Bizim üçün Azərbaycan Həmkarlar İttifaqları Konfederasiyasının (AHİK) Beynəlxalq Həmkarlar İttifaqları Konfederasiyası (ITUC) ailəsinin ayrılmaz hissəsi olması son dərəcə önəmlidir. AHİK-in ITUC-un və ümumilikdə qlobal həmkarlar ittifaqları hərəkatının müəyyən etdiyi prioritetlərin milli səviyyədə həyata keçirilməsində fəal iştirak etməsi bu əməkdaşlığın real nəticələr verdiyini göstərir.
Bu sözləri AZƏRTAC-a məxsusi müsahibəsində ITUC-un nümayəndəsi Anton Leppik deyib. O qeyd edib ki, sosial dialoqun qurulması və ardıcıl şəkildə tətbiqi ölkədə demokratik idarəçiliyin əsas alətlərindən biridir. Sosial dialoq işçilərin səsinin eşidilməsi, onlarla məsləhətləşmələrin aparılması və əmək münasibətlərinə, eləcə də işçilərin rifahına təsir edən qərarların üçtərəfli mexanizm əsasında qəbul olunması deməkdir. Bu dialoqun yalnız milli səviyyə ilə məhdudlaşması, eyni zamanda, sektor, regional və müəssisə səviyyələrinə qədər genişlənməsi isə olduqca vacibdir. Məhz bu zaman işçilər kollektiv müqavilələr bağlaya, təmsil oluna, öz maraqlarını qoruya və müəssisə səviyyəsində qərarların qəbulunda iştirak edə bilərlər.
“Digər mühüm məsələ peşə sağlamlığı və təhlükəsizliyi sahəsidir. Bu gün bu anlayış beynəlxalq səviyyədə işçilərin fundamental hüququ kimi qəbul olunur. Azərbaycan Həmkarlar İttifaqları Konfederasiyası təhlükəsiz, sağlam və insan inkişafını dəstəkləyən əmək şəraitinin yaradılması istiqamətində daim ön sıralarda olub.
Həmçinin əməyin yeni formaları, xüsusilə rəqəmsal platformalar vasitəsilə həyata keçirilən məşğulluq məsələsi artıq bütün dünyada geniş yayılıb, lakin təəssüf ki, bir çox hallarda bu platformalarda çalışan şəxslər rəsmi olaraq “işçi” kimi tanınmır. Biz ümid edirik ki, həm beynəlxalq, həm də milli səviyyədə birgə səylər nəticəsində rəqəmsal platformalarda çalışanlar da daxil olmaqla bütün işçilər əmək qanunvericiliyinin qoruyucu çərçivəsinə daxil ediləcək və onların hüquqları tam şəkildə təmin olunacaq”, - deyə Anton Leppik əlavə edib.
