Avropa ölkələri son günlərdə anomal temperatur göstəriciləri və rekord istilərlə mübarizə aparır. Meteoroloqlar Avropa üzərində yaranan nəhəng yüksək təzyiq sisteminin hava axınlarının hərəkətini kəsdiyini və qovurucu istini qitəyə həbs etdiyini bildirirlər. Bu sistem səbəbindən isti hava kütlələri şimala, Skandinaviya və Norveç xəttinə qədər irəliləyib.
Anadolu Agentliyi xəbər verir ki, isti hava dalğası səbəbindən İtaliyanın 8 şəhərində “qırmızı”, Fransa və Belçikada isə “narıncı” həyəcan səviyyəsi elan olunub. Hollandiya və İngiltərədə də termometrlərin bəzi bölgələrdə 30 dərəcəni, ən isti nöqtələrdə isə hətta 38 dərəcəni keçəcəyi proqnozlaşdırılır. Mütəxəssislər iyun ayında bu cür temperaturların qeydə alınmasını qeyri-adi hal kimi qiymətləndirir və bunu qlobal iqlim dəyişikliyinin atmosferdəki təsirləri ilə əlaqələndirirlər.
Yüksək təzyiq sisteminin qərb qanadı Avropanı yandırsa da, eyni sistemin şərq qanadında (məsələn, Türkiyə və ətraf bölgələrdə) paradoksal olaraq daha sərin və yağışlı hava şəraiti hökm sürür. Lakin bu bölgələrdə də temperaturun aşağı düşməsi ilə yanaşı, leysan yağışları, dolu, güclü külək və sel fəsadları riskinin yüksək olduğu bildirilir. Sinoptiklər iyunun sonuna doğru blokaj sisteminin zəifləyəcəyini və havaların yenidən dəyişəcəyini ehtimal edirlər.
Həddindən artıq isti hava və gözlənilən kəskin hava şəraiti ilə əlaqədar ekspertlər əhaliyə bir sıra vacib tövsiyələr verib. Günəş şüalarının ən çox olduğu saatlar arasında məcburi olmadıqca çölə çıxmamaq və ağır fiziki işlərdən qaçınmaq, susamağı gözləmədən bol su istehlak etmək, kofeinli və spirtli içkiləri məhdudlaşdırmaq, isti hava dalğasının müşahidə olunduğu yerlərdə meşə yanğınlarına qarşı maksimum diqqətli olmaq, təbiətdə od yandırmamaq, yağıntı və fırtına xəbərdarlığı edilən bölgələrdə isə sel, daşqın və alt keçidlərdə yarana biləcək su yığılmalarına qarşı ehtiyatlı olmaq tövsiyə olunur.
Təhminə VERDİYEVA,
“Azərbaycan”
jpg_1782225479.jpg)
