Azərbaycandan təbii qaz idxal edən Sloveniya ilə digər sahələrdə əməkdaşlıq üçün də perspektivlərimiz genişdir
Azərbaycanın enerji sahəsində Balkan regionu, o cümlədən Sloveniya ilə əməkdaşlığı inkişaf edir və bunun üçün daha böyük perspektivlər var. Sloveniya ilə iqtisadi-ticari münasibətlərimizin genişləndirilməsi üçün iki ölkənin biznes dairələri arasında əlaqələrin inkişafına da imkanlar mövcuddur.
Orta dəhliz Avropa ilə Çin arasında iqtisadi-ticari əlaqələrin inkişafında mühüm nəqliyyat arteriyalarından biri olduğu üçün Sloveniya şirkətlərinə də əlverişli şərait yaradır. Bu xüsusda Azərbaycanın və Sloveniyanın limanları arasında əməkdaşlığın yaradılması mümkündür.
Prezident İlham Əliyev bu il aprelin 17-də Sloveniya Respublikasının Baş nazirinin müavini, xarici işlər və Avropa məsələləri naziri Tanya Fayonu qəbul edərkən iqtisadi sahəyə aid bu məsələlər də qeyd olunub. Ötən ilin statistikasına nəzər salanda görürük ki, Sloveniya ilə ticarət dövriyyəmiz 30 milyon dollar olub. Əlbəttə, bu o qədər böyük rəqəm deyil. Lakin son dövrdə önəmli bir hadisə də baş verib. İndi Azərbaycandan qaz alan 12 ölkə sırasında Sloveniya da var. Bugünlərdə Bakıda keçirilən Azərbaycan-Sloveniya biznes-forumu çərçivəsində imzalanmış ticarət sazişi də hər iki ölkənin iqtisadiyyatlarının rəqəmsallaşdırılmasının müxtəlif istiqamətlərində əməkdaşlığın inkişafına təkan verəcək. Bu, Sloveniyanın "Kontron" şirkəti ilə Azərbaycanın "Bestcomp" şirkəti arasında imzalanmış əməkdaşlıq haqqında sazişdir.
"SPIRIT Slovenia" agentliyinin beynəlmiləlləşmənin təşviqi sektorunun rəhbəri Tanya Drobniç sözügedən biznes-forumda bildirib ki, Sloveniya və Azərbaycan arasında xidmət və məhsulların geniş spektrinin həyata keçirilməsi imkanı mövcuddur.
Azərbaycanla Sloveniya üçüncü ölkələrə ixrac üçün birgə müəssisələrin yaradılmasını nəzərdən keçirə bilər. Bunu isə həmin forumda çıxışı zamanı İxracın və İnvestisiyaların Təşviqi Agentliyinin (AZPROMO) icraçı direktorunun müavini Tural Hacılı bildirib. Bu il ticarətdə nəzərəçarpacaq artımın olduğunu da deyib: "2025-ci ilin ilk iki ayında ticarət dövriyyəsi 67 faiz, ixrac isə 66 faiz artıb. Bu həmin sahədə böyük artım potensialından xəbər verir".
Bakıda Azərbaycan və Sloveniya arasında İqtisadi Əməkdaşlıq üzrə Birgə İşçi Qrupunun ilk iclası da keçirilib. İclası giriş sözü ilə açan əmək və əhalinin sosial müdafiəsi naziri Anar Əliyev Azərbaycanla Sloveniya arasında dostluq münasibətləri əsasında əlaqələrin genişlənməkdə olduğunu diqqətə çatdırıb. O, iki ölkə arasında ötən dövrdə müxtəlif sahələr üzrə əməkdaşlığa dair 12 sənəd imzalandığını, parlamentlərarası dialoq üzrə işçi qrupların münasibətlərimizin inkişafında mühüm rolunu qeyd edib.
Əmək və məşğulluq sahələrində əməkdaşlığın inkişafı üçün də böyük potensialın olduğu, təhsil, səhiyyə, mədəniyyət, turizm, idman və digər sahələrdə əməkdaşlığın dərinləşdirilməsinin əlaqələrin inkişafında önəmi, hazırkı iclasın yeni əməkdaşlıq perspektivlərinin müzakirəsi üçün gözəl imkan yaratdığı bildirilib.
İclasda Azərbaycan və Sloveniya tərəfindən müxtəlif qurumların rəhbər şəxsləri tərəfindən təqdimatlar edilib. İkitərəfli əməkdaşlığın gündəliyinə, iqtisadi-ticarət, səhiyyə, təhsil, mədəniyyət, nəqliyyat, İKT, idman, turizm, investisiya sahələrində əməkdaşlığının genişləndirilməsinə, həmçinin əmək, məşğulluq, sosial müdafiə sahələrində də əlaqələrin inkişaf etdirilməsi imkanlarına dair müzakirələr aparılıb.
Azərbaycan ilə Sloveniya əczaçılıq sahəsində də əməkdaşlıqda maraqlıdırlar. Bunu isə maliyyə nazirinin birinci müavini Anar Kərimov deyib. Bildirib ki, əczaçılıq sənayesində istehsal hər iki ölkənin maraq doğuran sahələrindəndir: "Bu sahələrin bizim prioritet inkişaf istiqamətlərimizlə üst-üstə düşməsi çox sevindiricidir. Azərbaycan və Sloveniya ümumilikdə əməkdaşlığın genişləndirilməsində maraqlıdırlar. Bugünkü biznes-forum yalnız hər iki ölkənin şirkətləri arasında əlaqələr qurmaqdan ibarət deyil, eyni zamanda dövlətlər arasındakı əlaqələrin də inkişafına təkan verir. Bu gün Sloveniya texnologiya, innovasiya və İT sahələrində daha yüksək nailiyyətlərə doğru irəliləyir ki, bu da əməkdaşlıq əlaqələrinin yaxınlaşmasını şərtləndirir".
Onu da qeyd edək ki, müzakirələrdən sonra Birgə İşçi Qrupunun Azərbaycan və Sloveniya tərəfindən həmsədləri - Azərbaycanın maliyyə nazirinin birinci müavini Anar Kərimov və Sloveniyanin İqtisadiyyat, Turizm və İdman Nazirliyinin baş katibi Mitya Blaqanye iclasın yekunlarına dair Protokolu imzalayıblar.
Flora SADIQLI,
"Azərbaycan"
