaşıb.
Füzuli Sukanal Sahəsinin rəisi Vüqar Sərkərli bildirib ki, Gövşad kəndindəki mənbədən müvəqqəti olaraq 100 kubmetrlik anbara su vurulur və oradan Füzuli şəhərinə su verilir. Sahə rəisinin sözlərinə görə, şəhər 24 saatlıq dayanıqlı içməli su ilə təmin olunur.
Ərazidə tikilən 17 min və 2500 kubmetrlik anbarlarda da işlər yekunlaşmaq üzrədir. Artıq layihə çərçivəsində Füzuli şəhərində 10330 metr magistral su xətti, 5807 metr artezianlar və anbarlararası su xətti, tullantı su təmizləyici qurğu, 1816 metrlik kanalizasiya kollektoru inşa olunub. Bundan əlavə, 15 subartezian quyusunun qazıntı işləri də yekunlaşıb.
Gələcək perspektivi nəzərə alaraq əminliklə demək olar ki, Füzuli şəhərinin sakinləri su təminatında heç bir problem yaşamayacaqlar. Hər bir sakin keyfiyyətli içməli su ilə təmin olunacaq.
Lazım QULİYEV,
"Azərbaycan"
