Azərbaycan Banklar Assosiasiyası, Azərbaycan Mikromaliyyə Assosiasiyası, Azərbaycan Sığortaçılar Assosiasiyası, Azərbaycan Fintex Assosiasiyası, Azərbaycan Fond Bazarı İştirakçılarının Assosiasiyasının təşkilatçılığı ilə Bakıda Azərbaycan Maliyyə Forumu keçirilib.
AZƏRTAC xəbər verir ki, forum iqtisadiyyatın inkişafı ilə maliyyə sektorunun potensialının uzlaşdırılması, maliyyə vasitəçiliyinin və maliyyə inklüzivliyinin gücləndirilməsi, bu sahədəki maneələrin aradan qaldırılması, eləcə də, innovativ texnologiyaların tətbiqi ilə rəqəmsallaşmanın sürətləndirilməsi imkanlarının, maliyyə sektorundakı qanunvericilik və tənzimləmələrin təkmilləşdirilməsinin, bu əsasda ötən dövr ərzində Azərbaycan maliyyə sektorunun əldə etdiyi nailiyyətlər və qarşıda duran çağırışların müzakirə edildiyi platforma olmaq məqsədi daşıyır.
Forumda çıxış edən Mərkəzi Bank sədrinin müavini Toğrul Əliyev bildirib ki, maliyyə innovasiyalarının inkişafı məqsədilə Mərkəzi Bank ötən ildən xüsusi tənzimləmə rejiminin tətbiqinə başlayıb. Bu məqsədlə xüsusi tənzimləmə rejiminin internet resursu yaradılıb, artıq həmin resursda 21 müraciət qeydə alınıb, onlardan 4 innovativ məhsul meyarlara uyğun seçilərək xüsusi tənzimləmə rejiminə qəbul edilib. Hazırda bu innovativ məhsulların sınaqdan keçirilməsi davam etdirilir.
Azərbaycan Banklar Assosiasiyasının prezidenti Zakir Nuriyev qeyd edib ki, banklar və “Azərpoçt” MMC sistemləri üzrə dekabr ayının sonunda dövriyyədə olan ödəniş kartlarının sayı ötən aya nəzərən 436 min ədəd artaraq 19 milyon 899 min ədəd təşkil edib. Keçən ilin müvafiq dövrü ilə müqayisədə bu göstərici 17,6 faiz və ya 3 milyon ədəd artıb. Ödəniş kartlarında artım debet kartları üzrə 19,9 faiz, kredit kartları üzrə 1,8 faiz təşkil edib. Bununla yanaşı, 2024-cü il ərzində ödəniş kartları ilə ölkə daxilində aparılmış əməliyyatların həcmi 78,9 milyard manata yüksəlib ki, bu da 2023-cü illə müqayisədə 61 faiz çoxdur. Ötən il ödəniş kartları ilə ölkə daxilində aparılan ödəniş əməliyyatlarının 64,2 faizi nağdsız formada həyata keçirilib.
2024-cü ilin nəticələrinə əsasən, dövriyyədə olan ödəniş kartlarının ümumi sayı təxminən 20 milyon ədəd təşkil edir. Bu ödəniş kartları ilə aparılan nağdsız ödəniş dövriyyəsinin ümumi həcmdə payı 64,2 faizə bərabər olub Elektron ticarət dövriyyəsi 2023-cü ilə münasibətdə 1,7 dəfə böyüyərək 66,5 milyard manat təşkil edib.
Azərbaycan Mikromaliyyə Assosiasiyasının sədri Cəlal Əliyev deyib: “Ötən ilin nəticələrinə görə, ölkədə 93 bank olmayan kredit təşkilatı (BOKT) fəaliyyət göstərir. Bunlardan 36-sı kredit təşkilatı, 57-si isə bank olmayan kredit təşkilatıdır. Onlardan biri dövlətin iştirak payı olan bank olmayan kredit təşkilatı, 15-i isə xarici investisiyaların iştirakı olan BOKT-dur. Ötən ilin sonuna BOKT-un aktivləri 1 milyard manata çatıb. Bu, 2023-cü illə müqayisədə 24 faiz artım deməkdir. Müştərilərə verilmiş cəmi kreditin həcmi 800 milyonu ötüb”.
Son illərdə sığorta sektorunda rəqəmsallaşmanın yeni imkanlar açdığını deyən Azərbaycan Sığortaçılar Assosiasiyasının Müşahidə Şurasının sədri Ülviyyə Cabbarova diqqətə çatdırıb ki, onlayn sığorta xidmətlərinin geniş yayılması, elektron müqavilələrin tətbiqi və avtomatlaşdırılmış həllərin inkişafı müştərilər üçün prosesi daha rahat və əlçatan edib: “2024-cü ilin nəticələrinə əsasən, sığorta bazarının həcmi 1 milyard 353 milyon 185 min manat təşkil edib. Bu rəqəm sektorun maliyyə sistemindəki rolunun əhəmiyyətini göstərir. Biz qarşıda duran yeni imkanlar və çağırışları da diqqətdə saxlamalıyıq. Bu baxımdan Azərbaycan Respublikasının Mərkəzi Bankı tərəfindən hazırlanmış “2024-2026-cı illərdə maliyyə sektorunun inkişaf Strategiyası” sığorta sektoru üçün olduqca əhəmiyyətlidir”.
Forum panel iclaslarına işini davam etdirib.
Panel iclaslarda “Maliyyə sektorunun inkişafının ölkənin qlobal rəqabət qabiliyyətinə təsiri”, “Qeyri-neft sektorunun maliyyələşdirilməsi imkanları”, “Maliyyə inklüzivliyinin genişləndirilməsi”, “Kapital bazarında yeni rəqəmsal həllərin tətbiqi”, “BOKT sektoru və requlyativ dəyişikliklər” və digər mövzularda məruzələr dinlənilib.
jpeg_1766151155.jpeg)
