Yanvarın 27-də daha iki il müddətinə mandatı uzadılmış Avropa İttifaqının “mülki” adı altında fəaliyyət göstərən missiyasının məqsədi elə başından bəllidir. İlkin mərhələdə qısa müddətdə və sayca az tərkibdə gəlmələri barədə Azərbaycanla razılıq əldə edilsə də, sonradan bu olmadan mandatın müddətinin uzadılması və tərkibinin genişləndirilməsi missiyanın kəşfiyyatçı və təxribatçı fəaliyyətindən xəbər verir.
Bununla Ermənistanı guya Azərbaycandan qoruduqlarını göstərmək istəyən Qərbin regionla bağlı niyyəti bəllidir. Azərbaycan Ermənistanda sülh prosesi ilə bağlı danışıqlarda heç bir vasitəçiyə ehtiyac olmadığını və bunun iki ölkə arasında həll ediləsi məsələ olduğunu dəfələrlə bildirib. Bununla belə, sülhdən dəm vuranlar Ermənistana müxtəlif yollarla dəstək göstərməklə təcavüzkar ölkəni yenidən münaqişəyə təhrik edirlər. Bu da sülh istiqamətində görülən işlərə, atılan addımlara təsir etməklə, təhlükəsizliyin və sabitliyin qarşısını alır. Beləliklə, regionda yeni münaqişə ocaqlarının yaranmasına rəvac verir.
Milli Məclisin deputatı Sahib Alıyev qəzetimizə açıqlamasında qeyd edib ki, Makron Fransasının Cənubi Qafqazla bağlı niyyəti Ermənistanın təhlükəsizliyini təmin etmək deyil, bu ölkəni oda salmaqdır, ondan geosiyasi alət kimi faydalanmaqla, öz maraqlarının təmininə çalışmaqdır. Bu maraqlar da Fransanın potensialına və çəkisinə uyğun deyil. “Ona görə bu ölkənin adını xüsusi vurğulayıram ki, çünki Avropa İttifaqının “mülki” missiyasının bizim regiona göndərilməsində ən çox canfəşanlıq edən Fransadır. “Mülki" missiyanın əsas fəaliyyəti sərgiləmək istədikləri kimi Ermənistanın təhlükəsizliyinin təmin edilməsinə deyil, guya bu ölkəyə qarşı hər hansı təhdidlərin olması barədə görüntü yaratmaqla onun silahlandırılmasına yönəlib. Ona görə də Ermənistanla sərhəddə tez-tez boy göstərirlər, guya bunların orada varlıqları Azəbaycanın qarşısını alır görüntüsü yaradırlar”, - deyə siyasətçi əlavə edib.
Deputat Prezident İlham Əliyevin dəfələrlə Azərbaycanın heç kimin torpağında gözünün olmadığı və Ermənistanla münaqişəni bitmiş saydığı baarədə fikirlərini xatırladıb. Onun fikrincə, bütün baş verənlərin arxasında duran reallıq bundan ibarətdir. Çox təəssüf ki, Ermənistan hakimiyyəti öz milli maraqlarına dayanan siyasət yürütmək əvəzinə, Nikol Paşinyanın ABŞ-də Atlantik Şurasındakı çıxışında bildirdiyi kimi, əvvəllər olduğutək bir deyil, bir neçə dövlətdən asılılığı müstəqillik səviyyələrinin artırılması kimi qiymətləndirir. Ortadakı reallıq budur. Amma bununla da Ermənistanı plasdarma çevirdiklərinin fərqində deyillər.
S.Alıyev vurğulayıb ki, Ermənistan gözünü açıb hazırda Ukraynada nələrin baş verdiyinə baxmalı və görməlidir ki, bu ölkəni plasdarma çevirənlər indi hansı sövdələşmənin arxasınca qaçırlar.
Əsmər QARDAŞXANOVA,
“Azərbaycan”
