Azərbaycan dövlətinin yürütdüyü siyasətin mərkəzində hər zaman insan amili və vətəndaş rifahı dayanır. Ötən otuz il ərzində məcburi köçkün soydaşlarımızın sosial müdafiəsinin gücləndirilməsi istiqamətində ölkəmizdə misilsiz layihələr icra olunub. Məcburi köçkünlərlə bağlı həyata keçirilən hüquqi və sosial islahatlar Azərbaycanın postmünaqişə dövründə qarşıya qoyduğu strateji hədəflərin tərkib hissəsidir. Uzun illər ərzində məcburi köçkünlərin müdafiəsinə yönəlmiş xüsusi mexanizmlər öz tarixi missiyasını yerinə yetirərək, bu gün mövcud reallıqlara uyğun şəkildə yenidən formalaşdırılır.
Milli Məclisin deputatı Kamran BAYRAMOV qəzetimizə açıqlamasında deyib ki, məcburi köçkünlərin sosial və humanitar problemlərinin həlli üçün ölkəmizdə möhkəm hüquqi baza formalaşdırılıb: "Bu məqsədlə dövlət başçısı tərəfindən 75 fərman və sərəncam imzalanıb, parlamentdə 11 qanun qəbul edilib. 2004-cü ildə təsdiqlənən xüsusi dövlət proqramı isə bu sahədə genişmiqyaslı layihələrin yol xəritəsinə çevrilib. Görülən ardıcıl tədbirlər nəticəsində 1990-cı illərin ağır mirası olan çadır düşərgələri 2007-ci ildə, fin tipli qəsəbələr isə 2016-cı ildə tamamilə ləğv edilib. Ölkə rəhbərliyinin tapşırığı ilə 121 yeni qəsəbə və müasir yaşayış kompleksi tikilib. Bununla da 62 mindən çox ailənin, yəni 300 mindən çox soydaşımızın mənzil-məişət şəraiti köklü şəkildə yenilənib. Dövlət dəstəyi təkcə mənzillə məhdudlaşmayıb, həm də insan kapitalının qorunmasına yönəlib. Bu diqqətin nəticəsidir ki, təkcə 2025-2026-cı tədris ilində ali və orta ixtisas məktəblərinə ödənişli qəbul olan 3923 məcburi köçkün statuslu tələbənin təhsil xərcləri tamamilə dövlət büdcəsi hesabına qarşılanıb".
Deputat diqqətə çatdırıb ki, artıq əsas məqsəd vətəndaşların müvəqqəti məskunlaşma şəraitində deyil, öz doğma torpaqlarında dayanıqlı və firavan həyat qurmalarını təmin etməkdir. İşğaldan azad edilmiş ərazilərdə yaradılan müasir yaşayış məntəqələri, geniş sosial infrastruktur və məşğulluq imkanları bu məqsədin uğurla həyata keçirildiyini göstərir. Eyni zamanda keçid dövründə sosial müdafiə tədbirlərinin davam etdirilməsi dövlətin vətəndaş amilinə verdiyi yüksək dəyərin təzahürüdür. "Bu yeni strateji mərhələdə doğma yurdlarına köçən vətəndaşların müasir standartlara cavab verən daimi yaşayış sahələri ilə tam təmin olunması dövlət siyasətinin mərkəzində dayanır. Beləliklə, Böyük qayıdış yalnız insanların doğma yurdlarına qayıdışı deyil, həm də onların sosial rifahının, təhlükəsizliyinin və inkişaf perspektivlərinin təmin olunması deməkdir. Bu proses Azərbaycanın sosial dövlət modelinin gücünü və vətəndaşına göstərdiyi ardıcıl qayğını bir daha nümayiş etdirir", - deyə o əlavə edib.
K.Bayramov qeyd edib ki, göründüyü kimi, artıq müvəqqəti sığınacaqların deyil, doğma torpaqlarda qurulan müasir şəhərlərin, yeni iş yerlərinin açılmasının və firavan gələcəyin xronikası yazılır. Dövlətin öz vətəndaşına olan bu ardıcıl qayğısı isə xalq-iqtidar birliyinin ən böyük rəmzi olaraq tarixə həkk olunur.
Ə.QABİLQIZI,
"Azərbaycan"
