Uzun illərdir "din qardaşlığı" və "mehriban
qonşuluq" maskası altında gizlənən İran rejimi bu dəfə birbaşa hərbi təcavüz
yolunu seçərək Naxçıvan Muxtar Respublikasının dinc sakinlərini və mülki
infrastrukturunu hədəf aldı. Naxçıvan ərazisinə dron zərbəsinin endirilməsi
molla rejiminin nankorluğunu, riyakarlığını bir daha nümayiş etdirdi. Mülki
infrastrukturlara - Hava limanına və məktəb binasına hücum təşkil edilməsi beynəlxalq hüququn
norma və prinsiplərinə zidd olmaqla yanaşı, acizlik və qorxaqlıq əlamətidir. Bu
həm də regionda gərginliyin artmasına rəvac verən addımdır. Bu, sadəcə, bir sərhəd
pozuntusu deyil, suveren bir dövlətə qarşı törədilmiş açıq terror aktıdır.
Prezident İlham Əliyevin sədrliyi ilə keçirilən Təhlükəsizlik
Şurasının iclasında dövlət başçısı bu namərd hücumu sərt və qətiyyətli şəkildə
pisləyərək qeyd etdi ki, İran tərəfindən Azərbaycan dövlətinə qarşı terror aktı
törədilmişdir: "Naxçıvan Muxtar Respublikasının ərazisini İran dövləti
pilotsuz uçuş aparatları ilə atəş altına salmışdır. Atəşin hədəfləri mülki
obyektlər idi. Naxçıvan Beynəlxalq Hava Limanı, onun terminal binası, məktəb və
digər istiqamətlər İran tərəfindən namərd atəşə məruz qalmışdır. Azərbaycan
dövləti bu çirkin terror aktını qətiyyətlə pisləyir, bunu törədənlər dərhal məsuliyyətə
cəlb edilməlidir. Azərbaycan tərəfinə İran rəsmiləri tərəfindən izahat verilməlidir,
üzr istənilməlidir və bu terror aktını törədənlər cinayət məsuliyyətinə cəlb
edilməlidir".
Bu hücum İranın illərdir apardığı anti-Azərbaycan siyasətinin
məntiqi davamıdır. Uşaqların təhsil aldığı məktəbi və mülki sərnişinlərin
istifadə etdiyi hava limanını hədəfə almaq yalnız terrorçu təfəkkürünün məhsulu
ola bilər. İranın Azərbaycana qarşı düşmənçiliyi yeni deyil. Azərbaycan xalqı
Tehrandakı səfirliyimizə edilən qanlı hücumu hələ də unutmayıb. Dövlətimizin başçısı həmin hadisəni
xatırladaraq İranın terror siyasətini ifşa etdi: "Hamımız yaxşı
xatırlayırıq ki, bir müddət bundan əvvəl Azərbaycanın Tehrandakı səfirliyi
terror aktına məruz qalmışdır. Səfirliyə hücum çəkmiş İran xüsusi xidmət
orqanları tərəfindən təlimatlandırılmış şəxs Azərbaycan vətəndaşlarına qarşı
qanlı terror aktı törədib. Bunun nəticəsində bir vətəndaş həlak olub, bir vətəndaş
isə ağır yaralanıb. Onu da bildirməliyəm ki, Azərbaycanın xüsusi xidmət
orqanlarının əliyalın nümayəndəsi avtomat "Kalaşnikov"la,
"Molotov" kokteyli və balta ilə silahlanmış terrorçunu zərərsizləşdirib.
O vaxt da bizdə şübhə yox idi ki, bunu törədən İran dövlətidir... Aydın məsələ
idi ki, Azərbaycanı qorxutmaq, Azərbaycana qarşı çirkin əməllərini həyata
keçirmək üçün bu terror aktı İranın dövlət qurumlarının ən rəhbər mərtəbələrindən
sifariş edilmişdir".
Səfirlikdə törədilən terror hadisəsində olduğu kimi,
Naxçıvana hücumda da İranın məqsədi Azərbaycanı qorxutmaq, onun müstəqil xarici
siyasətinə təsir etməkdir. Lakin Bakının cavabı hər zaman olduğu kimi, adekvat
və sarsıdıcıdır. Səfirlikdə törədilən terrordan sonra Azərbaycanın qətiyyəti
qarşısında geri çəkilən və cinayətkarı edam etməyə məcbur olan Tehranın molla
rejimi görünür ki, bu hadisələrdən düzgün nəticə çıxarmayıb.
Prezident İlham Əliyevin çıxışında diqqətçəkən ən mühüm məqamlardan
biri İranın nankorluğunun ifşası idi. Dövlətimizin başçısı bildirdi:
"Livanda çətin vəziyyətdə qalan İran diplomatlarının təxliyəsi üçün İran tərəfi
Azərbaycandan kömək istəmişdi. Azərbaycan öz təyyarəsini göndərməyə hazır
olduğunu bildirmiş, humanitar prinsiplərdən çıxış edərək təmənnasız yardım təklif
etmişdi. Bütün bunların müqabilində çirkincə, namərdcə, nakişi kimi Naxçıvana zərbə
endirmək?! Bu ləkə onların çirkin və eybəcər simasından heç vaxt silinməyəcək".
Bir tərəfdən yardım istəyib, digər tərəfdən kömək əli uzadan qonşunun mülki hədəflərinə
PUA ilə zərbə endirmək heç bir dövlət etikasına, dini dəyərə və insanlığa
sığmayan hərəkətdir. Bu, sadəcə, nankorluq nümunəsidir.
Azərbaycan dövləti heç bir təhdid qarşısında geri çəkilən
deyil. 44 günlük Vətən müharibəsində Ermənistanı və onun havadarlarını diz
çökdürən "dəmir yumruq" bu gün də hazır vəziyyətdədir. Prezident
İlham Əliyevin tapşırığı ilə Müdafiə Nazirliyi, Dövlət Sərhəd Xidməti və Xüsusi
Təyinatlı Qüvvələr birnömrəli səfərbərlik vəziyyətinə gətirilib. Dövlət
başçısının bu xüsusda xəbərdarlığı son dərəcə sərtdir: "Bizim gücümüzü
sınamasınlar. Bizim gücümüzü sınamaq istəyənlərin başı "dəmir yumruq"
vasitəsilə yarıldı. Bugünkü hadisə də eyni nəticəni hasil edəcək".
İranın bu təcavüzkar addımı beynəlxalq birlik tərəfindən dərhal
kəskin reaksiya ilə qarşılanıb. Hadisə baş verən andan etibarən müxtəlif ölkələrin
prezidentləri, xarici işlər nazirləri zəng edərək ölkəmizə dəstəklərini ifadə
ediblər. Həmçinin BMT, Avropa İttifaqı,
İslam Əməkdaşlıq Təşkilatı, bir sıra ölkələrin Bakıda akkreditə olunmuş səfirləri
Azərbaycanın suverenliyi və ərazi bütövlüyünə qarşı yönəlmiş bu hadisəni pisləyərək,
bizimlə həmrəyliklərini nümayiş etdiriblər.
Bu ölkədə yaşayan azərbaycanlılara qənim kəsilən,
soydaşlarımızı bütün hüquqlardan məhrum edən, daim təzyiq altında saxlayan, azərbaycanlı
fəalları təqib edən və cəzalandıran İran rejimi anlamalıdır ki, bu gün Azərbaycanın
həm hərbi qüdrəti, həm də xalq-iqtidar birliyi istənilən xarici müdaxiləni dəf
etməyə qadirdir. Müstəqil Azərbaycan öz suverenliyini qorumaq üçün hər bir
addımı atıb və bundan sonra da atacaq.
Naxçıvana edilən hücum İranın regionda sülh tərəfdarı
olmadığını nümayiş etdirdi. Bu təxribat Azərbaycanı zəiflətməyəcək, əksinə,
xalqımızı dövlət ətrafında daha sıx birləşdirəcək. Bizə qarşı uzanan xəyanət əlləri
hər zaman olduğu kimi kəsiləcək. Dövlətimiz sarsılmazdır, ordumuz qüdrətlidir və
"dəmir yumruq" hər an düşmənin başını əzməyə hazırdır.
Zaur ŞÜKÜROV,
Milli Məclisin deputatı
