Qadınlara Qarşı Zorakılıq üzrə Milli Monitorinq Mərkəzinin hesabatında bildirilir ki, Fransada ictimai nəqliyyatda cinsi zorakılıq qurbanlarının sayı ötən il rekord həddə çatıb. Məsələn, ölkənin İle-de-Frans bölgəsində hər 10 qadından yeddisinin ictimai nəqliyyatda hansısa formada cinsi zorakılığa məruz qaldığı müəyyən edilib.
Mərkəzin yaydığı hesabatda 2016-cı ildən bəri qurbanların illik sayının 86 faiz artdığı göstərilib.
Araşdırmaya görə, 2024-cü ildə polis ictimai nəqliyyatda 3374 cinsi zorakılıq hadisəsi qeydə alıb. Bu da 2022-ci il göstəricilərindən 9 faiz çoxdur.
Hesabatda qeyd olunan zorakılıq formalarına cinsi qısnama, həmçinin zorlama və zorlama cəhdi daxildir.
Qurbanların 10 nəfərindən 9-u qadındır, onların 75 faizi 30 yaşdan aşağıdır.
Ölkədə ən çox zərər çəkmiş bölgə paytaxt Parisin İle-de-Frans bölgəsi olub - burada bütün hadisələrin 44 faizi qeydə alınıb və hər 10 qadından 7-si həyatlarının hansısa bir dönəmində ictimai nəqliyyatda cinsi zorakılığa məruz qaldığını bildirib.
Qustav Eyfel Universitetinin şəhərsalma üzrə tədqiqatçısı Manon Marqerit cinsiyyətçi təhqirlərə və arzuolunmaz toxunuşlara diqqət çəkib: "İlk olaraq ağla gələn cinayətkarlar eksgibisionistlər və "toxunanlardır". Həqiqətən də, ictimai nəqliyyatın müəyyən xüsusiyyətləri - sıx şərait, həddindən artıq sərnişin və nəqliyyat vasitəsini rahat tərk edə bilməmək - cinsi zorakılığın bu spesifik formalarına səbəb ola bilər. Bu hadisələr realdır, lakin onlar ictimai qavrayışda üstünlük təşkil edir, zorakılığın digər formalarını kölgədə qoyurlar. Lakin çox vaxt bu davranış formalar trivial hesab olunduğundan rədd edilsə də, əslində bunları yaşamış insanlara ciddi travma yetirə bilər."
Hesabatda bu tipli cinayətləri törədənlərin 96 faizinin kişi olduğu bildirilir. Həmçinin deyilir ki, bir çox qadın zorakılıq barədə məlumat verməkdən çəkinir, çünki onlar ciddi qəbul edilməyəcək və ya səlahiyyətlilər müvafiq tədbir görməyəcəklər.
Araşdırmaya görə, qurbanların yalnız 7 faizi polisə şikayət edir, 1/3-dən çoxu utanc, 70 faizi qəzəb hissi keçirir, 60 faizi isə cəmiyyəti dəyişmək istəyir.
Hesabatda qeyd edilir ki, ictimai nəqliyyatdan istifadə edən bir çox qadın bu cür hadisələrlə üzləşməmək üçün müxtəlif üsullardan istifadə edir - məsələn, marşrutunu, səyahət vaxtını və ya hətta geyimini dəyişir.
Rizvan CƏFƏROV,
"Azərbaycan"
jpeg_1770413167.jpeg)
jpg_1770383734.jpg)
jpg_1770383627.jpg)
